ՀՀ երրորդ նախագահը պետք է ներկա լինի դատական հաջորդ նիստերին

Արմինֆո.Մեղադրական եզրակացությունը ոչ միայն փաստաթուղթ է, որն արձանագրում է նախաքննության ավարտը, այլ՝ հիմնական դատավարական ակտը, որը որոշում է հետագա դատավարության փաստական եւ իրավական շրջանակը: Այն պետք է թույլ տա մեղադրյալին հստակ հասկանալ, թե կոնկրետ որ արարքի համար է իրեն մեղադրում, ինչ փաստական հանգամանքներ և ապացույցներ են հաստատում այն, և ինչ իրավական գնահատական է տրվել պաշտպանական կողմի փաստարկներին: Այդ մասին սեպտեմբերի 25-ին Հակակոռուպցիոն դատարանի նիստում հայտարարել է ՀՀ երրորդ նախագահ Սերժ Սարգսյանի փաստաբան Ամրամ Մակինյանը։

Հիշեցնենք, որ ՀՀ երրորդ նախագահին ևս մեկ մեղադրանք է առաջադրվել, որը վերաբերում է Գյումրու Սև բերդ ամրոցի ապօրինի վաճառքին:

Այսօր պաշտպանական կողմը ներկայացրել է մեղադրական եզրակացության դեմ իր առարկությունները: Փաստաբանի խոսքով՝ ներկայացված մեղադրական եզրակացության մեջ խառնված են նկարագրական և բացատրական մասերի գործառույթները, ինչի արդյունքում փաստաթուղթը չի կատարում իր դատավարական նշանակությունը: Նկարագրական մասը պետք է պարունակի բացառապես փաստական տվյալներ․ ինչ է տեղի ունեցել, երբ, որտեղ, ում կողմից, և ոչ թե՝ քննիչի իրավական գնահատականները։ Փաստերը շարադրելու փոխարեն նկարագրական մասում քննիչը միանգամից կիրառել է իրավաբանական հետեւություններ (օրինակ, "ակնհայտ գերազանցել է իր լիազորությունները", "դիտավորյալ շրջանցել ընթացակարգերը", "կանխամտածված կատարել է գործողություններ"):Սրանք փաստեր չեն, կարծում է փաստաբանը, այլ վերջնական իրավական գնահատականներ, որոնք պետք է լինեին պատճառահետևանքային մասում ՝ ապացույցները վերլուծելուց հետո։

Նախկին նախագահի պաշտպանական կողմը հանդես է եկել միջնորդությամբ, որպեսզի Սերժ Սարգսյանը ներկա չլինի հաջորդ դատական նիստերին, սակայն դատարանը մերժել է այն: ՀՀ երրորդ նախագահի ներկայությունը դատական նիստերին պարտադիր է լինելու։ Բացի այդ, փաստաբանը պնդել է, որ քրեական գործը կարճվի, այդ միջնորդության վերաբերյալ որոշում կկայացվի դատարանի հաջորդ նիստում:

Նշենք, որ Սերժ Սարգսյանը մեղադրվում է Գյումրիում "Սև բերդ" պատմամշակութային հուշարձանն ապօրինի օտարելու համար՝ իր պաշտպանության նախարար եղած ժամանակ: ՀՀ քննչական կոմիտեն այդ գործի նախաքննությունն ավարտել է 2026 թվականի հուլիսին և այն հանձնել դատարան: Քննության տվյալներով ՝ Սերժ Սարգսյանն ուղղակի վաճառքի միջոցով և առանց կառավարության համապատասխան որոշման ամրոցը օտարել է ֆիզիկական անձի։ Օբյեկտը վաճառվել է 22 միլիոն 951 հազար դրամով (գործարքի պահին մոտ 58 հազար դոլար): 2026 թվականի հուլիսին նախաքննությունն ավարտվել է, գործի նյութերը փոխանցվել են դատական վարույթ։ Սարգսյանի պաշտպանական կողմը մեղադրանքներն անհիմն է համարում և դրանք գնահատում է որպես պետական մարմնի գործունեության կամայական գնահատական։