Հայաստանի Գիտությունների ազգային ակադեմիան և Չինաստանի Հյուսիս-արևմտյան պոլիտեխնիկական համալսարանը համագործակցության մասին հուշագիր են ստորագրել

Արմինֆո. Հայաստանի Գիտությունների ազգային ակադեմիայի և Չինաստանի Հյուսիս-արևմտյան պոլիտեխնիկական համալսարանի միջև ստորագրվել է համագործակցության մասին հուշագիր:

Ինչպես հաղորդում է ՀՀ ԳԱԱ մամլո ծառայությունը, փաստաթուղթը ստորագրվել է Չինաստանի Սիան քաղաքում՝ Գիտությունների ակադեմիաների միջազգային ասոցիացիայի (ԳԱՄԱ/МААН) խորհրդի 39-րդ նիստը հարթակներում։ Նիստին մասնակցել են  13 երկրի 21 կազմակերպությունների ավելի քան 200 առաջատար գիտնականներ և ակադեմիական կառույցների ղեկավարներ։

Նիստի ընթացքում ԳԱՄԱ-ի կազմը համալրվել է չինական երկու խոշոր կառույցներով՝ Հենան նահանգի Գիտությունների ակադեմիայով և Հյուսիսարևմտյան պոլիտեխնիկական համալսարանով: Որպես համատեղ հետազոտությունների գերակայություն են սահմանվել արհեստական բանականությունը, նոր նյութերի (այդ թվում՝ գրաֆենի) մշակումը, վերականգնվող էներգետիկան, կենսատեխնոլոգիաները և էկոլոգիան:

Նիստի շրջանակում ՀՀ Գիտությունների ազգային ակադեմիան ներկայացրել է Հայաստանի ԳԱԱ ԱՊՀ երկրների հետ համագործակցության հարցերով փորձագետ Գևորգ Վարդանյանը: Նա մասնակցել է գիտատեխնիկական համագործակցության արդիական խնդիրների քննարկմանը, ինչպես նաեւ ԳԱՄԱ Երիտասարդ գիտնականների խորհրդի նիստի աշխատանքներին՝ որպես խորհրդի համանախագահ։ Նա հանդես է եկել «ՀՀ գիտությունների ազգային ակադեմիայի երիտասարդական գիտական քաղաքականության իրականացման փորձի և Երիտասարդ գիտնականների խորհրդի գործունեության մասին» զեկուցմամբ՝ ներկայացնելով Հայաստանում երիտասարդ գիտնականների աջակցությանն ուղղված հաջողված փորձն ու ՀՀ ԳԱԱ ձեռքբերումները:

Գևորգ Վարդանյանը մասնակցել է նաև «Գլոբալ Հարավի ականավոր գիտնականների համաժողովի» աշխատանքներին, որին ներկա էր շուրջ 500 ներկայացուցիչ աշխարհի 24 երկրից: Համաժողովի շրջանակում ստորագրվել է համագործակցության հուշագիր ՀՀ Գիտությունների ազգային ակադեմիայի և Չինաստանի Հյուսիսարևմտյան պոլիտեխնիկական համալսարանի միջև:

Հուշագրի հիմնական նպատակներն են. համատեղ գիտական ու կրթական նախագծերի կյանքի կոչում; գիտահետազոտական համագործակցության արդյունքների համատեղ կիրառում և օգտագործում; մասնագետների որակավորման բարձրացմանն ուղղված համատեղ ծրագրերի մշակում; ստեղծարար տեխնոլոգիաների և հեռավար ուսուցման ոլորտներում պիլոտային նախագծերի իրականացում ու փորձարարական գոտիների ստեղծում; փոխադարձ հետաքրքրություն ներկայացնող տեղեկատվական նյութերի փոխանակում; ուսանողների, դասախոսների և գիտնականների ակադեմիական ու գիտական փոխանակման ծրագրերի իրականացում; երկու կառույցների աշխատակիցների ներգրավում համատեղ հետազոտություններում, սիմպոզիումներում և գիտական սեմինարներում:

«Միջազգային այս հարթակներում ՀՀ ԳԱԱ ակտիվ մասնակցությունն ու ձեռք բերված պայմանավորվածությունները նոր հնարավորություններ են ստեղծում հայ-չինական գիտական համագործակցության ընդլայնման և հայ գիտնականների՝ միջազգային հետազոտական ծրագրերում ներգրավվածության խորացման համար», - հայտարարել են ԳԱԱ մամուլի ծառայությունում։