Ծառուկյանը՝ ԱԱԾ նկուղից․ Հայաստանը գտնվում է շատ բարդ պատմական փուլում

Արմինֆո.  Հայաստանը գտնվում է շատ բարդ պատմական փուլում, իսկ երկրի և ժողովրդի առջև ծառացած խնդիրները չեն լուծվում, և անհրաժեշտ է հասարակության համախմբում: Այդ մասին ասվում է ԲՀԿ առաջնորդ Գագիկ Ծառուկյանի հայտարարության մեջ, որն ուղարկվել է Երևան-Կենտրոն ՔԿՀ-ից, որն ավելի հայտնի են որպես ԱԱԾ նկուղ:

«Կյանքը ոչ մի ընտրությունից հետո կանգ չի առնում, որքան էլ անարդարությունները մեծ լինեն։ Մարդկանց հուզող, մտահոգող խնդիրներն էլ ընտրություններից հետո հենց այնպես, իրենք իրենց չեն լուծվում։ Ե´վ խնդիրներն են մնում, և´ բարձրացված հարցերը, և´ առաջարկված լուծումները։ Դեռևս ամիսներ առաջ, երբ մեր թիմն աշխատում էր մեր ծրագրի վրա, ես ասում էի, որ սա մեկ ամսվա կամ մեկ ընտրության ծրագիր չէ։ Սա Հայաստանի զարգացման, վերականգնման ծրագիրն է, որը բարձրացնում է շատ հարցեր ու տալիս շատ լուծումներ։ Ես նույնը ասում եմ հիմա, երբ զրկված եմ ժողովրդի հետ շփվելու հնարավորությունից։

Մեր խնդիրները չեն վերացել, չեն անհետացել։ Ավելին՝ այս ամիսներին ավելացել են նորերը։

Ես կարևորում եմ, որ իմ թիմի ներկայացուցիչները՝ ԲՀԿ անդամներ և անկուսակցականներ, ակտիվորեն ներգրավված լինեն երկրի հանրային կյանքում, մասնակցեն մեր երկրի համար բոլոր կարևոր հարցերի քննարկմանը։ Կարևոր է արդյունավետ համագործակցությունը՝ տարբեր քաղաքական, հասարակական միավորների, մասնագիտական խմբերի, ակտիվ քաղաքացիների հետ։ Շատ կարևոր է միջազգային գործընկերների հետ աշխատանքը։

Հայաստանը պատմական շատ բարդ փուլում է։ Սովորաբար, բարդ փուլերը հաղթահարելու նպատակով, երկրները, հասարակությունները միավորում են իրենց ուժերը, խելք խելքի տալիս, միասնական ջանք գործադրում։ Մի բառով՝ ստեղծում են ներքին համերաշխության մթնոլորտ։ Մենք պարտավոր ենք ստեղծել այդ մթնոլորտը, եթե մեզ համար թանկ է մեր երկիրը։ Այս հանրային պառակտումը, թշնամանքը վնասում են մեր երկրին։ Մեր բոլորի խնդիրը պետք է լինի՝ ուժերի ներածին չափով աշխատել հանուն մեր երկրի, հանուն մեր ժողովրդի։ Ես ակնկալում եմ սա նաև իմ թիմից։ Վստահ եմ, որ մեր ժողովուրդն ունի բոլոր ռեսուրսները՝ այս բարդ փուլը հաղթահարելու համար», - գրել է Ծառուկյանը՝ Կենտրոն ՔԿՀ-ից։

Հիշեցնենք, որ հուլիսի 6-ին "Բարգավաճ Հայաստան" կուսակցության առաջնորդ և գործարար Գագիկ Ծառուկյանին ձերբակալել և տեղափոխել էին Հայաստանի Քննչական կոմիտե: Նա մեղադրվում է խարդախություն կազմակերպելու և առանձնապես խոշոր չափերով դրամական միջոցներ օրինականացնելու (լվանալու) համար։ Քննության վարկածով՝ 2022-2024 թվականներին նրա ղեկավարությամբ գործող խումբը Հայաստանի և Իրանի միջև առևտրատնտեսական կապերի զարգացման պատրվակով Իրանի քաղաքացիների մասնակցությամբ ստեղծել է համատեղ իրավաբանական անձինք, որից հետո իրականացրել է խարդախ սխեմա ՝ պատճառելով ավելի քան 21 մլն դոլարի վնաս։ Բացի այդ, Գագիկ Ծառուկյանին ևս մեկ մեղադրանք է առաջադրվել՝ ապօրինի որսի համար: Հուլիսի 7-ին դատարանը բավարարել է Ծառուկյանին երկու ամսով կալանավորելու մասին մեղադրող կողմի միջնորդությունը: Սեպտեմբերի 4-ին դատարանը երկարաձգել է Ծառուկյանի կալանքի ժամկետը ևս երկու ամսով։ Գործի շրջանակներում հուլիսի 6-ին իրավապահ մարմինները խուզարկություններ են անցկացրել Ծառուկյանի հետ կապված ավելի քան 70 հասցեներում, ինչից հետո բոլոր ձեռնարկությունների դռները կապարակնքվել էին։ Դրանց մի մասն ազգայնացվել է պետության կողմից:  Սեպտեմբերի 4 - ին դատարանը ևս երկու ամսով երկարացրեց Ծառուկյանի կալանքը։