ՌԴ ԱԳՆ․ Փաշինյանը կրկին դիմել է բանավոր լարախաղացության

Արմինֆո.Երեւանը դեռ ունի ՀԱՊԿ-ին լիարժեք մասնակցությանը վերադառնալու հնարավորություն, բայց հարկադրաբար ոչ ոք մտադիր չէ իր գործընկերներին պահել կազմակերպությունում։ Այդ մասին նոյեմբերի 5-ին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

"Ամեն դեպքում, Երևանը դեռ հնարավորություն ունի վերադառնալ ՀԱՊԿ-ին լիարժեք մասնակցությանը ։ Բայց, փաստորեն, կազմակերպությունում ոչ ոք մտադիր չէ գործընկերներին բռնի ուժով պահել", - ընդգծել Է դիվանագետը։

Նա նշել է, որ ՀԱՊԿ-ից Հայաստանի դուրս գալու հնարավորության համատեքստում նկատվում են արևմտյան երկրների՝  "տարածաշրջան մտնելու" փորձեր՝ ռազմական շինարարության և կառավարման իրենց ստանդարտներով: Այդ երկրները չեն կարող և չեն էլ պատրաստվում ապահովել տարածաշրջանի կայունությունը։

Զախարովայի ասելով՝ Երեւանը նոյեմբերի 9-ին Մոսկվայում ԱՊՀ մասնակից պետությունների անվտանգության խորհուրդների քարտուղարների խորհրդակցության ժամանակ դիրքորոշումը ճշտելու հնարավորություն ունի:

Զախարովան մեկնաբանել է նաև ՀՀ վարչապետ Նիկոլ Փաշինյանի հայտարարությունները Եվրասիական տնտեսական միությանը Հայաստանի անդամակցության և ԵՄ անդամակցության հայտ ներկայացնելու ձգտման վերաբերյալ: Դիվանագետը նշել է, որ Հայաստանի իշխանությունները պետք է իմանան իրենց ժողովրդի կարծիքն այդ մասին։ "Իհարկե, լսեցինք բառային լարախաղացության հերթական դրսեւորումը, ՀՀ վարչապետ Նիկոլ Փաշինյանի հերթական հերյուրանքները ԵԱՏՄ-ի և ԵՄ-ի միջև ընտրության մասին ։ Ոչ մի նոր բան: Կան, երևի, նոր դարձվածներ, բայց նորից ժողովրդավարական ձևակերպումներ, սեփական բնակչության մոլորեցում, և ոչ մի հստակություն", - նշել է նա։

Զախարովայի խոսքով ՝ Մոսկվայի համար նախկինի պես անհասկանալի է պաշտոնական Երևանի մտքերի ընթացքը։ "Չէ որ, նույնիսկ, ամենասովորական առօրյա տրամաբանությունը խոսում է այն մասին, որ, նախ, պետք է կարծիք հարցնել սեփական բնակչությունից, իսկ հետո ինչ-որ գործողություններ ձեռնարկել, այլ ոչ թե՝ հակառակը", - արձանագրել է Զախարովան:

Նշենք, որ ավելի վաղ ՀՀ վարչապետ Նիկոլ Փաշինյանը կառավարությունում տեղի ունեցած ճեպազրույցի ժամանակ, ի պատասխան ՀԱՊԿ գլխավոր քարտուղար Թաալաթբեկ Մասադիկովի այն հայտարարությունը մեկնաբանելու խնդրանքին, թե նոյեմբերի 11-ին ՀԱՊԿ-ը կարող է քննարկել Հայաստանի նկատմամբ կազմակերպության կանոնադրության 25-րդ հոդվածի կիրառման հարցը, հայտարարել էր, որ "ՀԱՊԿ-ի նկատմամբ Հայաստանի հետաքրքրությունը սպառվել է":