Գալուզին․ Հայաստանում նկատվում են քաղաքական դրդապատճառներով "սեփականության վերաբաշխման" նշաններ

Արմինֆո. Հայաստանում նկատվում են քաղաքական դրդապատճառներով "սեփականության վերաբաշխման" նշաններ։ Ինչպես հաղորդում է Ռուսաստանի ԱԳՆ-ը, այդ մասին հայտարարել է ՌԴ փոխարտգործնախարար Միխայիլ Գալուզինը ՝ արձագանքելով ՌԴ Անվտանգության խորհրդի քարտուղար Սերգեյ Շոյգուի մեկնաբանությանը։

Վերջինս ռեյդերային զավթում է որակել Հայաստանում այն ձեռնարկությունների նկատմամբ վերաբերմունքը, որոնցում Ռուսաստանը միլիարդների ներդրումներ է կատարել։

Ռուսաստանի փոխարտգործնախարարի խոսքով՝ հայ գործընկերների հետ զրույցում իրենք պարբերաբար բարձրացնում են Հայաստանում ռուսական բիզնեսի աշխատանքի պայմանների թեման ։ "Տարբեր մակարդակներով մեզ հավաստիացրել են, որ հայրենական ներդրումներին ոչինչ չի սպառնում։ Սակայն, ինչպես տեսնում ենք, այդ հայտարարություններն ամեն ինչում չէ, որ համընկնում են իրականության հետ։ Ավելի ու ավելի շատ փորձագետներ հանգում են այն կարծիքին, որ հանրապետությունում նկատվում են "սեփականության վերաբաշխման" նշաններ ՝ քաղաքական դրդապատճառներով", - նշել է Գալուզինը։

Որպես օրինակ նա հշեցրել է "Հայաստանի էլեկտրական ցանցեր" ՓԲԸ ազգայնացման շարունակվող գործընթացի մասին, որը պատկանում է գործարար, "Ուժեղ Հայաստան" կուսակցության առաջնորդ Սամվել Կարապետյանին: "Կառավարող թիմն իր գործողությունները փորձում է արդարացնել "կոռուպցիայի դեմ պայքարի", ապօրինի ձեռք բերված միջոցները գանձարան վերադարձնելու, ընկերության արդյունավետությունը բարձրացնելու կարգախոսներով։ Դրանց ճշմարտացիությունը, այնուամենայնիվ, խիստ կասկածելի է։ Իրականում, դա ավելի շատ նման է ներքին ասպարեզում մրցակիցներից մեկի նկատմամբ հաշվեհարդարի՝ քաղաքական դրդապատճառներով։ Հատկանշական է, որ մինչ գործարարի հայտնվելը հանրապետության քաղաքական կյանքում, ընկերության աշխատանքի նկատմամբ ոչ մի դժգոհություն չի եղել։ Ընդ որում, նոր կառավարիչները, որքանով կարելի է դատել, այնքան էլ հաջողության չեն հասել ձեռնարկության ղեկավարի պաշտոնում, որում ներդրվել են հարյուր միլիոնավոր դոլարներ", - ուշադրություն է հրավիրել Ռուսաստանի փոխարտգործնախարարը։

Բացի այդ, նա հիշեցրել է "Ռուսական երկաթուղիներ" ԲԲԸ-ի դուստր ձեռնարկություն "Հարավկովկասյան երկաթուղի" ՓԲԸ-ի՝ հայկական երկաթուղային ցանցի կառավարման կոնցեսիան ինչ-որ երրորդ կողմի վաճառելու անհրաժեշտության մասին Հայաստանի ղեկավարության հայտարարությունները: "Պնդվում է, որ ռուսական ներկայությունն, իբր, Հայաստանին զրկում է մրցակցային առավելություններից՝ արևմտյան պատժամիջոցների սպառնալիքի պատճառով։ Իսկ իրականում ամեն ինչ հակառակն է. ռուսական ընկերությունը երկար տարիներ ողջ եկամուտը ներդնում է հայկական երկաթուղային ենթակառուցվածքի պահպանման, նորացման և զարգացման մեջ։ Բերեմ որոշ թվեր։ ՀԿԵ "ՓԲԸ ներդրումները 2008 թվականից ի վեր կազմել են 30 մլրդ ռուբլի (մոտ 388 մլն դոլար), իսկ հարկերի վճարումը՝ 15 միլիարդ ռուբլի (մոտ 194 միլիոն դոլար): Վերանորոգվել է ավելի քան 520 կմ ճանապարհ, այն դեպքում, երբ "ՀԿԵ" ՓԲԸ-ի կառավարման ցանցի շահագործման երկարությունը կազմում է շուրջ 700 կմ: Իրականացվել է գծերի 50%-ի փոխարինում, վերանորոգվել և վերակառուցվել է ավելի քան 50 կառույց, այդ թվում ՝ 38 կամուրջ և երկու թունել: Ընկերությունը, որպես գործատու, ապահովում է ավելի քան 2,5 հազար մարդու զբաղվածություն", - հիշեցրել է Գալուզինը։

Այդ ամենը, նրա ասելով, թույլ է տվել պահպանել Հայաստանի ռազմավարական ակտիվը և նախադրյալներ ստեղծել միջազգային տրանսպորտային ցանցում հանրապետության արդյունավետ ներկառուցման համար։ Մինչդեռ, ինչպես նշել է Գալուզինը, կոնցեսիայի վաճառքի մասին համառ խոսակցություններն՝ առանց համոզիչ բացատրության, թե ինչու դա կարող է անհրաժեշտ լինել ռուսական կողմին, կարող են վկայել այն մասին, որ դրանց հետեւում թաքնված է երկաթուղիների դուրսբերումն ու փոխանցումն ապահովելու մտադրությունը ՝ ի շահ այլ պետությունների աշխարհաքաղաքական նախագծերի: "Ուշադիր հետևում ենք Հայաստանում ռուսական տնտեսական օպերատորների օրինական շահերի պահպանմանը։ Դրանց խախտումը ոչ միայն կվնասի հանրապետության ներդրումային մթնոլորտին, այլև չի մնա առանց ռուսական կողմի պատշաճ արձագանքի", - ամփոփել է Ռուսաստանի փոխարտգործնախարարը։

Նշենք, որ սեպտեմբերի 17-ին ՌԴ ԱԽ քարտուղար Սերգեյ Շոյգուն արձանագրել էր, որ Հայաստանում աշխատող ռուսական բիզնեսի նկատմամբ դրսևորվում է ոչ բարեկամական գիծ և բացահայտ "երկակի ստանդարտներ", իսկ այն, ինչ տեղի է ունենում ձեռնարկությունների և ամբողջ ոլորտների հետ, որոնցում Ռուսաստանը միլիարդավոր ներդրումներ է կատարել, կարելի է անվանել ռեյդերային զավթում: Իր հերթին՝ ՌԴ ԱԽ քարտուղարի տեղակալ Ալեքսեյ Շեւցովը սեպտեմբերի 18-ին հայտարարել է, որ Հայաստանի իշխանությունները փորձում են արժեզրկել ռուսական ակտիվները, որպեսզի ստիպեն սեփականատերերին ձերբազատվել դրանցից: Շեւցովը նախազգուշացրել է, որ նման մարտավարությունը կդառնա իրական «կրակոց սեփական ոտքին»՝ Հայաստանի տնտեսության համար,  հաշվի առնելով, որ ռուսական բիզնեսը ստեղծել է տասնյակ հազարավոր աշխատատեղեր եւ արդյունավետ կառավարում է իր ակտիվները օրինական հիմունքներով՝ զգալի ներդրում ունենալով Հայաստանի ՀՆԱ-ում։