
ԱրմԻնֆո. Ընդդիմությունը մտադիր չէ նահանջել Հայաստանի նոր Սահմանադրության հարցում իր դիրքորոշումից, դեմ է Ադրբեջանի նախագահ Իլհամ Ալիևի պահանջով Հիմնական օրենքում ցանկացած փոփոխության և պատրաստ է դիմակայել իր նկատմամբ գործադրվող ճնշմանը։ Այս մասին խորհրդարանում լրագրողների հետ ճեպազրույցում հայտարարել է «Ուժեղ Հայաստան» խորհրդարանական խմբակցության քարտուղար Տիգրան Աբրահամյանը։
Նա վստահեցրել է, որ այս հարցում իրենց դիրքորոշումը մնում է անփոփոխ։ «Ինչ վերաբերում է իշխանությունների՝ հանրաքվեի միջոցով Հայաստանի ժողովրդի կարծիքը պարզելու մտադրությանը, ապա քաղաքացիներն արդեն արտահայտել են իրենց դիրքորոշումը 2026 թվականի հունիսի 7-ի խորհրդարանական ընտրություններում՝ չնայած ընտրական գործընթացի ընթացքում տեղ գտած խախտումներին և ճնշումներին։ Փաշինյանին չհաջողվեց ստանալ սահմանադրական մեծամասնություն և հավաքել 50% + 1 ձայն, մինչդեռ ընդդիմությունը, ընդհակառակը, 80%-ով ավելացրեց ստացած ձայների քանակը», - հայտարարել է Աբրահամյանը։
Խորհրդարանական խմբակցության քարտուղարը նշել է, որ այդպիսով ժողովուրդը ընդդիմությանը մանդատ է տվել հանդես գալու «ալիևյան Սահմանադրության» դեմ։ Նա նաև մեկնաբանել է այն պնդումները, թե սա հնարավորություն է Փաշինյանին իշխանությունից հեռացնելու համար։ «Փաշինյանն այսպես թե այնպես հեռացվելու է իշխանությունից։ Մենք ներկայացրել ենք ճանապարհային քարտեզ և ինստիտուցիոնալ պայքարի շրջանակներում հետևողականորեն շարժվում ենք այդ ճանապարհով։ Բացի այդ, մենք ասել ենք, որ լինելու է փողոցային պայքար՝ մեկ և հաղթական։ Միևնույն ժամանակ, որքան շուտ Փաշինյանը հեռանա, այնքան լավ Հայաստանի համար», - նշել է քաղաքական գործիչը։
Նրա խոսքով՝ ընդդիմությունը, ի տարբերություն Հայաստանի վարչապետի, առաջարկում է խաղաղություն՝ առանց զիջումների։ «Իսկ Փաշինյանը շատ բան էր խոստացել հայ ժողովրդին։ 2018 թվականից նա խաղաղություն է խոստանում, սակայն այդ ընթացքում երկիրն անցել է երեք պատերազմի միջով։ Նա բարեկեցություն էր խոստացել, բայց այսօր մենք բախվում ենք աղքատության սպառնալիք պարունակող մակարդակի», - ուշադրություն է հրավիրել Աբրահամյանը։
Հարցին, թե արդյոք նոր Սահմանադրության ընդունման նպատակով արտահերթ խորհրդարանական ընտրությունների անցկացումը չի կարող հանգեցնել Փաշինյանի դիրքերի հետագա ամրապնդմանը, Աբրահամյանը նշել է, որ դիտարկվող միտումը հակառակն է վկայում. յուրաքանչյուր ընտրության հետ Հայաստանի վարչապետը կորցնում է ձայներ, մինչդեռ ընդդիմության աջակցությունն աճում է։ «Մենք հայտարարել ենք արտահերթ ընտրություններին մեր պատրաստակամության մասին և վստահ ենք, որ դրանց անցկացման դեպքում ընդդիմությունը կամրապնդի իր դիրքերը։ Սակայն չեմ կարծում, որ նրանք կգնան այդ քայլին՝ հաշվի առնելով, որ վերջին շրջանում այս տարբերակի մասին ավելի ու ավելի հազվադեպ է խոսվում», - նկատել է ընդդիմադիրը։
Նա նաև քննադատել է իշխանությունների՝ ընդդիմության հետ փոխգործակցության ոճը՝ նշելով, որ այն անընդունելի է։ «Այդպես չի կարելի խոսել «Ուժեղ Հայաստան» կուսակցության առաջնորդ Սամվել Կարապետյանի և նրա քաղաքական ուժի հետ։ Մենք ներկայացրել ենք մեր ուղին, իսկ մեր գործողություններով արդեն ցույց ենք տվել, որ չենք վախենում ճնշումից և պատրաստ ենք դրան դիմակայել», - ամփոփել է Աբրահամյանը։
Նշենք, որ նոյեմբերի 19-ին Փաշինյանն ընդդիմությանը գործարք է առաջարկել՝ «հեռանալ», եթե խորհրդարանական ընդդիմությունը չխոչընդոտի նոր Սահմանադրության նախագիծը պլեբիսցիտի դնելուն։
Հիշեցնենք, որ 2026 թվականի մարտի 12-ին Հայաստանի վարչապետ Նիկոլ Փաշինյանը հայտարարել էր, որ Հայաստանի նոր Սահմանադրության նախաբանում չպետք է հղում լինի Անկախության հռչակագրին։ Իր դիրքորոշումը նա բացատրել էր նախևառաջ նրանով, որ «գործող Անկախության հռչակագիրը կառուցված է հակամարտության տրամաբանության վրա»։ Հատկանշական է, որ Անկախության հռչակագրի բացառումը Բաքվի՝ Երևանին ներկայացվող պայմաններից մեկն է խաղաղության պայմանագրի ստորագրման համար։ Անկախ փորձագետները հակված են կարծելու, որ Հայաստանի իշխանությունները, նախաձեռնելով սահմանադրական փոփոխություններ, կատարում են Բաքվի հերթական պահանջը։
Նշենք, որ Հայաստանում 2026 թվականի հունիսի 7-ին կայացած հերթական խորհրդարանական ընտրությունների արդյունքներով «Քաղաքացիական պայմանագիր» կուսակցությունն ունի 3/5 մեծամասնություն, որը թույլ է տալիս ընդունել սահմանադրական օրենքներ և նշանակումներ կատարել պաշտոններում, սակայն կուսակցությունը չունի ձայների 2/3 մեծամասնություն, որն անհրաժեշտ է Հայաստանի Սահմանադրությունում ուղղակի փոփոխություններ կատարելու համար։ Ավելացնենք, որ Սահմանադրությունը փոխելու պահանջը հաճախակի սկսեց հնչել Արցախը օկուպացնելուց հետո։ Բաքվում հայտարարում են, թե դրանում տարածքային պահանջներ են պարունակվում Ադրբեջանի նկատմամբ։ Այս և այլ պահանջների կատարումը ադրբեջանական կողմը ներկայացնում է որպես «խաղաղության պայմանագրի» կնքման նախապայման։