ՌԴ ԱԳՆ․ Հայաստանի քաղաքացիները պետք է գնահատեն եվրաինտեգրման վտանգը

ԱրմԻնֆո.  Ռուսաստանը ցանկանում է հավատալ, որ Հայաստանի քաղաքացիները կկարողանան օբյեկտիվորեն գնահատել եվրաինտեգրման այն արկածախնդրության վտանգը, որի մեջ նրանց այժմ ներքաշում են, հայտարարել է ՌԴ ԱԳՆ եվրոպական խնդիրների վարչության տնօրեն, Արկտիկական խորհրդում Ռուսաստանի Դաշնության ավագ պաշտոնատար անձ Վլադիսլավ Մասլեննիկովը։

"Երկրի զարգացման վեկտորի վերջնական ընտրությունը, ամեն դեպքում, մնում է Հայաստանի քաղաքացիների ձեռքում։ Այս կապակցությամբ ցանկանում եմ հավատալ, որ նրանք կկարողանան օբյեկտիվորեն գնահատել այն "եվրաինտեգրման" արկածախնդրության վտանգը, որի մեջ նրանց այժմ ներքաշում են", - ասել է Մասլեննիկովը РИА Новости-ին տված հարցազրույցում։

Մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում առաջարկել է Հայաստանին հնարավորինս շուտ հստակեցնել իր անդամակցությունը ԵՄ-ին և ԵԱՏՄ-ին՝ նշելով, որ անհրաժեշտության դեպքում պատրաստ է "սկսել քաղաքակիրթ ամուսնալուծությունը"։ Երևանում ի պատասխան նշել են, որ ԵԱՏՄ-ից դուրս կգան, երբ հարկ կհամարեն։ Իսկ արդեն մայիսի 29-ին ԵԱՏՄ 5 երկրներից 4-ի ղեկավարներն ընդունել են բանաձև, որով Հայաստանին խորհուրդ են տալիս հանրաքվե անցկացնել ԵԱՏՄ-ում երկրի հետագա գտնվելու հարցով։ Նույն օրը ՌԴ նախագահը հայտարարել է, որ Հայաստանը չի կարող միաժամանակ նստել երկու աթոռի վրա, և նրան անհրաժեշտ է հնարավորինս շուտ կողմնորոշվել ընտրության հարցում։

Նշենք, որ Հայաստանի կառավարությունը 2025 թվականի հունվարի 9-ին հավանություն է տվել Եվրոպական միությանն անդամակցության գործընթացի մեկնարկի մասին օրենքի նախագծին, որն առաջարկվել էր «Եվրաքվե» քաղաքացիական նախաձեռնության կողմից։  Նախագիծն ուղարկվել էր Հայաստանի խորհրդարան՝ հաստատման։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը։  Փաստաթուղթը ստորագրվել է նույն տարվա ապրիլի 4-ին։ Մոսկվայում հայտարարել են, որ Ռուսաստանը Հայաստանին հասցրել է այն, որ Եվրասիական տնտեսական միությանը և Եվրոպական միությանը միաժամանակ անդամակցելն անհնար է։