Առանց ռուսական ռազմակայանի անտեր կմնա ոչ թե պետությունը, այլ՝ անվտանգության համակարգը․ Սամվել Կարապետյան

Արմինֆո. Առանց ռուսական ռազմակայանի անտեր կմնա ոչ թե պետությունը, քանի որ դրա տերը ժողովուրդն է, այլ՝ անվտանգության համակարգը ։ Հարցազրույցում նման կարծիք է հայտնել "Ուժեղ Հայաստանի" ղեկավար Սամվել Կարապետյանը։

Նա ընդգծել է, որ ռուսական 102-րդ ռազմակայանը Հայաստանի անվտանգության համակարգի բաղադրիչն է: Քաղաքական գործիչը տարակուսանք է հայտնել այն առնչությամբ, թե որքանով է տրամաբանական այդ բաղադրիչը հանելը, երբ այդ ֆոնին զուգահեռաբար հնչում են իշխանությունների հայտարարություններն այն մասին, որ եթե ադրբեջանական կողմից կրակեն, հայկական կողմը չի պատրաստվում պատասխանել: Նա նպատակահարմար չի համարել հրաժարվել ՌԴ ռազմակայանից՝ առանց այլընտրանքի։ Այդ առնչությամբ Կարապետյանը օրինակ է բերել Թուրքիան, որի տարածքում տեղակայված են ՆԱՏՕ-ի ռազմակայաններ, այդ թվում ՝ միջուկային զենքով հագեցած։ Նա նաև նշել Է Իսրայելը, Գերմանիան, Իտալիան:

Իշխանությունները, նրա կարծիքով, ամենամեծ սպառնալիքն են բերել Հայաստանի անվտանգության համակարգին ՝ զրկելով ինքնապաշտպանության հնարավորությունից և հավատից, որ ունակ են ինքնապաշտպանության: Այսօր, ինչպես նշել է քաղաքական գործիչը, իշխանությունները քանդում են անվտանգության համակարգը, չունենալով, անգամ, որեւէ առաջարկ, մինչդեռ, աշխարհում շատ քիչ պետություններ կան, որոնք կարող են ինքնուրույն ապահովել իրենց անվտանգությունը:

"Իսկ մենք ունենք այն, ինչ ունենք ՝ ընդամենը ռուսական ռազմակայան, և այսօր մենք ասում ենք, որ հրաժարվում ենք դրանից", - ասել է նա: Ի պատասխան հարցազրուցավարի դիտարկմանը, թե վարչապետի կողմից նման հայտարարություն չի արվել, նա միայն ասել է, որ դեմ չէ և պատրաստ է քննարկել, Կարապետյանը հնարավոր է համարել, որ, ամենայն հավանականությամբ, Նիկոլ Փաշինյանն էլ է հասկանում, որ առանց այդ բաղադրիչի Հայաստանի անվտանգության համակարգը անտեր է մնալու:

Հիշեցնենք, որ սեպտեմբերի 11-ին լրագրողների հետ զրույցում Սամվել Կարապետյանը հայտարարել էր, որ առանց ռուսական ռազմակայանի "Հայաստանը անտեր կմնա տարածաշրջանում":

Ավելի վաղ Հայաստանի վարչապետը ճեպազրույցի ժամանակ ընդգծել էր, որ Հայաստանում 102 ռազմակայանի առկայությունը կենսական անհրաժեշտություն չի համարում: «Եթե Ռուսաստանը որոշի դուրս բերել ռազմակայանը Հայաստանից, մենք չենք առարկի, բայց եթե նրանք ցանկանան մնալ, մենք պատրաստ ենք քննարկել դա", - ասել էր նա:

Բիշքեկում ՇՀԿ գագաթնաժողովի աարդյունքների շուրջ լրագրողների հետ զրույցում և մի շարք երկկողմ բանակցությունների ժամանակ ՌԴ նախագահ Վլադիմիր Պուտինը հայտարարել էր, որ պատրաստ է "հենց վաղը" դուրս բերել Գյումրիում տեղակայված 102-րդ ռուսական ռազմակայանը: "Եթե Հայաստանը կարծում է, որ ռուսական ռազմակայանը Հայաստանին պետք չէ, մենք հենց վաղը կհեռանանք ։ Հայաստանը պատրա՞ստ է դրան։ Խնդրեմ, մենք ոչ մեկին ոչինչ չենք պարտադրի։ Իսկ եթե հայ ժողովուրդն ուզում է, որ այնտեղ ինչ - որ ռազմական "ռուսական թև" լինի իր կողքին, մենք կմնանք, կաշխատենք, կհամագործակցենք", - ասել էր նա։

Նշենք, որ ռուսական ռազմակայանը  Հայաստանում տեղակայված է 1995 թվականի միջպետական պայմանագրի համաձայն։ 2010 թվականին փաստաթղթում կատարվել են փոփոխություններ, որոնց համաձայն, Հայաստանի տարածքում դրա գտնվելու ժամկետը նախնական 25 տարուց երկարաձգվել է մինչև 49 տարի՝ մինչև 2044 թվականը: