Սերժ Սարգսյան. Կգա ժամանակ, որ Թուրքիան էլ կճանաչի Հայոց ցեղասպանությունը

 Այս տարի Հռոմի Ֆրանցիսկոս Պապի Հայաստան կատարած այցը կարևոր նշանակույթուն ունեցավ: Այս մասին հայտարարել է ՀՀ նախագահ Սերժ Սարգսյանը լիբանանյան «Ալ-Մայադին» հեռուստաալիքի հետ հարցազրույցում:

Նրա խոսքով, Պապի այցն անվանեց «Ուխտագնացություն աշխարհի առաջին քրիստոնյա երկիր», ինչը մեծ ազդակ էր կաթոլիկ աշխարհին և տնտեսական առումով, իհարկե, նաև քաղաքական առումով:

«Երբ զրուցում ենք սրբազան քահանայապետի հետ, ես ասացի՝ Ձերդ Սրբություն, արդեն 1715 տարի է ինքներս գիտենք, որ աշխարհում առաջինը քրիստոնեություն ընդունած երկիրն ենք, բայց Ձեր այցով և Ձեր շուրթերից հնչած բառերով ամբողջ աշխարհն այդ մասին իմացավ: Դա չափազանց կարևոր էր, կարևոր էր նաև այն առումով, որ Պապի հիմնական ուղերձները ուղերձներ էին խաղաղության, միջկրոնական համերաշխության և հանդարտության: Կարծում եմ, որ մեր տարածաշրջանի բոլոր երկրները այդ ուղերձները պետք է ընդունեն և պատրաստ լինեն իրականացնել»,-ընդգծել է Սերժ Սարգսյանը:

Նա անդրադարձել է նաև Կովկասի տարածաշրջանին, նշելով, որ լինելով միգուցե ոչ այդքան ընդարձակ աշխարհագրական առումով, այդուհանդերձ էական ազդեցություն ունի ավելի մեծ մեր տարածաշրջանի վրա:

«Այն հակամարտությունները, որ գոյություն ունեն մեր տարածաշրջանում, ի վիճակի են մեծանալու, ահագնանալու և սպառնալիք դառնալու Եվրոպայի անվտանգության համար, Ռուսաստանի համար, նաև դեպի Արևելք: Անկասկած, այն Այն ջանքերը, որ գործադրում են Ռուսաստանը, ԱՄՆ-ը, ԵՄ-ն՝ ի դեմս Ֆրանսիայի, շատ կարևոր ջանքեր են: Պապը, կարծում եմ, իր այցով, իր ուղերձներով համալրում է այս ջանքերը: Նրա այցը Հայաստան խաղաղության այց էր, խաղաղ համակեցություն քարոզող այց էր, հանդուրժողականության քարոզող այց էր»,-ասել է ՀՀ նախագահը:

Անդրադառնալով Պապի կողմից «ցեղասպանություն» բառի արտաբերմանը և Թուրքիայի հիվանդագին արձագանքին, Սերժ Սարգսյանն ասել է. «Ոչ միայն Պապին, թուրքերը ջղային են արձագանքում բոլոր այն երկրների գործողություններին, որոնք ուղղված են Ցեղասպանության ճանաչմանը: Դրանում զարմանալի բան չկա: Շատերը տարակուսանք են հայտնում, թե ինչու Պապը շեշտեց այդ հանգամանքը և արտաբերեց Ցեղասպանություն բառը: Բայց եթե քաղաքական կամ հոգևոր գործիչը, կամ ընդհանրապես մարդը, որն ունի պատկերացումներն իրերի և իրադարձությունների վերաբերյալ, ապա ինչու ինչ-որ դեպքերում դրանք պետք է պահի, չասի»,-նշել է նախագահը:

Նա նկատել է, որ նախորդ տարի Վատիկանում տեղի ունեցած պատարագից ընդամենը շաբաթներ անց որոշ մարդիկ սկսեցին շահարկել, որ իբր թե Պապը փոխել է իր վերաբերմունքը և Ցեղասպանություն բառը չի արտաբերի:

«Կարծում եմ՝ Պապն այն մարդկանց թվին չի պատկանում, որոնք ջղային արձագանքների ներքո կամ ճնշումների պարագայում կարող են փոխել իրենց համոզմունքը: Նա դեռևս հոգևոր առաջնորդ էր Արգենտինայում, երբ բազմաթիվ անգամ «ցեղասպանություն» է ասել, ով շփվել է բազմաթիվ մարդկանց հետ, որոնք մազապուրծ են եղել ցեղասպանությունից, կամ նրանց զավակներն են: Կարծում եմ, որ կգա ժամանակ, երբ Թուրքիան նույնպես հանգիստ կսկսի վերաբերվալ այս հարցին: Եթե մենք գնանք մի փոքր ետ, ապա կտեսնենք, որ 5,7 կամ 10 տարի առաջ նրանք բոլորովին այլ կերպ էին արձագանքում այդ հարցին: Տաս տարի առաջ ոչ ոք չէր կարող պատկերացնել, որ Ստամբուլում կամ Անկարայում ապրիլի 24-ին թուրքերը կարող են փողոց դուրս գալ և իրենց համերաշխությունը հայտնել հայերին: Իսկ այժմ դա արդեն կա, և դրանից չես փախչի: Կգա ժամանակ, երբ Թուրքիան էլ կճանաչի Հայոց ցեղասպանությունը»,-նշել է ՀՀ նախագահը:

Նա նշել է նաև, որ վերջերս հնարավորություն ունեցավ շփվելու գերմանական ԶԼՄ-ների հետ, որտեղ բարձր են գնահատել Բունդեսթագի կողմից Հայոց ցեղասպանության ճանաչման վերաբերյալ բանաձևի ընդունումը:

«Ես նրանց նաև ասացի, որ Գերմանիայի օրինակը շատ ազդեցիկ է: Փաստորեն Գերմանիան Թուրքիայի ասաց հետևիր իմ օրինակին, և դրանից չես տուժի: Գերմանիան ճանաչեց Հոլոքոստը, չտուժեց, նա կարողացավ սթափ նայել պատմությանը, սեփական պատմությանը և դրանից դուրս գալ հաղթող, և նրա սեփական պատմությունն այլևս նրա վրա չի ճնշում: Իսկ Թուրքիան այսօր գտնվում է սեփական պատմության ճնշման տակ»,-նշել է նա:

Սարգսյանի խոսքով, այսօր Թուրքիան պնդում է, որ թուրք ժողովուրդն ի վիճակի չէր կատարելու այնպիսի ոճրագործություն, ինչպիսին ցեղասպանությունն է: Բայց նախագահը նշել է, որ Հայաստանը թուրք ժողովրդին չի մեղադրում, ավելին, նա միշտ էլ ասել է, որ այն իրագործվել է Օսմանյան կայսրության ղեկավարության կողմից:

«Այսօր մենք չենք մեղադրում թուրք ժողովրդին: Մենք մեղադրում ենք նրանց, ովքեր հերքում են հայերի ցեղասպանությունը: Տարածաշրջանային որոշ հարևաններ փորձում են այդ հանցագործությանը տալ կրոնական երանգ, բայց այդ մոտեցումը հեռու է իրականությունից»,-եզրափակել է Սարգսյանը: