Շավարշ Քոչարյան. Ես կողմ եմ տարածաշրջանում բոլոր հակամարտող կողմերի համար զենքի ամբողջական էմբարգոյին

Մինսկի խմբի համանախագահների միջնորդությամբ բանակցությունները շարունակելու համար անհրաժեշտ է ամրապնդել զինադադարի ռեժիմը: Երբ շարունակում են կրակոցները, հնարավոր չէ բանակցել: Այդ մասին ավստրիական «Die Presse՚ օրաթերթին հարցազրույցում հայտարարել է ԱԳ նախարարի տեղակալ Շավարշ Քոչարյանը:

Պատասխանելով այն հարցին, թե ինչու չի պահպանվում զինադադարը, փոխարտգործնախարարը հիշեցրել է, որ զինադադարը հաստատված է 1994թ. կնքված զինադադարի մասին եռակողմ (Լեռնային ‎Ղարաբաղ, ‎Հայաստան, ‎Ադրբեջան) պայմանագրով:

ՙՉնայած պարբերաբար խախտումներին՝ այն առ այսօր գործում է: Ապրիլի 2-ին Ադրբեջանը խախտեց այդ պայմանագիրը՝ ծավալելով ռազմական գործողություններ: Ապրիլի 5-ին՝ համաձայն բանավոր պայմանավորվածության, վերականգնվեց 1994թ. պայմանագրի գործողությունը: Ադրբեջանը փորձում է տապալել Մինսկի գործընթացը: Այժմ կարևոր է, որ զինադադարի ռեժիմն ամրապնդվի: Մեզ մոտ զինվորները ապրիլի 5-ից հետո էլ են զոհվել՚,- հայտարարել է Քոչարյանը: Այն դիտարկմանը, որ նույնը Բաքվում են ասում՝ ԱԳ նախարարի տեղակալը նշել է. ՙՉեմ կարող դա բացառել, քանի որ Լեռնային Ղարաբաղի բանակը ստիպված է պատասխանի կրակոցներին՚:

Պատասխանելով այն հարցին, թե ինչո՞ւ իրավիճակը սրվեց հենց այս ժամանակ՝ Քոչարյանը հայտարարել է, որ դա Բաքվին ուղղվելիք հարց է: ՙՏարբեր պատճառներ կարող են լինել: Բաքվի քաղաքականությունն է՝ այս հակամարտությունը բռնի ճանապարհով լուծել: Ակնհայտորեն, խաբկանք ունեին՝ բլիցկրիգ իրականացնելու: Դա չհաջողվեց: Երկրում մեծ դժգոհություն կա՝ կապված կոռումպացված ռեժիմի հետ: Պատերազմի միջոցով կարելի է ուշադրությունը շեղել՚,- համոզված է դիվանագետը:

Միաժամանակ փոխարտգործնախարարի խոսքով, պատերազմը վտանգ է բոլորիս համար՝ թե՛ հայերի, թե՛ ադրբեջանցիների: ՙԻրենք ցույց տվեցին, որ իրենք այդ պայմանավորվածություններին չեն հետևում: Երբ խոսքը գնում է զինտեխնիկային, պետք է նշել, որ, այո՛, Բաքուն սպառազինվելու չեմպիոն է դարձել: Բայց դա չօգնեց իրեն ծրագրված բլիցկրիգն իրականացնելու հարցում՚,- ասել է նա:

Ըստ որում, Քոչարյանը գտնում է, որ միջազգային միջնորդները պետք է Բաքվի հարձակումները հստակ դատապարտեն, այլևս չի կարելի աչք փակել:

ՙԲաքուն ամբողջ ընթացքում պահանջում է վերադարձնել «գրավյալե տարածքները, սակայն լռում է այն մասին, որ նաև կան Լեռնային Ղարաբաղի շրջաններ, որոնք գտնվում են ադրբեջանական հսկողության տակ: Մադրիդյան սկզբունքներում խոսվում է Ղարաբաղի ինքնորոշման և Ադրբեջանի տարածքային ամբողջականության մասին՝ այստեղ փոխզիջման հնարավորություն կա:

Միակողմանի փոխզիջում չի լինելու: Անհրաժեշտ է գիտակցել, որ կան հարցեր, որոնք Հայաստանի իրավասության մեջ չեն գտնվում: Երևանը չի կարող ասել՝ մենք պատրաստ ենք հանձնել տարածքներ, այն դեպքում, երբ դա վերաբերում է Լեռնային Ղարաբաղին: Երևանը չի կարող Լեռնային Ղարաբաղի կարգավիճակի մասին որոշում կայացնել: Դա իրենք [ԼՂ-ն] պետք է որոշեն: Մենք չենք ճանաչում Լեռնային Ղարաբաղը, որպեսզի պահպանվի բանակցային գործընթացը՚,- նշել է ՀՀ փոխարտգործնախարարը:

Խոսելով Հայաստանի կողմից Արցախի ճանաչման շուրջ քննարկումների մասին՝ Քոչարյանը նշել է. ՙԻնչպես հայտարարել է նախագահ Սերժ Սարգսյանը, եթե Ադրբեջանը լայնամասշտաբ ագրեսիա ծավալի, դա կհանգեցնի Հայաստանի կողմից Լեռնային Ղարաբաղի Հանրապետության ճանաչմանը՚:

Պատասխանելով այն հարցին, թե արդյոք Մոսկվան Երևանի դաշնակիցն է՝ Քոչարյանը հիշեցրել է, որ  Ռուսաստանը միջնորդ է հակամարտության մեջ, նա պետք է հավասարակշռվածությունը պահպանի:

ՙՊայմանագրերի համաձայն՝ Մոսկվան Հայաստանի նկատմամբ պարտավորություններ ունի: Սակայն Ռուսաստանը նաև շատ սերտ տնտեսական կապեր ունի Բաքվի հետ: Նա մեր դաշնակիցն է, սակայն նաև իր սեփական շահերն ունի՝ Ադրբեջանի հետ կապված: Հարավային Կովկասում՝ իր շահերի գոտում, նա միշտ հակված է լինելու բալանսը պահելուն՚,- գտնում է  դիվանագետը:

Անդրադառնալով ռուսական սպառազինության վաճառքին՝ Քոչարյանը նշել է, որ հայկական կողմը շարունակաբար բարձրաձայնում է այդ հարցը, այդ թվում՝ մեր նախագահի մակարդակով:

ՙՄենք հասկանում ենք՝ ինչ է տեղի ունենում, և մենք ունենք բոլոր հիմքերը՝ դժգոհ լինելու: Ռուսաստանն ասում է, որ եթե ինքը այն չվաճառի, դա կանի մեկ ուրիշը: Ես կողմ եմ տարածաշրջանում բոլոր հակամարտող կողմերի համար զենքի ամբողջական էմբարգոյին: Մինսկի խմբի երեք համանախագահ երկրները՝ ԱՄՆ-ն, Ռուսաստանը և Ֆրանսիան, կարող են հասնել դրան ՄԱԿ ԱԽ-ում: Դա ճիշտ կլիներ՚,- ամփոփել է Քոչարյանը: