Արամ Մանուկյան. Ընտրական գործընթացների նկատմամբ վստահության մեխանիզմների իրականցման նպատակով միջազգային կառույցները ճնշումներ են գործադրում Հայաստանի վրա

 Միջազգային կառույցները ճնշումներ են գործադրում Հայաստանի վրա, որպեսզի հանրապետությունը դոնորների հետ համատեղ համաֆինանսավորի ընտրական գործընթացների նկատմամբ վստահության  բարձրացման մեխանիզմները: Այս մասին այսօր կայացած մամուլի ասուլիսում հայտարարել է Հայ Ազգային Կոնգրեսի խմբակցության քարտուղար Արամ Մանուկյանը:

Նրա խոսքով, նշված մեխանիզմների իրականացման համար պակասում է 4 մլն.եվրո, բայց դեռ կան կառույցներ, որոնք կարող են ցուցաբերել ֆինանսական աջակցություն: «Սա արդեն ֆինանսական հարց չէ, այլ քաղաքական կամքի հարց է, և եթե իշխանությունները հրաժարվեն իրենց ավանդը ներդնելուց, ապա միջազգային կառույցների, ԵՄ և ԱՄՆ կողմից ճնշումները կուժեղանան»,-նշել է նա: Պատգամավորը հավելել է, որ այդ մեխանիզմները կարող են Գյումրիում և Վանաձորում կայանալիք տեղական ինքնակառավարման ընտրությունների ընթացքում օգտագործվել որպես պիլոտային ծրագրեր:

Մանուկյանը չի բացառել նաև, որ Գյումրիում և Վանաձորում ՏԻՄ ընտրություններում ՀԱԿ-ը կհամագործակցի որոշ ուժերի հետ, բայց չի նշել, թե հատկապես որ, քանի որ խորհրդատվությունները դեռ չեն ավարտվել: Ինչ վերաբերվում է 2017 թվականի խորհրդարանական ընտրություններին, նրա կարծիքով, ՀԱԿ-ը մտադիր է մասնակցել միայնակ, բայց չի բացառվում նաև դաշինքների ստեղծումը: «Կարծում եմ, որ ՀԱԿ վարկանիշը բարձր է, քանի որ մենք ոչ մեկի չենք խաբել»,-ընդգծել է նա, հավելելով, որ իր կողմից ներկայացվող կուսակցությունների համար բարդ է համագործակցել նորաթուխ և կեղծ ընդդիմադիր ուժերի ու գործիչների հետ:

Նշենք, որ ընտրական գործընթացների նկատմամբ քաղաքացիների վստահության բարձրացման համար խորհրդարանական ընդդիմությունը, ի դեմս ԲՀԿ, ՕԵԿ և ՀԱԿ խմբակցությունների, իշխանությունների հետ երեք հիմնական միջոցառումների շուրջ ձեռք է բերել պայմանավորվածություններ: Դրանք են` քաղաքացիների միասնական քվեարկությունը ID քարտերով, քվեարկողների 10 մատների մատնահետքերը վերցնելը և ընդդիմադիրի ներկայացուցիչների համար քվեարկած քաղաքացիների ցուցակի հասանելիոթյունը 20 րոպեների ընթացքում: Ինչպես տեղեկացրել է Լևոն Զուրաբյանը, ձեռք բերված պայմանավորվածություններին հասնելու համար արդեն հավաքվել է 12 մլն. եվրո, որի 3 մլն.եվրոն կտրամադրի կառավարոթյունը, իսկ մնացածը` դոնորները: Մեխանիզմների լիակատար իրականցման համար պակասում է 5 մլն.եվրո: Սակայն, ըստ Զուրաբյանի, իրականացման գործընթացն արդեն կարելի է արդեն սկսել նաև եղած միջոցներով: