Նարեկ Կարապետյան. Հայաստանի սահմանն այսօր անարգել կարող է հատել ինչպես ադրբեջանցի հովիվը, այնպես էլ՝ զինվորականը, եւ դա խնդիր է

Արմինֆո. Այսօր Հայաստանի սահմանն անարգել կարող է հատել ինչպես ադրբեջանցի հովիվը, այնպես էլ ադրբեջանցի զինծառայողը, ինչը խոսում է պետական սահմաններին անվտանգության պատշաճ միջոցառումների բացակայության մասին: Այս մասին հոկտեմբերի 23-ին հայտարարել է "Ուժեղ Հայաստան" խմբակցության ղեկավար Նարեկ Կարապետյանը՝ Ստեփանավանում նախընտրական քարոզարշավի ժամանակ լրագրողների հետ զրույցում։

Նա հստակեցրել է, որ լուրջ խնդիրներ չի տեսնում կոնկրետ ադրբեջանցի հովվի կողմից Հայաստանի սահմանը հատելու հարցում: Խնդիրը, նրա խոսքով, բոլորովին այլ է։ "Հովիվը հատել է սահմանը և նրան հետ են վերադարձրել. այստեղ մենք ոչ մի խնդիր չենք տեսնում։ Ինչ վերաբերում է ադրբեջանցի զինծառայողին, ապա նա, իհարկե, ահաբեկիչ է, և նրան չպետք է արտահանձնեն։ Եվ դա չի լինի: Մենք մեզանից կախված ամեն ինչ անելու ենք, որ դա տեղի չունենա։ Ինչ վերաբերում է հովվին, նորից կրկնեմ, ես այստեղ խնդիր չեմ տեսնում։ Տարօրինակ է այլ բան. ստացվում է, որ հովիվը կարող է հատել մեր սահմանը, ադրբեջանցի ահաբեկիչն էլ կարող է դա անել ։ Ստացվում է, որ այսքան տարիների ընթացքում նրանք այդպես էլ չեն կարողացել սահմանին տեսախցիկներ տեղադրել, որոնք այսօր կան ամբողջ Հայաստանում։ Թե՞ դրանք միայն ընդդիմության համար են", - հռետորական հարց է ուղղել Կարապետյանը։

Նրա ասելով՝ այս իրավիճակը խոսում է այն մասին, որ Հայաստանի պաշտպանական գերատեսչության ղեկավարը պետք է լինի ռազմական գործիչ, որը հասկանում է այդ ոլորտը։ "Հենց այդպես են կառուցում պետությունը՝ պրոֆեսիոնալների օգնությամբ։ Գործող իշխանությունը, մինչդեռ, նման մասնագետներ չի կարողանում գտնել, դրա համար էլ այսօր մենք հայտնվել ենք նման իրավիճակում ։ Բանն այն է, որ ոչ ոք, պարզապես, չի ուզում նրանց հետ աշխատել", - եզրափակել է խմբակցության ղեկավարը։

Հիշեցնենք, որ հոկտեմբերի 21-ին հայկական ԶԼՄ-ներում տեղեկություն էր տարածվել, որ ադրբեջանցի հովիվը Հայաստանի տարածք է անցել սպիտակ դրոշով: Նշվում էր, որ նա հոգեկան բնույթի խնդիրներ ունի։ Դեպքը տեղի է ունեցել Տավուշի մարզում։ Հոկտեմբերի 22-ին Հայաստանի Ազգային անվտանգության ծառայությունը հաստատել է ադրբեջանցի հովվի ՝ Հայաստանի տարածք անցնելու փաստը:

Հավելենք, որ 2026 թվականի հոկտեմբերի սկզբին Հայաստանի տարածքում ձերբակալվել էր Ադրբեջանի զինված ուժերի զինծառայող Նասիմի Մուսաևը։ 2026թ. հոկտեմբերի 1-ին՝ ժամը 14:15-ի սահմաններում, Սյունիքի մարզի Շաքի գյուղում զինծառայողը մուտք էր գործել բնակելի տուն, կրակ բացել և ոտքից վիրավորել այդ գյուղի 38-ամյա բնակչուհուն, ինչպես նաև վնաս պատճառել նրա երեխաներին: Նույն օրը Հայաստանի իրավապահ մարմինները ձերբակալել էին Նասիմի Մուսաևին: Նրա նկատմամբ որպես խափանման միջոց է ընտրվել կալանավորումը ՝ 2 ամիս ժամկետով: ՀՀ քննչական կոմիտեում հարուցվել է քրեական գործ ։ Նրան մեղադրում են սահմանն ապօրինի հատելու, զենքի մաքսանենգության և ապօրինի շրջանառության, բնակարանի անձեռնմխելիության խախտման, ինչպես նաև առողջությանը ծանր վնաս պատճառելու համար: