Կրեմլ․ ՀԱՊԿ-ը պատշաճ կերպով կարձագանքի իր աշխատանքներին Հայաստանի  չմասնակցելուն

Արմինֆո.ՀԱՊԿ-ը պատշաճ կերպով կարձագանքի իր աշխատանքներին Հայաստանի չմասնակցելուն: Այդ մասին լրագրողներին հայտարարել է Ռուսաստանի նախագահի մամուլի քարտուղար Դմիտրի Պեսկովը:

"Փաշինյանը բազմիցս կրկնել է, որ Հայաստանը կորցրել է հետաքրքրությունը ՀԱՊԿ-ին մասնակցելու հարցում",- հիշեցրել է Պեսկովը Հայաստանի վարչապետի խոսքերի մասին: "Մենք չգիտենք, թե ինչ է սպասում Փաշինյանը, բայց այն, որ Հայաստանը չի մասնակցում ՀԱՊԿ աշխատանքներին, դա ակնհայտ է։ Եվ ՀԱՊԿ-ը, համապատասխանաբար, կարձագանքի դրան", - հավելել է նա ՝ մեկնաբանելով Երեւանի կողմից կազմակերպությունից դուրս գալու չսկսված գործընթացը։

"Այն ամենը, ինչ գրված է կանոնադրության մեջ, կարող է գործարկվել անդամ երկրների որոշմամբ։ Եվ նախարարը նույնպես երեկ պարզաբանել է, թե հատկապես ինչ է գրված կանոնադրության մեջ", - մեկնաբանել է Պեսկովը ՌԴ ԱԳ նախարար Սերգեյ Լավրովի խոսքերն այն մասին, որ ՀԱՊԿ անդամ երկրները Հայաստանին չեն  "վռնդելու", փոխանցում է ՏԱՍՍ-ը։

Նշենք, որ Մոսկվայում աշխատանքն է սկսում ՀԱՊԿ Հավաքական անվտանգության խորհրդի նստաշրջանը: Հայաստանը որևէ մակարդակով հանդիպմանը չի մասնակցում։ Ավելի վաղ ՀԱՊԿ գլխավոր քարտուղարը չէր բացառել Հայաստանին ձայնից զրկելը կազմակերպությունում՝ անդամավճարները չվճարելու պատճառով։

Հիշեցնենք, որ 2022 թվականի վերջից Հայաստանը բոյկոտում է ՀԱՊԿ շրջանակներում անցկացվող միջոցառումները։ 2024 թվականի փետրվարին ՀՀ վարչապետ Նիկոլ Փաշինյանը հայտարարել էր, որ Հայաստանը, գործնականում, սառեցրել է իր մասնակցությունը ՀԱՊԿ-ին, քանի որ կազմակերպությունը չի կատարել իր պարտավորությունները ՀՀ հանդեպ, ինչը չէր կարող անհետևանք մնալ։ Իսկ արդեն 2024 թվականի սեպտեմբերի 18-ին Հայկական երկրորդ համաշխարհային գագաթնաժողովում Փաշինյանը հայտարարել էր, որ ՀԱՊԿ-ը սպառնալիքներ է ստեղծում Հայաստանի անվտանգության, նրա հետագա գոյության, ինքնիշխանության և պետականության համար։