Ենիգոմշյան. Բժիշկները պատանդ չեն, բժիշկները «Սասնա Ծռերի» պայմանների կատարման երաշխիք են

Հիմնադիր խորհրդարան» ընդդիմադիր շարժման ներկայացուցիչ, ԱՍԱԼԱ վետերան Ալեք Ենիգոմշյանը հավաստիացնում է, որ Էրեբունիի ՊՊԾ գնդի տարածքում գտնվող բժիշկները ոչ թե պատանդ են, այլ` ՊՊԾ ներսում հերթապահ բժշկական բրիգադի կանոնավոր ներկայություն ապահովելու նրանց պահանջի կատարման երաշխիք: Ենիգոմշյանն այդ մասին հայտարարել է հուլիսի 27-ին մամուլի ասուլիսի ժամանակ` մեկնաբանելով Հայաստանի առողջապահության նախարարության և Ոստիկանության հայտարարությունն այն մասին, թե «Շտապ օգնության» բրիգադը զինված խմբի մոտ պատանդ է:

Նրա ասելով, «Սասնա Ծռերի» տղաները պահանջում են բժշկական բրիգադի մշտական հերթափողով հերթապահություն սահմանել, ինչից հետո ՊՊԾ ներսում գտնվող բժիշկներին բաց կթողնեն` փոխանակելով «Շտապ օգնության» նոր բրիգադի հետ: Ինչպես հայտարարել է Ենիգոմշյանը, նույնիսկ պատերազմի ժամանակ մարդիկ չեն զրկվում բժշկական օգնություն ստանալու հնարավորությունից, և զինված խմբի անդամները, բոլոր միջազգային կոնվենմցիաների դրույթների համաձայն, դրա իրավունքն ունեն:

Ինչպես հաղորդել է Ենիգոմշյանը, ներսում երկու վիրավոր կա. մեկը վիրավորվել էր ավելի վաղ, մյուսը թեթև վիրավորում է ստացել նախօրեին, ինչի առնչությամբ տղաները երկու պահանջ ունեն: Առաջինը վերաբերում է  բժշկական օգնությանը: Երկրորդ պահանջը հանդիպումն է պատգամավորների հետ: «Հիմնադիր խորհրդարան» ընդդիմադիր շարժումը ԱԺ պատգամաբվորներին կոչ է արել դիմել ոստիկանությանը և պահանջել հանդիպումներ «Սասնա Ծռերի» տղաների հետ` տեղի ունեցողի իրական պատկերը պարզելու համար:

Ինչպես արդեն հաղորդվել է, ՀՀ Առողջապահության նախարարությունն անհնար է համարում պատանդ վերցված շտապօգնության բուժանձնակազմին վիրաբուժական շարժական կլինիկայով փոխանակման վերաբերյալ ՙՍասնա ծռեր՚ խմբավորման անդամների պահանջը: Ինչպես ԱրմԻնֆո-ի հետ զրույցում ասել է ՀՀ առողջապահության նախարարի մամուլի քարտուղար Անահիտ Հայթայանը, տվյալ պահին ՀՀ Առողջապահության նախարարությունը քննարկում է միայն առանց նախապայմանների պատանդներին ազատ արձակելու հնարավորությունը: Ըստ որում, Հայթայանը դժվարացել է ասել, թե ինչպես է դա հնարավոր անել: Նշենք, որ Հայաստանի գլխավոր վարակաբան Արա Ասոյանն ինքնակամ ցանկություն է հայտնել հանձնվել ՙՍասնա ծռերին՚՝ պատանդների փոխարեն: Ավելի վաղ ՀՀ ոստիկանությունը հայտնել էր, որ իրենց մասնագիտական պարտքը կատարելու նպատակով ՊՊԾ գնդի տարածք մուտք գործած «Շտապօգնությունե ՓԲԸ բուժաշխատողների` երկու բժշկի` Նորայր Թևանյանին ու Սալվադոր Խեչոյանին, բուժակ Դավիթ Տոնոյանին, բուժքույր Մալինա Մարգարյանին զինյալ խմբի անդամները պատանդ են վերցրել: