Քաղաքացիական ծառայության համակարգի բարեփոխումը Եվրամիության գերակայությունների թվում է: Այդ մասին այսօր ՀՀ Քաղաքացիական ծառայության խորհրդի նախագահ Մանվել Բադալյանի հետ համատեղ մամուլի ասուլիսի ժամանակ հայտարարել է Հայաստանում ԵՄ պատվիրակության ղեկավար Պյոտր Սվիտալսկին:
Նրա խոսքով, քաղաքացիական ծառայության արդիականացումը ենթադրում է իրավասու, անկախ, ապաքաղաքականացված կառույցի ստեղծման ձգտում: Սվիտալսկին նշել է, որ քաղաքացիական ծառայության արդիականացմանը կաջակցի SIGMA ծրագրի փորձագիտական խումբը:
ՙՔաղծառայության համակարգի բարեփոխումը հեշտ գործ չէ: Շատ երկրներում այդ ծառայության բարեփոխման փորձը ցույց է տալիս, որ հնարավոր չէ կայծակնային արդյունք ստանալ: Եվ Հայաստանն այդ հարցում բացառություն չէ, արդյունքի հասնելու համար անհրաժեշտ է ձգտում, ցանկություն և քաղաքական կամք: Եվ քաղաքացիական ծառայության բարեփոխումը պետական կառավարման համակարգի արդիականացման բազմամիլիոնանոց ծրագրի մասն է կազմում՚,- նշել է դիվանագետը:
Սվիտալսկին նշել է, որ քաղծառայության համակարգերի առջև ծառացած մարտահրավերներն ամենուր նույնն են, հատկապես՝ անցումային երկրներում, և Հայաստանը բացառություն չէ: Հիմնականում, նրա խոսքով, դա քաղաքական ճնշման բնույթ է կրում: Ըստ որում, նա հույս է հայտնել, որ Հայաստանի նոր սահմանադրությունը թույլ կտա բաժանարար գծեր ստեղծել քաղաքականության և քաղաքացիական ծառայությունների միջև՝ նվազագույնի հասցնելով այդ ճնշումը կամ իսպառ բացառելով դա:
Սվիտալսկիի խոսքով, քաղաքական ճնշումից բացի, հետխորհրդային բոլոր երկրներում պահպանվել է քաղաքացիական ծառայության գործունեության նկատմամբ խիստ վերահսկողության ժառանգությունը:
ՙԵվս մեկ մարտահրավեր են էթիկական խնդիրները՝ կոռուպցիան և նեպոտիզմը: Հայաստանում շատ ամուր են բարեկամական կապերը և տարածված է այդ կապերի միջոցով այս կամ այն աշխատանքի տեղավորումը: Այդ խնդրի հաղթահարման համար անհրաժեշտ է ստեղծել էթիկական նորմերի կոշտ համակարգ, ինչը կբացառի վերոհիշյալ արատները՚,- նշել է դեսպանը:
ՙՀուսանք, որ քաղաքացիական ծառայության մասին նոր օրենքը՝ ձևավորված եվրոպական լավագույն փորձի հիման վրա, կընդունվի մինչև ընթացիկ տարվա վերջը: Եվ մենք կունենանք նոր օրենք, որը թույլ կտա առաջ ընթանալ՚,- ամփոփել է Սվիտալսկին:
Բադալյանն իր հերթին նշել է, որ երկրի կառավարության կողմից ընդունված՝ քաղաքացիական ծառայության ռազմավարության համաձայն նախատեսվում է այդ կառույցի բարեփոխում, ինչը կարվի Հայաստանում ԵՄ պատվիրակության աջակցությամբ:
ՙՄեր առջև բարդ խնդիր է դրված՝ քաղաքացիական ծառայության բարեփոխումը, և մենք պետք է կատարենք դա: Մենք գիտակցում ենք, որ կախարդական փայտիկի օգնությամբ մեր բոլոր խնդիրները չեն լուծվի, դրա համար հետևողական և քրտնաջան աշխատանք է պետք՚,- նշել է ՀՀ Քաղաքացիական ծառայության խորհրդի նախագահը:
Հիշեցնենք, որ 2015 թվականի դեկտեմբերին Հայաստանի կառավարությունն ընդունել է երկրի քաղաքացիական ծառայության ոլորտի բարեփոխման ռազմավարությունը, որը կիրագործվի փուլ առ փուլ` մինչև 2020 թիվը: Քաղաքացիական ծառայության բարեփոխման հիմնական վեկտորը հիմնված է եվրոպական սկզբունքների վրա և համապատասխանում է միջազգային ստանդարտներին: