«Թեղուտ» ՓԲԸ հուլիսի 14-ին հանդիպում կկազմակերպի Թեղու­տի շահագրգիռ հանրության ներկայացուցիչների հետ

«Թեղուտ» փակ բաժնետիրական ընկերությունը  2016 թվականի հուլիսի 14-ին, ժամը 18:00-ին ՀՀ Լոռու մար­­զի Շնող գյու­ղի Մշակույթի տան դահլիճում կազմակերպում է հանդիպում Թեղու­տի լեռնա­հարս­տա­ցու­ցիչ կոմբինատի շինարարության և պղինձ-մոլիբ­դե­նա­յին հանքա­վայ­րի շա­հա­գործ­ման ծրագրի շահագրգիռ հանրության ներկայացուցիչների հետ:

Ինչպես ԱրմԻնֆո գործակալությանը տեղեկացվել է Ընկերության մամուլի առայությունից, հանդիպմանը հրավիրվում են մասնակցելու ՀՀ Լոռու մարզի Թեղուտ և Շնող համայնքների ղեկավարները, գյուղապետարանների աշխատողներ և մշտական ու ժամանակավոր ազգաբնակչության այլ ներ­կայացուցիչներ, Ընկերության աշխատողներ, hայաստանյան և միջազգային բնապահպանական հասարակական կազմակերպությունների, բնապահպանության ոլորտի գիտահետազոտական հաստատությունների ներկայացուցիչներ, բնապահպանության մասնագետներ, հասարա­կա­կան ակտիվիստներ, զանգվածային լրատվության միջոցների, պատմության և մշակույթի հուշարձանների ուսումնասիրության և պահպանության ոլորտում գործունեություն ծավալող մասնագիտացված կազմակերպությունների ներկայացուցիչներ, ՀՀ Լոռու մարզպետարանի ներկայացուցիչներ, ընկե­րության հնարավոր աշխատողներ, Հայ Առաքելական Եկեղեցու ներկայացուցիչներ, հարակից համայնք­ներում գործունեություն իրականացնող տնտեսվարողներ, Ծրագրի իրականացման տարածքում հայտնված անշարժ գույքի միավորների նախկին սեփականատերերը և փաստացի օգտագործողները:

Հանդիպումն անցկացվելու է բաց ձևաչափով, և դրան կարող են մասնակցել նաև Շահառուների այլ խմբերի ներկայացուցիչներ:

Աղբյուրի համաձայն, ընկերության՝ ք. Երևան, Խանջյան 19 հասցեով և Լոռու մարզի Թեղուտ գյուղում գտնվող գրա­սենյակներում, Լոռու մարզի Ալավերդի քաղաքի քաղաքապետարանում, Թեղուտ և Շնող գյու­ղերի գյուղապետարաններում 2016թ. հունիսի 30-ից հուլիսի 30-ը կբացվեն գրան­ցա­մա­տյաններ, որոնցում շահա­ռուները կարող են գրառել մեկ­­նա­բա­նու­թյուններ, առա­ջար­կու­թյուն­նե­ր, նկատառումներ և այլ հաղորդագրություն­ներ՝ հան­դիպման օրա­կարգում ներառված հար­ցե­րի վերաբերյալ:

Օրակարգում ներառ­ված հարցերի վերաբերյալ հա­ղոր­­դագրություններ այդ ժամանակահատվածում կարելի է ուղարկել նաև էլ. փոստով՝ [email protected] հասցեով:

Հանդիպման օրակարգում հետևյալ հարցերն են. Թեղուտի լեռնահանքային համալիրի բնապահպանական անվտանգությունը, 2016թ. առաջին կիսամյակում իրականացված բնապահպանական միջոցառումները, Ընկերության կադրային քաղաքականությունը և

այլ հարցեր:

Նշենք, որ «Թեղուտ» ՓԲԸ հիմնվել է 2006 թվականին «Վալլեքս» խմբի կողմից: Թեղուտի ծրագիրը հաստատվել է 2007 թվականի նոյեմբերին: Թեղուտի հանքավայրը երկրորդն է հանրապետությունում Քաջարանից հանքավայրից հետո: 1991 թվականի տվյալներով, հանքավայրի պահուստները կազմում են 450 մլն.տոննա հանքանյութ, այդ թվում, 0.355% պարունակությամբ 1.6 մլն.տոննա պղինձ և 0.022% պարունակությամբ 99 հազար տոննա մոլիբդեն: Ծրագրի իրականացման առաջին փուլում նախատեսվում է տարեկան արդյունահանել 7 մլն.տոննա հանքանյութ: Միջինացված ցուցանիշներով, արտադրության առաջին 10 տարիներին տարեկան կարտադրվի 64 հազար տոննա պղնձի խտանյութ, 0.31% պարունակությամբ և մոտ 760 տոննա մոլիբդենի խտանյութ, մինչև 50% պարունակությամբ: Առաջին փուլում ներդրումների ծավալը կկազմի 350 մլն.դոլար:

Ինչպես ավելի վաղ լրագրողներին հայտնել էր Թեղուտի նախագիծն իրականացնող` «Վալեքս» ընկերությունների խմբի նախագահ Վալերի Մեժլումյանը, պղնձի և մոլիբդենի խտանյութերը հիմնականում կարտահանվեն Եվրոպա: Նա հատուկ ուշադրություն է հրավիրել այն փաստին, Թեղուտի նախագծում ներդրվել են նորագույն տեխնոլոգիաներ: Ինչ վերաբերվում է ընկերության բնապահպանական ծրագրերին, ապա նշվել է ծառատունկի ծրագիրը, որի համաձայն, հատման ենթակա 375 հա անտառի փոխարեն կտնկվի 714 հա նոր անտառ: «Թեղուտ» ՓԲԸ-ն հատուկ ուշադրություն է դարձնում նաև Թեղուտի տարածքում գտնվող պատմա-մշակութային հուշարձանների պահպանմանը: