ՀԱԵ․ Ամենայն հայոց կաթողիկոսը և գործով անցնող եպիսկոպոսները չեն մասնակցի Էջմիածնում կայանալիք հերթական դատական նիստին

ԱրմԻնֆո.  Ամենայն հայոց կաթողիկոս Գարեգին Բ-ն և գործով անցնող վեց եպիսկոպոսները՝ Գերագույն հոգևոր խորհրդի անդամները, չեն ներկա գտնվի Էջմիածնում կայանալիք հերթական դատական նիստին։

Ինչպես հիշեցրել են Հայ Առաքելական եկեղեցու (ՀԱԵ) մամուլի գրասենյակում, Ամենայն հայոց կաթողիկոսի և վեց եպիսկոպոսների վերաբերյալ քրեական գործով նախնական դատական նիստը կկայանա 2026 թվականի սեպտեմբերի 18-ին՝ ժամը 15:00-ին։ «Օգտվելով Հայաստանի քրեական դատավարության օրենսգրքի 272-րդ հոդվածի 4-րդ մասով նախատեսված իրավունքից՝ Ամենայն հայոց կաթողիկոսը և բարձրաստիճան հոգևորականները նիստին ներկա չեն գտնվի։ Նրանց շահերը կներկայացնեն փաստաբանները», - հայտարարել են Մայր Աթոռ Սուրբ Էջմիածնում։

Հիշեցնենք, որ Հայաստանի իշխանությունները 2025 թվականի մայիսից ակտիվ հակաեկեղեցական քաղաքականություն են ծավալել և պահանջում են Ամենայն հայոց կաթողիկոս Գարեգին Բ-ի հեռացումը, որն այդ պաշտոնում ընտրվում է ցմահ ժամկետով։ Այս արշավի շրջանակներում հետապնդումների են ենթարկվում ինչպես հոգևորականության ներկայացուցիչները, այնպես էլ Եկեղեցուն աջակցող քաղաքացիները։ Ընթացիկ տարվա փետրվարին Հայաստանի դատախազությունը քրեական գործ է հարուցել Ամենայն հայոց կաթողիկոս Գարեգին Բ-ի դեմ, նրա ելքը երկրից արգելված է։ Գործը հարուցվել է Արման Սարոյանին կարգալույծ անելու հետ կապված դատական ակտի կատարումը խոչընդոտելու մեղադրանքով։ Քրեական գործով դատախազ է նշանակվել Խաչատուր Գալստյանը։ Գործով անցնում են նաև մի քանի այլ բարձրաստիճան հոգևորականներ։ Օգոստոսի 7-ին դատավոր Հակոբ Մանուկյանը, որի նախագահությամբ պետք է կայանար Ամենայն հայոց կաթողիկոսի և վեց եպիսկոպոսների գործով առաջին նիստը, ինքնաբացարկ հայտնեց։ Դրանից հետո գործը մակագրվեց դատավոր Սերժ Ռուշանյանին։ Սակայն օգոստոսի 28-ին Ռուշանյանը որոշեց Ամենայն հայոց կաթողիկոս Գարեգին Բ-ի և Գերագույն հոգևոր խորհրդի անդամ վեց եպիսկոպոսների գործն ուղարկել Երևանի ընդհանուր իրավասության քրեական դատարան։ Դրանից հետո ևս մեկ դատավոր հրաժարվեց քննել Ամենայն հայոց կաթողիկոս Գարեգին Բ-ի դեմ գործը՝ Երևանի ընդհանուր իրավասության քրեական դատարանի դատավոր Վահագն Մելիքյանը, ինչի կապակցությամբ գործը կրկին փոխանցվեց դատավոր Սերժ Ռուշանյանի քննությանը։