
Արմինֆո. Այս պահին Հայաստանի քրեակատարողական հիմնարկներում (ՔԿՀ-ներում) գտնվում է 3276 քաղաքացի, որոնցից միայն 1552-ի, այսինքն, շուրջ 48 տոկոսի նկատմամբ է դատավճիռ կայացվել: Այդ մասին խորհրդարանում լսումների ժամանակ հայտարարել է ԱԺ "Հայաստան" խմբակցության պատգամավոր, ԱԺ մարդու իրավունքների և հանրային հարցերի հանձնաժողովի նախագահ Լիլիթ Գալստյանը ՝ ներկայացնելով երկրում տիրող ընդհանուր իրավիճակը։
Նա ուշադրություն է հրավիրել այն հանգամանքին, որ սա եվրոպական երկրների և տարածաշրջանի ամենաբարձր ցուցանիշն է, որը վկայում է, որ Հայաստանում կալանքը վերածվել է մարդկային արժանապատվությունը նվաստացնելու, քաղաքական ընդդիմախոսներին պատժելու և կյանքից զրկելու ռեպրեսիվ գործիքի: "Դատարանը բավարարում է կալանավորման մասին միջնորդությունների 61 տոկոսը, և հարյուրավոր քաղաքացիներ 4-5 տարի և նույնիսկ ավելին անազատության մեջ են ՝ չունենալով դատավճիռ։
Բանտերի անմարդկային պայմաններում դա կյանքի և ազատության սահմանադրական իրավունքի խախտում է։ Հայաստանի բանտերում նաև արձանագրվել է բժշկական օգնության անբավարար մակարդակ, անթույլատրելի կենցաղային պայմաններ: Մինչդեռ, ինքնավնասման, ինքնասպանության, մահվան դեպքերը քննության առարկա չեն դառնում։ Այսպես, 2025 թվականին բանտերում արձանագրվել է 24 մահ, 8 ինքնասպանություն։ Այս տարի մահվան դեպքերն արդեն 4-ն են։ Սա ոչ թե, պարզապես, վիճակագրություն է, այլ՝ մարդու կյանքի իրավունքի խախտում, որը պետության պարտականությունն է", - ընդգծել է պատգամավորը։
Խոսելով երկրում ժողովրդավարության ճգնաժամի մասին՝ մարդու իրավունքների հանձնաժողովի նախագահն ուշադրություն է հրավիրել երկրում քաղբանտարկյալների մեծ թվի վրա: "2021 թվականից ի վեր քաղաքական և իրավական ճնշումների են ենթարկվել ՏԻՄ ընտրությունների գրեթե բոլոր ընդդիմադիր մասնակիցները, 0այդ թվում ՝ Քաջարանի, Գորիսի, Մեղրիի, Վարդենիսի, Գյումրիի, Ստեփանավանի, Վանաձորի թեկնածուները։ Ինչ-որ մեկը դրա համար վճարել է, նույնիսկ, սեփական կյանքով, իսկ ոմանք հայտնվել են ճաղերի հետևում՝ ընտանիքի անդամների հետ միասին ։ "Ուժեղ Հայաստան"-ից Ստեփանավանի ղեկավարի թեկնածու Արսեն Գևորգյանի մահվան պատասխանատվությունը, ինչպես նախորդ մահերի դեպքում, ամբողջությամբ այս իշխանության վրա է", - ընդգծել է ընդդիմադիրը։
Բացի այդ, նա հիշեցրել է կալանքի տակ գտնվող ընդդիմադիր ուժերի չորս առաջնորդների ՝ Ռոբերտ Քոչարյանի, Գագիկ Ծառուկյանի, Սամվել Կարապետյանի և Անդրանիկ Թևանյանի մասին, նշելով, որ նրանց նկատմամբ դատավարությունները որևէ աղերս չունեն արդարադատության հետ: "Սա ոչ այլ ինչ է, քան քաղաքական վրեժխնդրություն և երկրում վախի մթնոլորտ ստեղծելու փորձ։ Ավելին, թիրախ են դառնում նաև նրանք, ովքեր, պարզապես, չեն կիսում գործող իշխանության տեսակետները, ինչը հանգեցնում է պաշտոնանկությունների, վարչական և տնտեսական ճնշումների, քրեական հետապնդման, խուզարկությունների և ձերբակալությունների: Այսպես, ուսումնական հաստատությունների աշխատակիցների թիվը, ովքեր աշխատանքից ազատվել են այս իշխանությանը չաջակցելու համար, արդեն գերազանցում է մի քանի տասնյակը։ Այս ամենը ցույց է տալիս, որ այսօր Հայաստանում խարխլված են սահմանադրականության, իրավական և ժողովրդավարական պետության անվտանգության հիմքերը։ Բայց վստահ եմ, որ մենք ունենք կամք և ռեսուրս ՝ երկրում սահմանադրական կարգը վերականգնելու համար", - եզրափակել է Գալստյանը։