Ամենայն հայոց կաթողիկոս Գարեգին Բ-ն պետք է հոգևոր խորհուրդ գումարի և կարգալույծ անի Պոլսոյ պատրիարքական ընդհանուր փոխանորդ Արամ արքեպիսկոպոս Աթեշյանին, արգելելով նրա մուտքը Հայաստան, քանի որ նա հակահայ գործունեություն է վարում: Հունիսի 9-ին մամուլի ասուլիսում այդպիսի կարծիք է հայտնել տարածաշրջանային խնդիրների գծով վերլուծաբան, Արցախյան պատերազմի հերոս Սարգիս Հացպանյանը:
Նրա ասելով, Աթեշյանն իր գործունեության ողջ ընթացքում ձեռնարկել է քայլեր, որոնք վրդովմունք են հարուցել Թուրքիայի հայ համայնքի շրջանում: Այդ համատեքստում վերլուծաբանն անպատկառություն և ցինիզմ է որակել փոխանորդի նամակը Ռեջեփ Էրդողանին` Գերմանիայի Բունդեսթագի որոշման առնչությամբ: «Իրականում նրան ոչինչ չի սպառնում, պարզապես, Աթեշյանը փորձում է պահել իշխանությունը և ավելի երկար մնալ փոխանորդի պաշտոնում, ինչի առնչությամբ սիրաշահում է Թուրքիայի իշխանություններին», - հայտարարել է փորձագետը:
Հացպանյանը նաև նշել է, որ ժամանակ առ ժամանակ թուրքական մամուլում տեղեկատվություն է հայտնվում Պոլսոյ պատրիարքական ընդհանուր փոխանորդի կողմից Ստամբուլի էլիտար շրջաններում ձեռք բերված անշարժ գույքի, ինչպես նաև նացիստական քաղաքական ուժերի հետ նրա կապերի մասին: «Բացի այդ, նա հակահայ գործունեություն է վարում, չի մկրտում հայերին, եկեղեցական արարողություններ չի անցկացնում, հետևաբար, պատրիարքությունն աստիճանաբար կորցնում է ազդեցությունը», - նշել է նա: Ընդ որում վերլուծաբանը Թուրքիայի հայ համայնքին կոչ է արել ամեն ինչ անել, որպեսզի Աթեշյանն ազատի իր «զավթած պաշտոնը», և սեղմ ժամկետում ընտրվի Կոստանդնուպոլսի թեմի նոր պատրիարք:
Ինչպես արդեն հաղորդվել է, Թուրքիայի նախագահ Ռեջեփ Թայիփ Էրդողանին հղած իր նամակում Պոլսո հայոց պատրիարքության ընդհանուր փոխանորդ Արամ արքեպիսկոպոս Աթեշյանը դատապարտել է Գերմանիայի Բունդեսթագի` Հայոց ցեղասպանությունը ճանաչելու որոշումը: ՙՀարգելի նախագահ, Առաջին համաշխարհային պատերազմի ողբերգական շրջանում տեղի ունեցած իրադարձությունների մասին Գերմանիայի հանրապետության Ազգային ժողովի ընդունած որոշումը մեր ժողովրդի շրջանում խոր վիշտ է առաջացրել։ Սրտից բխող և անկեղծ զգացմունքներով Ձերդ գերազանցությանը տեղեկացնում ենք, որ Թուրքիայի հայկական համայնքը կիսում է այս վիշտը: Այս համատեքստում նշենք, որ Գերմանիայի քաղաքացիների քվեներով ձևավորված խորհրդարանը բացի իրեն ձայն տված ժողովրդի հանգստության, բարգավաճման, անվտանգության, խաղաղության և բարեկեցության համար օրենքներ ընդունելու պարտականությունից, իր իրավասությունների մեջ չմտնող հարցի շուրջ տեսակետ է արտահայտում, դա օրինականացնում է և այս ամենն անում է ամբողջ գերմանացի ազգի անունից՝ իրեն որպես դատավոր տեսնելով։ Գերմանիայի նման սխալ վերաբերմունքն անընդունելի է։ Ընդունված այս օրենքը և նույնաբնույթ այլ օրենքներ մեզ խորապես վիրավորում են։ Ցավոք հայ ազգի պատմության էջերի ցավը միջազգային քաղաքական հարթակում Թուրքիային և թուրք ազգին մեղադրելու և պատժելու համար որպես գործիք է ընկալվում և այս տգեղ ընկալումը պատճառ է դառնում Թուրքիայի հայերի ինքնության և ենթաինքնության վնասվելուն՚, - գրել է Արամ արք.Աթեշյանը:
Ավելի ուշ Մայր աթոռ Սուրբ Էջմիածնի տեղեկատվական համակարգի տնօրեն տեր Վահրամ քահանա Մելիքյանը չի բացառել, որ Աթեշյանի նամակը գրվել է ճնշման ներքո: ՙԵս չեմ արդարացնում ոչ մեկին, սակայն պետք է հաշվի առնել, թե ինչ երկրում և ինչպիսի պայմաններում են նրանք ապրում՚,- ընդգծել է նա:
Հիշեցնենք, որ ՀԱԵ Կոստանդնուպոլսի պատրիարքի պաշտոնը 1998 թվականից զբաղեցնում էր Մերսոպ արք. Մութաֆյանը: Սակայն վիրահատությունների և մահափորձերի հետևանքով 53-ամյա պատրիարքի ինքնազգացողությունը վատթարացել էր, ավելի ուշ բժիշկներն ախտորոշեցին անբուժելի ամնեզիա: 2004 թվականից Թուրքիայի ղեկավարությունը հայ համայնքին թույլ չի տալիս նոր պատրիարքի կամ նրա աթոռակցի ընտրություն անցկացնել (Թուրքիայի օրենքների համաձայն, ազգային համայնքի ղեկավարը պետք է լինի նաև հոգևոր առաջնորդ):