Անվանի դաշնակահար Դմիտրի Մասլեևն իր առաջին մենահամերգով հանդես կգա Հայաստանում

Արմինֆո.Պ.Ի. Չայկովսկու անվան 15-րդ միջազգային մրցույթի հաղթող, համաշխարհային ճանաչում ունեցող դաշնակահար Դմիտրի Մասլեևը Հայաստան է վերադառնում իր առաջին մենահամերգով, որն իրականացվում է Primavera Foundation բարեգործական հիմնադրամի և Հայաստանի պետական ֆիլհարմոնիայի հետ համագործակցությամբ:

Շրջագայության ամբողջ ծրագիրը նվիրված կլինի մեծ կոմպոզիտոր Սերգեյ Ռախմանինովի գլուխգործոցներին։ Նախատեսված են նաև վարպետության դասեր, իսկ հայ երաժիշտներին բացառիկ հնարավորություն կընձեռվի հանդես գալ մաեստրոյի հետ նվագակցությամբ՝ կատարելով հայկական ստեղծագործություն:

Մասլեևի առաջիկա համերգային ծրագիրը Հայաստանում կընդգրկի ինչպես մայրաքաղաք Երևանը, այնպես էլ երկրի մարզերը: Ընդ որում, Վարդենիսում և Կապանում համերգների մուտքն անվճար է լինելու, ինչն ընդգծում է նախագծի սոցիալական և կրթական կարևոր առաքելությունը:

Մասնավորապես, նոյեմբերի 17-ին Մասլեևը ելույթ կունենա Վարդենիսի թիվ 1 երաժշտական դպրոցում (մուտքն ազատ է), նոյեմբերի 19-ին UWC Dilijan քոլեջում (Դիլիջան), նոյեմբերի 21-ին Առնո Բաբաջանյանի անվան համերգասրահում (Երևան) և նոյեմբերի 23-ին՝ Կապանի արվեստի պետական քոլեջի Երգեհոնային սրահում (մուտքն ազատ է):

Դմիտրի Մասլեևը հայ երիտասարդ երաժիշտներին բացառիկ հնարավորություն է ընձեռում համերգների ժամանակ նրա հետ դուետով հանդես գալու' կատարելով հայ կոմպոզիտորներից մեկի ստեղծագործությունը: Մասլեևն ընտրություն կկատարի նախապես հայտ ներկայացրած երաժիշտների շրջանում։ Մասնակիցը պարտադիր պետք է լինի Հայաստանի Հանրապետության քաղաքացի, Երևանի Կոմիտասի անվան պետական կոնսերվատորիայի (կամ նրա Գյումրու մասնաճյուղի) ուսանող կամ շրջանավարտ կամ Primavera Foundation բարեգործական հիմնադրամի ծրագրերի մասնակից:

Նոյեմբերի 22-ին ժամը 10: 00-13: 00 Առնո Բաբաջանյանի անվան համերգասրահում Դմիտրի Մասլեևը կանցկացնի դաշնամուրի վարպետության դասեր: Վարպետության դասերի մասնակցության և դուետի ընտրության հայտերը հասանելի են Primavera Foundation բարեգործական հիմնադրամի պաշտոնական կայքում ՝ primavera - foundation.am.

Հատկանշական է, որ Մասլեևի կապը Հայաստանի հետ դուրս է գալիս համերգային ծրագրերի շրջանակներից ։ Լինելով "Պրիմավերա" (Primavera Foundation of Armenia) հիմնադրամի դաշնամուրային բաժնի ղեկավար ՝ դաշնակահարը երկրում ծավալում է լուսավորչական և մանկավարժական ակտիվ գործունեություն: Նա պարբերաբար անվճար վարպետության դասեր է անցկացնում հայ պատանի և տաղանդավոր կատարողների համար՝ անգնահատելի ներդրում ունենալով տեղի դաշնամուրային դպրոցի զարգացման և երաժիշտների նոր սերնդին աջակցելու գործում։

Խոսելով առաջիկա շրջագայության և Հայաստանում իր աշխատանքի մասին ՝ Դմիտրի Մասլեևը նշել է. "Յուրաքանչյուր այց Հայաստան ինձ համար յուրահատուկ իրադարձություն և ոգեշնչում է: Ազգային ֆիլհարմոնիկ նվագախմբի, մաեստրո Էդուարդ Թոփչյանի և "Պրիմավերա" հիմնադրամի հետ համագործակցության տարիների ընթացքում այս երկիրն ինձ համար իսկապես հարազատ է դարձել։ Հիմնադրամում մանկավարժական աշխատանքի շրջանակներում պարբերաբար շփվում եմ երիտասարդ հայ դաշնակահարների հետ և ամեն անգամ զարմանում նրանց խորը երաժշտականության և արվեստի հանդեպ անկեղծ կրքի վրա: Այդ իսկ պատճառով ինձ համար այդքան կարևոր է ոչ միայն համերգներ տալ մայրաքաղաքում, այլև մեկնել մարզեր, կիսվել փորձով և դասական երաժշտությունը հասանելի դարձնել բոլորին ։ Ռախմանինովին նվիրված իմ առաջին մենահամերգը, ինչպես նաև վարպետության դասերը և տեղական տաղանդների հետ համատեղ ելույթները իմ երախտագիտությունն են Հայաստանին և նրա անհավանական հանդիսատեսին»:

Ինչպես ասվում է Ազգային ֆիլհարմոնիկ նվագախմբի մամուլի ծառայության հաղորդագրությունում,  Դմիտրի Մասլեևը երաժիշտ է, ով արժանացել է աշխարհի առաջատար բեմերի և քննադատների ճանաչմանը նուրբ տեխնիկայի, անթերի ճաշակի և կատարման բանաստեղծական խորության համար: Հայ հանդիսատեսի համար նրա անունն արդեն վաղուց դարձել է բարձրագույն կատարողական արվեստի խորհրդանիշ ։ Դաշնակահարը բազմիցս այցելել է Հայաստան ՝ որպես մենակատար հանդես գալով Հայաստանի ազգային ֆիլհարմոնիկ նվագախմբի հետ՝ մաեստրո Էդուարդ Թոփչյանի ղեկավարությամբ: