Առուշ Առուշանյանը «Համերաշխություն» դաշինքից կմասնակցի ՏԻՄ ընտրություններին

ԱրմԻնֆո. Իշխող «Քաղաքացիական պայմանագիր» կուսակցությունը մտադիր է ձևավորել «Համերաշխություն» անվամբ դաշինք, որը երկրի մի շարք մարզերում Տեղական ինքնակառավարման մարմինների (ՏԻՄ) ընտրություններում թեկնածուներ կառաջադրի։ Այս մասին սեպտեմբերի 11-ին ճեպազրույցի ընթացքում լրագրողներին հայտնել է Հայաստանի վարչապետ Նիկոլ Փաշինյանը։

Մասնավորապես, նա տեղեկացրել է, որ Գորիսում առաջիկա ընտրություններում (հոկտեմբերի 25-ին) «Քաղաքացիական պայմանագիր» կուսակցության և «Բիզնես» կուսակցության կողմից ձևավորված «Համերաշխություն» դաշինքն իր թեկնածու կառաջադրի Գորիսի գործող քաղաքապետ Առուշ Առուշանյանին, որը նախկինում հայտնի էր որպես ընդդիմադիր, իշխանություններին մեղադրում էր Արցախը հանձնելու մեջ և պահանջում էր նրանց հրաժարականը։

Ինչպես նշել է վարչապետը, նման որոշում կայացնելուն իշխող ուժին մղել են Գորիսի ընտրությունների արդյունքները՝ Ազգային ժողովի ընտրություններում, որտեղ բնակիչներն իրենց ձայները տվել էին «Քաղաքացիական պայմանագիր» կուսակցությանը, և ՏԻՄ ընտրություններում, որտեղ քվեարկության արդյունքները հակառակն էին։

«Սա այն դեպքն է, երբ մենք որոշակիորեն ենթարկվեցինք գորիսեցիների կամքին», - ասել է վարչապետը։ Հաշվի առնելով «Քաղաքացիական պայմանագիր» կուսակցության հասցեին հնչող մեղադրանքները, թե իշխող ուժը հասարակությունը բաժանում է «սևերի» և «սպիտակների», մի շարք համայնքներում իշխանությունները ՏԻՄ ընտրություններին կմասնակցեն «Համերաշխություն» դաշինքով։

Հիշեցնենք, որ Գորիսի քաղաքապետ Առուշ Առուշանյանը, որը 2021 թվականին ընդգրկված էր ՀՀ 2-րդ նախագահ Ռոբերտ Քոչարյանի գլխավորած «Հայաստան» դաշինքի ընտրացուցակում, մեղադրվում էր քվեարկության գաղտնիությունը խախտելու, ընտրական իրավունքի իրականացմանը խոչընդոտելու, պաշտոնեական լիազորությունները չարաշահելու, ապօրինի ձեռնարկատիրությանը մասնակցելու և խարդախության մեջ։ Նա կալանքի տակ է գտնվում 2021 թվականի հուլիսից։ Այնուամենայնիվ, գտնվելով կալանքի տակ՝ Առուշ Առուշանյանը մասնակցել է 2021 թվականի հոկտեմբերի 17-ին անցկացված ՏԻՄ ընտրություններին և վերընտրվել Գորիսի համայնքի ղեկավար։ 2022 թվականի մարտի 28-ին Սյունիքի մարզի առաջին ատյանի դատարանը Գորիսի համայնքի ղեկավարին մեղավոր է ճանաչել ՀՀ քրեական օրենսգրքի 308-րդ հոդվածի 1-ին մասով (պաշտոնեական լիազորությունների չարաշահում) և որպես պատիժ զրկել է ՏԻՄ-երում ղեկավար պաշտոններ զբաղեցնելու իրավունքից՝ մինչև 5 տարի ժամկետով։ Նա նաև մեղավոր է ճանաչվել ՀՀ քրեական օրենսգրքի 322-րդ հոդվածի 2-րդ մասով (բռնության գործադրմամբ կամ այն գործադրելու սպառնալիքով ինքնիրավչություն) և դատապարտվել նվազագույն աշխատավարձի 700-ապատիկի չափով տուգանքի։ Նրան մեղավոր են ճանաչել նաև ՀՀ քրեական օրենսգրքի 113-րդ հոդվածի 3-րդ մասի 3-րդ և 6-րդ կետերով (միջին ծանրության վնաս պատճառելը առողջությանը) և դատապարտել 1 տարի 3 ամիս ժամկետով ազատազրկման։ Հաշվի առնելով կալանքի տակ գտնվելու ժամանակահատվածը՝ դատարանը ազատազրկման վերջնական ժամկետ է սահմանել 6 ամիս 18 օրը։ Միևնույն ժամանակ դատարանը որոշել է պայմանականորեն չկիրառել պատիժը, ազատ արձակել նրան դատարանի դահլիճից և սահմանել մեկուկես տարվա փորձաշրջան։ 2022 թվականի մայիսի 26-ին դատախազությունը պահանջել է վերացնել Գորիսի համայնքի ղեկավար Առուշ Առուշանյանի նկատմամբ ընտրողներին կաշառելու մասով կայացված արդարացման դատավճիռը։