Փաշինյան․ ԵՄ-ին անդամակցելու կամ ԵԱՏՄ անդամությունը պահպանելու վերաբերյալ հանրաքվե արդեն երկու անգամ միջնորդավորված անցկացվել է

Արմինֆո. Եվրոպական միությանը (ԵՄ) անդամակցելու կամ Եվրասիական տնտեսական միության (ԵԱՏՄ) անդամությունը պահպանելու վերաբերյալ հանրաքվե արդեն երկու անգամ միջնորդավորված անցկացվել է: Այդ մասին սեպտեմբերի 16-ին Ազգային ժողովում հայտարարել է ՀՀ վարչապետ Նիկոլ Փաշինյանը, պատասխանելով ընդդիմադիր պատգամավորի հարցին, թե՝ արդյոք երկիրը մտադիր է անդամակցել ԵՄ-ին, թե միայն նման տպավորություն է ստեղծում։

Փաշինյանն այդ առնչությամբ հայտարարել է, որ նման հարցերի լուծումը ոչ Հայաստանի կառավարության, ոչ էլ խորհրդարանական մեծամասնության իրավասության ներքո է: "Նման որոշումներ կայացնում է Հայաստանի ժողովուրդը։ Մեր խնդիրն այս փուլում այլընտրանք ձևավորելն է։ Երբ այդ այլընտրանքը ձևավորվի, այսինքն,  իրադարձությունները սկսեն զարգանալ, ապա կգա նաև ժամանակը, որ հայ ժողովուրդն ընտրություն կատարի։ Մենք այդ մասին բազմիցս խոսել ենք", - հայտարարել է Հայաստանի վարչապետը։

Փաշինյանը, միաժամանակ, հավաստիացրել է, որ Հայաստանի և ԵՄ միջև հարաբերությունները հասել են գագաթնակետին, և դա արդեն հաստատված քաղաքական իրողություն է: Այդ մասին,  նրա ասելով, խոսում է և վիզային ռեժիմի ազատականացման գործընթացը, և ավելի վաղ Եվրոպական խորհրդարանի կողմից հավանության արժանացած հայկական արտադրանքի նկատմամբ առևտրի ազատականացման ժամանակավոր միջոցները: "Ընդհանրապես ես այնպիսի միտում եմ տեսնում, ընդ որում ՝ ոչ միայն խորհրդարանում, որ մարդիկ, հարց տալով, կոնկրետ պատասխան են ակնկալում։ Եվ, եթե այդ պատասխանը չի համապատասխանում իրենց սպասումներին, ապա նրանք հայտարարում են, թե, իբր, հարցին այդպես էլ չեն պատասխանել։ Բայց պատասխանը հենց սա է. մենք օրենք ենք ընդունել և հիմա այլընտրանք ենք ձևավորում։ Մեր հիմնավորումներին կարող են համաձայն լինել և չլիննել։ Մենք չենք փորձում վիճարկել ինչ-որ մեկի անհամաձայնության իրավունքը։ Բայց մենք ասում ենք, որ դա մեր քաղաքական դիրքորոշումն է, և քանի որ Հայաստանի ժողովուրդը մեզ մանդատ է տվել դա անելու, մենք շարունակելու ենք այդ գործընթացն առաջ տանել", - հավելել է Փաշինյանը։

Խոսելով այն մասին, թե ինչու իրենք հանրաքվե չեն անցկացնում ԵՄ-ին անդամակցելու կամ ԵԱՏՄ անդամությունը պահպանելու վերաբերյալ,  վարչապետն ասել է, որ դրա անհրաժեշտությունը այս պահին չկա: "Չէ որ, ըստ էության, հանրաքվե արդեն երկու անգամ միջնորդավորված անցկացվել է. խոսքը օրինագծի ընդունման (ԵՄ անդամակցության գործընթացի մեկնարկի) հետ կապված ստորագրահավաքի գործընթացի եւ հունիսի 7-ի հերթական խորհրդարանական ընտրությունների մասին է։ Դրա համար ասում եմ, որ մենք այլընտրանք կձևավորենք, հետո այդ հարցը կփոխանցենք ժողովրդին։ Մեր խնդիրը հարցի մշակումն է", - եզրափակել է Փաշինյանը։

Հիշեցնենք, որ ՀՀ կառավարությունը 2025 թվականի հունվարի 9-ին հավանություն է տվել "ԵվրաՔե" քաղաքացիական նախաձեռնության կողմից առաջարկված ՝ Եվրոպական միությանն անդամակցելու գործընթաց սկսելու մասին օրենքի նախագծին: Նախագիծն ուղարկվել է Հայաստանի խորհրդարան ՝ հաստատման։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը ։ Փաստաթուղթը ստորագրվել է նույն թվականի ապրիլի 4-ին։ Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրամիությանը միաժամանակյա անդամակցությունն անհնար է:

Հավելենք, որ 2026 թվականի մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում Հայաստանին առաջարկել է որքան հնարավոր է շուտ կողմնորոշվել ԵՄ-ին և ԵԱՏՄ-ին անդամակցության հարցում ՝ մատնանշելով հարկ եղած  դեպքում "քաղաքակիրթ ապահարզան սկսելու" պատրաստակամությունը։ Երևանում՝ ի պատասխան, նշել են, որ ԵԱՏՄ-ն կլքեն, երբ հարկ համարեն ։ Իսկ արդեն մայիսի 29-ին ԵԱՏՄ երկրների ղեկավարները համատեղ հայտարարություն են ընդունել, որում Հայաստանից պահանջել են հանրաքվե անցկացնել ԵԱՏՄ-ում հետագա գտնվելու հարցի շուրջ։ Նույն օրը ՌԴ նախագահը հայտարարել է, որ Հայաստանը չի կարող նստել երկու աթոռի վրա և պետք է հնարավորինս շուտ կողմնորոշվի ընտրության հարցում: