ՀՀ գլխավոր դատախազությունից հաղորդել են Ազգային ժողովում ծեծկռտուքի փաստի առթիվ քրեական վարույթ նախաձեռնելու մասին

Արմինֆո.2026 թվականի հոկտեմբերի 29-ին ՀՀ Ազգային ժողովի շենքում պատգամավորների միջև տեղի ունեցած ծեծկռտուքի փաստի առթիվ նախաձեռնվել է քրեական վարույթ: Այդ մասին ԱրմԻնֆո գործակալությանը հաղորդել են ՀՀ գլխավոր դատախազության մամուլի ծառայությունից:

Գերատեսչությունից հաղորդել են, որ վարույթը նախաձեռնվել է ՀՀ քրեական օրենսգրքի 297-րդ հոդվածի 2-րդ մասի 1-ին կետով (խուլիգանություն, որը կատարվել է մի խումբ անձանց կողմից) և 452-րդ հոդվածի 3-րդ մասով (պաշտոնատար անձի կամ նրա մերձավորի նկատմամբ բռնություն գործադրելը ՝ նրա օրինական ծառայողական կամ քաղաքական գործունեությանը միջամտելու նպատակով): Գերատեսչությունում այլ մանրամասներ չեն հաղորդել։

Նշենք, որ հոկտեմբերի 29-ին ԱԺ-ում "Քաղաքացիական պայմանագիր" խմբակցության պատգամավոր Տարոն Չախոյանի ՝ "Ուժեղ Հայաստան" խմբակցության ղեկավար Նարեկ Կարապետյանի ընտանիքի հասցեին հնչեցրած վիրավորական արտահայտություններից հետո լեզվակռիվ էր սկսվել, որը վերածվել էր պատգամավորների միջև ծեծկռտուքի: Իրավիճակի սրման ֆոնին ԱԺ նախագահ Ռուբեն Ռուբինյանը ընդմիջում չէր հայտարարել, այլ միայն հորդորել էր պատգամավորներին կողմնորոշվել ՝ պատրաստվում են շարունակել ծեծկռտուքը, թե նստելու են իրենց տեղերում: Սակայն լարվածությունը ոչ միայն չէր նվազել, այլև ավելի էր սրվել։ ԱԺ նախագահը ստիպված էր եղել կանչել Պետական պահպանության ծառայության ներկայացուցիչներին, որպեսզի հանդարտեցնեն ժողովրդի ծառաներին։ Հակամարտությունը շարունակվել էր խորհրդարանի միջանցքում։ Իրավապահները ստիպված էին եղել պատ կազմել իշխող ուժի և ընդդիմության պատգամավորների միջև՝ նրանց հանդարտեցնելու համար։ Ծեծկռտուքի հետևանքով վնասվել էր նիստերի դահլիճում գտնվող պետական գույքը։