Հայաստանի իշխանությունները որոշել են խաղարկել 102-րդ ռուսական ռազմակայանի "խաղաքարտը"՝ հանրապետության համար գազի արժեքի հնարավոր թանկացման հարցում

Արմինֆո. Հայաստանի գործող իշխանությունները ՝ Նիկոլ Փաշինյանի գլխավորությամբ, որոշել են խաղարկել ռուսական 102-րդ ռազմակայանի "խաղաքարտը"՝ Հայաստանի համար գազի արժեքի հնարավոր թանկացման հարցում ՝ Երևանի և Մոսկվայի հարաբերություններում ճգնաժամի ֆոնին, որը գնալով խորանում է դեպի Եվրոպա վերակողմնորոշվելու մասին հանրապետության իշխանությունների հայտարարությունից հետո։ Ստեղծվում է տպավորություն, որ Հայաստանի իշխանությունները փորձում են շանտաժի ենթարկել ՌԴ-ին՝ երկրում 102-րդ ռազմակայանի ներկայությամբ։

Դեռ այս տարվա մայիսին ռուսական կողմը չէր բացառել Հայաստանի համար գազի գնի բարձրացումը, եթե հանրապետությունը շարունակի ԵՄ-ին անդամակցելու կուրսը։ Ի սկզբանե Հայաստանի իշխանությունները լռություն էին պահպանում այդ հարցի շուրջ, իսկ հետո Փաշինյանի, այնուհետեւ նրա թիմակիցների շուրթերից սկսեցին հնչել հայտարարություններ այն մասին, որ Հայաստանի համար գազի գնի բարձրացման դեպքում հանրապետությունը կարող է բարձրացնել 102-րդ ռուսական ռազմակայանի վարձավճարը։

Մասնավորապես, սեպտեմբերի 11-ին ԱԺ պաշտպանության և անվտանգության հարցերի մշտական հանձնաժողովի նախագահ, "Քաղաքացիական պայմանագիր" խմբակցության պատգամավոր Վիլեն Գաբրիելյանը Factor TV-ի հետ զրույցում անդրադառնալով վարչապետի ակնարկին, թե գազի թանկացման դեպքում Հայաստանն էլ կարող է որոշ բաներ "թանկացնել", հաստատել է, որ դա կարող է վերաբերել նաև ռազմակայանի վարձավճարի բարձրացմանը։

"Ինչու՞ ոչ։ Այո։ Դա նաև իմ անձնական տեսակետն է", - ասել է նա։

Հատկանշական է, որ պաշտպանության և անվտանգության հարցերի հանձնաժողովի ղեկավարի պաշտոնն զբաղեցնող անձն այնքան իրավասու չէ, որ ,նույնիսկ, չգիտի, որ ռուսական կողմը ռազմակայանի վարձավճարը չի վճարում։

Ռուսական 102-րդ ռազմակայանը Հայաստանում տեղակայված է 1995 թվականի միջպետական պայմանագրի համաձայն։ 2010 թվականին փաստաթղթում կատարվել են փոփոխություններ, որոնց համաձայն, Հայաստանի տարածքում դրա գտնվելու ժամկետը սկզբնական 25 տարուց երկարացվել է մինչև 49 տարի ՝ մինչև 2044 թվականը: