


ԱրմԻնֆո. «Մայր Հայաստան» կուսակցության առաջնորդ Անդրանիկ Թևանյանի պահվող բանտախուց է տեղափոխվել հոգեկան խանգարումներով անձ։ Այս մասին քաղաքական ուժը հայտնում է իր՝ Facebook-ի էջում։
"Անդրանիկ Թևանյանի նկատմամբ ճնշումը շարունակվում է. նրա բանտախուց է տեղափոխվել հոգեկան խանգարումներով անձ։ Ի նշան բողոքի՝ ժամը 15:00-ին ցույց ենք կազմակերպելու Արդարադատության նախարարության շենքի դիմաց",
- ասվում է «Մայր Հայաստան»-ի հաղորդագրության մեջ։
Հիշեցնենք, որ մայիսի 21-ին Հայաստանի քննչական կոմիտեն (ՔԿ) հայտնել էր Անդրանիկ Թևանյանի նկատմամբ «պետական դավաճանության և լրտեսության» փաստով քրեական գործ հարուցելու մասին։ Թևանյանին մեղադրում են օտարերկրյա պետությանը պետական գաղտնիք պարունակող տեղեկություններ 622 հազար դոլարի դիմաց փոխանցելու մեջ։ Իսկ մայիսի 24-ի գիշերը դատարանի որոշմամբ Թևանյանը կալանավորվել էր երկու ամիս ժամկետով։ Ընդ որում, Թևանյանի փաստաբան Արամ Օրբելյանի խոսքով՝ այդ օրերին նրա պաշտպանյալին կալանավորելու համար իրավական որևէ հիմք չի եղել։ Ավելացնենք, որ ընդդիմադիր գործչի ձերբակալությունը տեղի է ունեցել Հայաստանի գործող վարչապետ Նիկոլ Փաշինյանի անմիջական ցուցումով։ Ինքը՝ Թևանյանը, քննության այս պնդումները անհեթեթ է անվանել՝ նշելով, որ պատգամավորական մանդատից հրաժարվել է դեռևս 2023 թվականին, հետևաբար ՔԿ-ի նման պնդումները որևէ հիմք չունեն։ Օգոստոսի 18-ին գործով քննությունն ավարտվել է, և նյութերն ուղարկվել են դատարան, սակայն և՛ Թևանյանը, և՛ Մանուկյանը շարունակում էին մնալ կալանավորված։ Սեպտեմբերի 8-ին «Մայր Հայաստան» կուսակցության առաջնորդի կալանքը երկարաձգվել է 3 ամսով։


