Շիրակի մարզպետին պաշտոնանկ անելու հիմք չեմ տեսնում. վարչապետ

ԱրմԻնֆո. Շիրակի մարզպետին պաշտոնանկ անելու հիմքեր չեմ տեսնում։ Այս մասին հոկտեմբերի 29-ին լրագրողների հետ ճեպազրույցի ընթացքում հայտարարել է Հայաստանի վարչապետ Նիկոլ Փաշինյանը։

<Անկեղծ ասած՝ ես շատ չեմ խորացել մանրամասների մեջ, չգիտեմ՝ ինչ է նա հայտարարել, բայց ամեն դեպքում պետք է հնարավորինս ճիշտ և զգույշ լինել իր արտահայտություններում։ Եթե նա իրեն թույլ է տվել ինչ-որ անզգույշ բան, ես շատ ափսոսում եմ և հույս ունեմ, որ ամեն ինչ կկարգավորվի>, - նշել է վարչապետը։

Հիշեցնենք, որ Շիրակի մարզպետ Դավիթ Առուշանյանը Facebook-ի իր էջում զայրացած գրառում էր արել՝ կապված Սամվել Կարապետյանի «Ուժեղ Հայաստան» կուսակցության կողմից Գյումրու օրվա առթիվ տոնական միջոցառումների կազմակերպման հետ։ «Մի քանի տեսախցիկ, մի քանի մտահոգ դեմքեր, մի քանի բարձրագոչ արտահայտություններ «մեր Գյումրու» մասին, և ահա պատրաստ է հերթական քաղաքական ներկայացումը։ Մնում է միայն հանդիսատես գտնել։ Բայց այստեղ կա մի փոքր անհարմարություն. Գյումրին ձեր «Ներքին Թաբորը» չէ, իսկ գյումրեցիները՝ ձեր «Իվանները» չեն», - գրել էր Առուշանյանը։ Որպես հետգրություն նա ավելացրել էր. «Մենք հյուրընկալ ժողովուրդ ենք, մեր հյուրերը մեզ համար ամեն ինչից վեր են։ Բայց մի փորձեք մեր գլխից վեր ցատկել՝ բարձրությունից ընկնելը ցավոտ է։ Շրջիկ արտիստներ, զգույշ եղեք»։

Նման արտահայտության կապակցությամբ Հայաստանում ՌԴ դեսպանությունը հանդես էր եկել հետևյալ հայտարարությամբ. "Չէի ցանկանա մտածել, որ տարածաշրջանը ղեկավարող պաշտոնատար անձը, որտեղ ծառայություն են իրականացնում 102-րդ ռուսական ռազմակայանը և ռուս սահմանապահները, թույլատրելի է համարում հրապարակային արտահայտություններ, որոնք կարող են ռուսների նկատմամբ ազգային ատելություն հրահրել, ինչը հիմնովին կհակասեր մեր երկրների ժողովուրդների միջև դարավոր բարեկամության ոգուն>։

Հայաստանում Ռուսաստանի դեսպանությունում նաև զուգահեռներ էին անցկացրել Շիրակի մարզպետ Դավիթ Առուշանյանի՝ ինչ-որ «իվանների» մասին հայտարարությունների և Հայրենական մեծ պատերազմի տարիների գերմանացի նացիստների բառապաշարի միջև։