Սամվել Կարապետյան. իրական ընդդիմադիր ուժերին միավորելու քայլեր կձեռնարկվեն, որից հետո կսկսվի պայքար միասնական ճակատով

Արմինֆո.Այն մասին, որ ադրբեջանցի զինվորները կարող են մուտք գործել հանրապետության տարածք, "Ուժեղ Հայաստան" դաշինքը զգուշացրել էր նախընտրական շրջանում։ Այդ մասին հոկտեմբերի 9-ին դատարանի դիմաց լրագրողներին հայտարարել է դաշինքի առաջնորդ Սամվել Կարապետյանը՝ անդրադառնալով Շաքի գյուղում տեղի ունեցած միջադեպին։

Սամվել Կարապետյանի խոսքով՝ ադրբեջանցի զինվորի ներթափանցումը Հայաստանի տարածքի խորքերը միայն առաջին քայլն է: Եթե համապատասխան հակահարված չլինի, ինչպես կարծում է քաղաքական գործիչն ու գործարարը, նման միջադեպերը կշարունակվեն, ընդ որում՝ շատ ավելի մեծ եռանդով։ "Ցանկանում եմ իմ աջակցությունը հայտնել մեր հերոս հայ կնոջը, ով այլևս հույսը չդնելով Նիկոլ Փաշինյանի կառավարության վրա, ինքն՝ անձամբ, պաշտպանել է իր զավակներին, իր ընտանիքին: Մենք անպայման մեր ձևով կաջակցենք այդ կնոջ ընտանիքին", - նշել է Սամվել Կարապետյանը։

Նա հավելել է, որ հանցագործություն կատարած անձը պետք է պատասխան տա օրենքի ողջ խստությամբ: Հետագայում նրան պետք է փոխանակել հայ ռազմագերիների հետ։ Ի դեպ, քաղաքական գործիչը չի բացառել, որ Հայաստանում կգտնվի շարադրություններ գրելու սիրահար (ԱԺ նախագահ Ռուբեն Ռուբինյանը-խմբ.), ով կհորինի հերթական հեքիաթը, և հանցագործին կվերադարձնեն Ադրբեջանին: "Ճիշտ այնպես, ինչպես շարադրություններով ու թելադրություններով հանձնեցին Արցախը", - ասել է Սամվել Կարապետյանը, հավելելով, որ երկու շաբաթից դաշինքը կներկայացնի իր նախաձեռնությունները ՝ ուղղված երկրի առջև ծառացած խնդիրների լուծմանը: Իրական ընդդիմադիր ուժերի միավորելու ուղղությամբ քայլեր կձեռնարկվեն, որից հետո պայքարը կսկսվի միասնական ճակատով։

Անդրադառնալով ՀՀ վարչապետ Նիկոլ Փաշինյանի այն պնդումներին, թե Հայաստանը կարող է խնդրի առաջ կանգնել, եթե հանկարծ պարզվի, որ հայ զինվոր է մոլորվել եւ հայտնվել սահմանակից տարածքում, Կարապետյանը հարց է ուղղել, թե այդ ընթացքում որտեղ են գտնվելու պաշտպանության նախարարն ու գեներալները: "Թող ճիշտ կազմակերպեն ծառայությունը, որպեսզի զինվորները մնան սեփական տարածքում։ Բացի այդ, բոլորս էլ գիտենք, որ Փաշինյանն Ալիևի կամակատարն է։ Ալիևն ինչ-որ բան է ասում, և Փաշինյանը դրանով փորձում է վախեցնել ընդդիմությանը։ Երբ մենք սկսենք միավորման գործընթացը, ես դիմելու եմ կառավարող "Քաղաքացիական պայմանագիր" կուսակցության ներկայացուցիչներին՝ կոչ անելով  միանալ մեզ։ Առավել ևս, որ նրանք վերածվել են Փաշինյանի կամակատարների։ Ես երբեմն ցավ եմ ապրում, որ նրանցից ոմանք, լինելով բավականին պարկեշտ մարդիկ, շարունակում են մնալ Փաշինյանի կամակատարը", - ասել է Սամվել Կարապետյանը։

Նա նաև նշել է գործող իշխանության կողմից ընտրողների ձայների գողությունը։ Տվյալ դեպքում խոսքը, նույնիսկ, "Բարգավաճ Հայաստան" կուսակցության ձայները գողանալու մասին չէ, այլ՝ հենց "Ուժեղ Հայաստան" դաշինքի։ Եթե չլիներ այդ փաստը, շատ ընդդիմադիր գործիչներ կմնային ազատության մեջ։ "Հայաստանում կա միայն մեկ մարդ, ով իր թիմով երկիրը մշտապես տանում է դեպի աղետալի և պարտվողական պատերազմներ։ Այդ մարդուն հեռացնելով՝ բոլորը կմոռանան պատերազմների մասին", - նշել է Սամվել Կարապետյանը։

Հիշեցնենք, որ հոկտեմբերի 1-ին Սյունիքի մարզի Շաքի գյուղում միջադեպ էր տեղի ունեցել Ադրբեջանի ԶՈՒ զինծառայողի մասնակցությամբ։ Ադրբեջանական բանակի զինծառայող Նասիմի Մուսաևը հատել էր հայ-ադրբեջանական սահմանը և մոտ 10 կմ խորացել Հայաստանի տարածքում՝ մինչև Շաքի գյուղ: Գյուղում նա մտել էր տեղի բնակչուհի Անի Ավետիսյանի տուն, կրակ բացել՝ նրան պատճառելով հրազենային վնասվածքներ։ Կինը, պաշտպանելով իր երեխաներին, կարողացել էր դանակով վիրավորել ադրբեջանցուն։ Մուսաևը հայտնաբերվել և ձերբակալվել էր։ Հոկտեմբերի 2-ին նրա նկատմամբ քրեական գործ է հարուցվել, և նա երկու ամսով կալանավորվել է։ ՀՀ վարչապետ Նիկոլ Փաշինյանը տեղի ունեցածը որակել է որպես շարքային քրեական հանցագործություն և հայտարարել, որ քննությունը և պատժի կրումը պետք է տեղի ունենան Հայաստանում: Խորհրդարանական ընդդիմությունը խստորեն քննադատել է իշխանություններին՝ միջադեպը որակելով որպես սահմանների ծայրահեղ անապահովության վկայություն և խափանված "խաղաղության պատրանք":