Մի քանի տասնյակ քաղաքացիներ են հավաքվել դատարանի մոտ, որտեղ քննարկվում է Գագիկ Ծառուկյանի նկատմամբ խափանման միջոցի հարցը

Արմինֆո.Մի քանի տասնյակ քաղաքացիներ են հավաքվել  դատարանի շենքի մոտ, որտեղ  քննարկվում է խարդախության, դրամաշորթության և փողերի լվացման գործով անցնող "Բարգավաճ Հայաստան" կուսակցության առաջնորդ Գագիկ Ծառուկյանի նկատմամբ խափանման միջոցի հարցը:

Այդ առնչությամբ դատարանի շենքի մոտ ոստիկանական մեծ ուժեր են բերվել։ Մեղադրող կողմը միջնորդել է 3 ամսով երկարաձգել Գագիկ Ծառուկյանի կալանքը, հիմնավորելով, որ այլընտրանքային խափանման միջոցները չեն կարող ապահովել Քրեական դատավարության օրենսգրքի պահանջները:

Լրագրողների հետ զրույցում քաղաքական գործիչ, ԲՀԿ անդամ Արման Աբովյանը նշել է, որ իրենք ակնկալում են գործով արդարացի որոշում: "Այն գործը, որի շրջանակներում կալանավորվել է Գագիկ Ծառուկյանը և ապօրինի պահվում է կալանքի տակ, ամբողջովին փլուզվել է։ Չկա որևէ պատճառ, որի հետեւանքով Ծառուկյանը պետք է մնա կալանքի տակ։ Եվ, կրկնեմ,  Գագիկ Ծառուկյանի ազատության հարցը ոչ միայն նրա անձնական խնդիրն է, այլ, առաջին հերթին, Հայաստանի՝ որպես ժողովրդավարական պետության կենսունակության խնդիրը", - հայտարարել է Աբովյանը։

Հիշեցնենք, որ քննությունը Գագիկ Ծառուկյանին մեղսագրում է Քրեական օրենսգրքի մի շարք հոդվածներով նախատեսված արարքներ, որոնք վերաբերում են խարդախությանը, շորթմանը և փողերի լվացմանը: Այդ գործով անցնում են նաև "Մուլտի Գրուպ" կոնցեռնի ղեկավար Սեդրակ Առուստամյանը և էլի 7 անձ: Քննչական կոմիտեն գտնում է, որ Ծառուկյանը և այլ անձինք կեղծել են մաքսային հայտարարագրեր և փաստաթղթեր, ինչի արդյունքում պետությանը կամ ներգրավված կառույցներին պատճառվել է խոշոր վնաս (ներառյալ մոտ 8.1 մլրդ դրամի գույքի հափշտակության դրվագներ): 2026 թվականի հուլիսի 7-ին Երևանի դատարանը 2 ամսով կալանավորել է Գագիկ Ծառուկյանին։ Քաղաքական գործչի պաշտպանական կողմը փորձել է բողոքարկել այդ որոշումը։ 2026 թվականի հոկտեմբերին Հայաստանի Հարկադիր կատարման ծառայությունը Հակակոռուպցիոն դատարանի որոշումների հիման վրա լայնածավալ արգելանք է դրել Ծառուկյանի հետ կապված գույքի և ակտիվների վրա։ Արգելանքի տակ է շուրջ 29 անշարժ գույքի օբյեկտ, 33 տրանսպորտային միջոց, ինչպես նաև 488 միավոր շարժական գույք: Սեփականատերերի փոփոխության առանձին արգելք է սահմանվել Ծառուկյանի ՝ Սեւանա լճի ափամերձ գոտում գտնվող օբյեկտների նկատմամբ։ Արգելանք է դրվել նաև Ծառուկյանի 27 տարբեր ընկերություններում ունեցած բաժնեմասերի, ինչպես նաև նրա հետ փոխկապակցված 40 իրավաբանական անձանց բաժնեմասերի և բաժնետոմսերի վրա: