Փաստաբան․ "Մայր Հայաստանի" կալանավորված ներկայացուցիչների գործով հաջորդ նիստը կրկին դռնփակ կընթնա

Արմինֆո.  "Մայր Հայաստան" կուսակցության կալանավորված առաջնորդ Անդրանիկ Թևանյանի և քաղաքական ուժի վարչության անդամ Արեգնազ Մանուկյանի գործով հաջորդ դատական նիստը կրկին դռնփակ կընթանա: Այդ մասին սեպտեմբերի 18-ին լրագրողների հետ զրույցում հաղորդել է փաստաբան Հովհաննես Խուդոյանը։

Նրա ասելով՝ այն նշանակված է սեպտեմբերի 22-ին։ "Այսօր ավարտվել են նախնական դատական լսումները։ Սա այն փուլն է, որտեղ քննարկվում են տարբեր հարցեր։ Օրինակ, խոսք է  գնում ապացույցների ծավալների, խափանման միջոցների մասին։ Հաջորդ դատական նիստը տեղի կունենա սեպտեմբերի 22-ին: Դատավորը որոշել է այն ևս անցկացնել փակ ռեժիմով", - նշել է փաստաբանը։

Հաջորդ նիստի ընթացքում, ինչպես պարզաբանել է Խուդոյանը, կողմերը հանդես կգան բացման խոսքով։ Բացի այդ, ըստ փաստաբանի, հերթական անգամ կքննարկվի Արեգնազ Մանուկյանի նկատմամբ խափանման միջոցի հարցը:

Հիշեցնենք, որ մայիսի 21-ին ՀՀ քննչական կոմիտեից հաղորդել էին, որ Անդրանիկ Թևանյանի նկատմամբ քրեական գործ է հարուցվել "պետական դավաճանության և լրտեսության" փաստով: Թևանյանին մեղադրում են պետական գաղտնիք պարունակող տեղեկատվությունը 622 հազար դոլարի դիմաց օտարերկրյա պետությանը փոխանցելու համար: Իսկ մայիսի 24-ի գիշերը Թևանյանը դատարանի որոշմամբ դատապարտվել է երկամսյա կալանքի: Ընդ որում, Թևանյանի փաստաբան Արամ Օրբելյանի խոսքով ՝ այդ օրերին իր պաշտպանյալին կալանավորելու համար որևէ իրավական հիմք չի եղել։ Հավելենք, որ ընդդիմադիր գործչի ձերբակալությունը տեղի է ունեցել ՀՀ գործող վարչապետ Նիկոլ Փաշինյանի ուղիղ ցուցումով:

Ինքը ՝ Թևանյանը, անհեթեթ է համարել նախաքննության այդ պնդումները, նկատելով, որ պատգամավորական մանդատը վայր է դրել դեռևս 2023 թվականին, և, հետևաբար, Քննչական կոմիտեի նման պնդումներն իրենց տակ հող չունեն։ Իսկ արդեն հուլիսի 9-ին ձերբակալվել, ապա երկամսյա կալանքի դատապարվել "Մայր Հայաստան" կուսակցության քաղխորհրդի անդամ, ԱԺ նախկին պատգամավոր Արեգնազ Մանուկյանը: Քննչական կոմիտեի վարկածով ՝ վարույթի շրջանակներում Արեգնազ Մանուկյանի նկատմամբ հարուցվել է հանրային քրեական հետապնդում ՝ քրեական օրենսգրքի 427-րդ հոդվածի 1-ին մասով (պետական գաղտնիք պարունակող տեղեկությունների հրապարակում): Քննչական գործողություններն իրականացվել են լրտեսության և պետական դավաճանության վերաբերյալ քրեական գործի շրջանակներում, որով ավելի վաղ կալանավորվել էր "Մայր Հայաստան" կուսակցության առաջնորդ Անդրանիկ Թևանյանը: Մանուկյանը կասկածվում է Թևանյանին ՀՀ զինված ուժերի վերաբերյալ գաղտնի տվյալներ փոխանցելու համար, որոնք ներկայացվել են խորհրդարանում դռնփակ խորհրդակցության ժամանակ: Օգոստոսի 18-ին գործի նախաքննությունն ավարտվել է, և նյութն ուղարկվել է դատարան, սակայն թե Թևանյանը, թե Մանուկյանը շարունակում են պահվել քննչական մեկուսարանում: "Մայր Հայաստան" կուսակցության ներկայացուցիչների նկատմամբ դատական գործընթացը մեկնարկել է սեպտեմբերի 8-ին: Նիստերն ընթանում են դատավոր Ջոն Հայրապետյանի նախագահությամբ: