Չալաբյան. Հայաստանի տարածք ներթափանցած ադրբեջանցի զինծառայողը պետք է կանգնի դատարանի առաջ և պատիժ կրի՝ օրենքի ողջ խստությամբ

Արմինֆո. Հայաստանի տարածք ներթափանցած ադրբեջանցի զինծառայողը պետք է կանգնի հայկական դատարանի առջև և պատիժ կրի՝ օրենքի ողջ խստությամբ: Այդ մասին հոկտեմբերի 2-ին Երեւանում կայացած մամլո ասուլիսում հայտարարել է "Հայաքվե" շարժման համակարգող Ավետիք Չալաբյանը։

Նա կոչ է արել ուշադրություն դարձնել այն հանգամանքին, որ երկրի իշխանություններն, ըստ էության, մի քանի օր տեղյակ են եղել նրա՝ Հայաստանի տարածք հնարավոր ներթափանցման մասին ։ "Ընդ որում, նա ձերբակալվել է ոչ թե Հայաստանի Ազգային անվտանգության ծառայության կողմից, այլ Շաքի գյուղի բնակիչների կողմից՝ նրանցից մեկին վնասելուց հետո։ Սա ցույց է տալիս, թե որքան բախտի քմահաճույքին է թողնված մեր երկրի անվտանգության համակարգը ։ Իսկ տվյալ դեպքում՝ Սյունիքի։ Իշխող խումբը մշտապես շոուներ է կազմակերպում, վստահեցնում, թե, իբր, անվտանգության նոր միջավայր է ստեղծում, բայց, արդյունքում, պարզվում է, որ ադրբեջանցի ժամկետային զինծառայողը կարող է զենքով հատել պետական սահմանը, մի քանի օր թափառել Հայաստանի տարածքում և ոչ մեկի կողմից չբռնվել: Մեծ հաջողություն է, որ Շաքի գյուղի բնակչուհին միայն մարմնական վնասվածք է ստացել, որ նրա կյանքին վտանգ չի սպառնում", - հայտարարել է Չալաբյանը։

Նրա խոսքով՝ ինքը միայն վերջերս է իմացել, որ քրեական գործ է հարուցվել ծանր մարմնական վնասվածքներ հասցնելու, ապօրինի զենք կրելու, սահմանը հատելու համար: Սակայն, նրա խոսքով, դա բավարար չէ, և կարևոր է, որ ադրբեջանցին դատապարտվի Հայաստանի տարածքում։ "Հայաքվե" շարժման համակարգողը կարծում է, որ նա պետք է, առնվազն, մինչև 20 տարվա ազատազրկման դատապարտվի, եթե ոչ՝ ցմահ:

"Հայաստանի օրենքներին համապատասխան նման պատիժ ստանալուց հետո միայն հնարավոր կլինի խոսել նրա հանձնման, փոխանակման և այլնի մասին։ Եվ, իհարկե, հանձնման դեպքում խոսքը պետք է գնա փոխանակման մասին (հայ գերու հետ - խմբ.), ինչի մասին հիմա չի խոսվում։ Հիմա ամենակարևորն այն է, որ նրան դատապարտեն Հայաստանի տարածքում։ Չէ որ, եթե Հայաստանի որևէ բնակիչ նման բան աներ, նա հաստատ կպատժվեր։ Նույնը պետք է լինի Ադրբեջանի քաղաքացու պարագայում։ Պետք է նաև հաշվի առնել, որ մենք մինչև հիմա չգիտենք, թե ինչու է նա հայտնվել Հայաստանի տարածքում։ Գուցե իրականում նա դիվերսանտ է, գուցե նրանից բացի կան ուրիշներ, ովքեր նույնպես հիմա մեր տարածքում են։ Ուստի, կրկնում եմ, նա պետք է կանգնի դատարանի առաջ և պատիժ կրի օրենքի ողջ խստությամբ", - եզրափակել է Չալաբյանը։

Հիշեցնենք, որ ադրբեջանցի զինծառայող Նասիմի Մուսաևի ՝ Սյունիքի մարզի Շաքի գյուղի բնակչուհու տուն մուտք գործելու և նրան վիրավորելու մասին հայտնի էր դարձել հոկտեմբերի 1-ին՝ օրվա երկրորդ կեսին: Ավելի ուշ հայտնի է դարձել, որ տուժել են նաև կնոջ երկու անչափահաս երեխաները, որոնք օգնել են մորը պաշտպանվել հարձակումից: ՀՀ ԱԱԾ հաղորդագրությունից պարզվել է, որ հայկական և ադրբեջանական պատկան մարմինները նշված զինծառայողին փնտրել են դեռևս սեպտեմբերի 29-ից, ընդ որում, բնակչության հետ անվտանգության տեսանկյունից որևէ աշխատանք չի տարվել, և մարզի բնակիչներն անտեղյակ են եղել: Ավելին, ադրբեջանական ԶԼՄ-ների հաղորդագրությունից հայտնի է դարձել, որ ադրբեջանցի զինվորականին փնտրում են դեռևս սեպտեմբերի 26-ից: Թե որտեղ է նա գտնվել այդ ժամանակահատվածում, դեռ հայտնի չէ։ Ավելի ուշ ՀՀ առողջապահության նախարար Անանիտ Ավանեսյանը հաղորդեց, որ կնոջ վիճակը կայուն է, նա ստանում է անհրաժեշտ բուժօգնություն: Ի սկզբանե ՀՀ իրավասու մարմինները դեպքի առթիվ հարուցել էին քրեական գործ ՝ բնակարան ապօրինի մուտք գործելու, ապօրինի զենք-զինամթերք պահելու և առողջությանը ծանր վնաս պատճառելու հոդվածների հատկանիշներով, որը կատարվել է զենքի գործադրմամբ: Եվ միայն հանրային դժգոհությունից հետո Գլխավոր դատախազությունից հաղորդեցին նաև ՀՀ պետական սահմանն ապօրինի հատելու հոդվածով քրեական գործ հարուցելու մասին: