"Ուժեղ Հայաստան". ՀՀ իշխանությունները փորձում են Շաքիում ադրբեջանցի զինվորականի հանցագործությունը հավասարեցնել սովորական քրեական հանցագործության

Արմինֆո.Հայաստանի իշխանությունների կողմից փորձ է արվում Շաքի գյուղում ադրբեջանցի զինծառայողի կատարած հանցագործությունը հավասարեցնել սովորական քրեական հանցագործության: Այդ մասին հոկտեմբերի 8-ին լրագրողների հետ ճեպազրույցում հայտարարել է "Ուժեղ Հայաստան" խմբակցության պատգամավոր Իրինա Յոլյանը։

Այսինքն, ինչպես պարզաբանել է պատգամավորը, թշնամու գործողությունները հավասարեցվում են այն գործողություններին, որոնք կարող են տեղի ունենալ Հայաստանի ներսում ։ "Մինչ օրս, նույնիսկ, հետաքննություն չի իրականացվում, որը թույլ տար պարզել՝ տեղի ունեցածը դիվերսիա էր, թե՝ դասալիքի գործողություն", - հավելել է Յոլյանը:

Նա նաև ուշադրություն է հրավիրել այն հանգամանքի վրա, որ սա առաջին նման դեպքը չէ Սյունիքի մարզում ։ Մասնավորապես, Յոլյանը հիշեցրել է 2024 թվականին Հայաստանի տարածք ներթափանցած ադրբեջանցի զինծառայողների կողմից Զանգեզուրի պղնձամոլիբդենային կոմբինատի (ԶՊՄԿ) պահակի սպանության մասին։ "Արդեն այդ դեպքը պետք է Հայաստանի իշխանությունների համար զգոնության բարձրացման ազդակ դառնար։ Սակայն իշխանությունները ձախողել են Հայաստանի քաղաքացիների անվտանգության ապահովման եւ պետական սահմանների անձեռնմխելիության պաշտպանության ողջ գործընթացը", - ընդգծել Է ընդդիմադիրը։

Իր հերթին՝ "Ուժեղ Հայաստան" խմբակցության քարտուղար Տիգրան Աբրահամյանը հայտարարել է, որ հոկտեմբերի 7-ին ԱԺ հարցուպատասխանի ժամանակ իրենք տեսել են, թե ինչպես է վարչապետ Նիկոլ Փաշինյանն իր հարցուպատասխանով փորձում ամեն կերպ պաշտպանել և արդարացնել ադրբեջանցի զինծառայողին, ով ներխուժել է Հայաստանի Հանրապետության տարածք և կրակ բացել հայ ընտանիքի անդամների վրա: "Բայց, ըստ էության, վերջում մեզ հաջողվեց հասնել այն բանին, որ Փաշինյանն ընդունեց, որ այդ զինծառայողին հայկական օրենսդրությամբ քրեական պատասխանատվության ենթարկելու դեպքում ինքը մտադիր չէ նրան հանձնել Ադրբեջանին", - նշել է Աբրահամյանը:

Արձագանքելով "Քաղաքացիական պայմանագիր" խմբակցության պատգամավորների այն հայտարարությանը, թե Շաքիում տեղի ունեցածը սովորական հանցագործություն է, որը ցանկացած օր կարող է տեղի ունենալ սահմանին, Աբրահամյանը ափսոսանք է հայտնել իշխող խմբակցության ներկայացուցիչների նման դիրքորոշման համար: "Կառավարող խմբակցության պատգամավորների համար այդ միջադեպն, ընդամենը, սովորական հանցագործություն է։ Եթե այս դիրքորոշմանը համաձայն են շատերը, ապա ես, պարզապես, ավելացնելու ոչինչ չունեմ", - ամփոփել է պատգամավորը։

Հիշեցնենք, որ 2026 թվականի հոկտեմբերի սկզբին Հայաստանի տարածքում ձերբակալվել էր Ադրբեջանի զինված ուժերի զինծառայող Նասիմի Մուսաևը, ով, Ադրբեջանի զինվորական դատախազության տվյալներով, 2026 թվականի սեպտեմբերի 26-ին ինքնակամ լքել է ծառայության վայրը։ Սեպտեմբերի 29-ին Ադրբեջանի Պետական անվտանգության ծառայությունը Հայաստանի Ազգային անվտանգության ծառայությանը (ԱԱԾ) տեղեկացրել էր զինվորի անհետացման և սահմանը հատելու հնարավորության մասին: 2026թ.հոկտեմբերի 1-ին Սյունիքի մարզի Շաքի գյուղում զինծառայողը մուտք էր գործել բնակելի տուն, կրակ բացել և ոտքից վիրավորել տեղի 38-ամյա բնակչուհուն, ինչպես նաև վնաս պատճառել նրա երեխաներին: Այս պահին նրան սպասվում են մի քանի վիրահատություններ ՝ ստացած վնասվածքների բարդության ֆոնին ։ Նույն օրը Հայաստանի իրավապահ մարմինները ձերբակալել էին Նասիմի Մուսաևին: Նրա նկատմամբ որպես խափանման միջոց է ընտրվել կալանավորումը ՝ 2 ամիս ժամկետով: ՀՀ քննչական կոմիտեում հարուցվել է քրեական գործ ։ Նրան մեղադրում են սահմանն ապօրինի հատելու, մաքսանենգության և զենքի ապօրինի շրջանառության, բնակարանի անձեռնմխելիության խախտման, ինչպես նաև առողջությանը ծանր վնաս պատճառելու մեջ: ՀՀ վարչապետ Նիկոլ Փաշինյանը պաշտոնից ազատել է ԱԱԾ տնօրենի տեղակալ Դավիթ Սանամյանին:

Հավելենք, որ հոկտեմբերի 6-ին Փաշինյանը "Ինֆոկոմ"-ի հետ հարցազրույցում բացառել էր ադրբեջանցի հանցագործի փոխանակումը Բաքվում պահվող հայ գերիների հետ: Նրա ասելով՝ ադրբեջանական կողմի հետ պայմանավորվածություն կա սահմանը հատած զինվորականների վերադարձի վերաբերյալ։ Ինչպես պարզաբանել է Փաշինյանը, "եթե վաղը հայ զինծառայողը հայտնվի Ադրբեջանի տարածքում, ապա նրա փոխարեն հանձնելու համրա ոչ ոք չի լինի": Ընդ որում, Հայաստանի վարչապետը հավաստիացրել է, որ ադրբեջանցի զինծառայողը պատասխանատվության կենթարկվի Հայաստանի օրենսդրությանը համապատասխան: