ՀՅԴ Գերագույն մարմնի անդամ. Բաքվի հայ ռազմագերիների ազատ արձակման հարցը պետք է լինի Հայաստանի պետական օրակարգի առաջնահերթություն

ԱրմԻնֆո.  Բաքվում պահվող հայ ռազմագերիների ազատ արձակման հարցը պետք է լինի Հայաստանի Հանրապետության պետական օրակարգի առաջնահերթություններից մեկը: Այդ մասին Facebook-ի իր էջում գրել է ՀՅԴ  Գերագույն մարմնի անդամ, ԱԺ նախկին պատգամավոր Գառնիկ Դանիելյանը ՝ արձագանքելով 2023 թվականի սեպտեմբերից ադրբեջանական գերության մեջ գտնվող Արցախի խորհրդարանի խոսնակ Դավիթ Իշխանյանի ՝ Հայաստանի իշխանություններին հղած հերթական ուղերձին։

«Պարոնայք պետական պատասխանատուներ, Ադրբեջանում գտնվող 19 անձինք Հայաստանի Հանրապետության անձնագիր կրող քաղաքացիներ են։ Իմացած եղեք՝ սա մեր անհատական պատվի խնդիրը չէ։ Սա բոլորիս պատվի խնդիրն է», - ադրբեջանական բանտից Դավիթ Իշխանյանի ուղերձի այս հատվածն է մեջբերում Գառնիկ Դանիելյանը։

«Անհնար է առանց հուզմունքի, ցավի և ցասման կարդալ Արցախի պատանդառված ռազմաքաղաքական ղեկավարության անդամների նամակները։ Մարդկանց, ովքեր այսօր գտնվում են ադրբեջանական բանտերում միայն այն պատճառով, որ պաշտպանել են իրենց հայրենիքը, իրենց ժողովրդի իրավունքներն ու արժանապատվությունը։

Եվ այսօր ամենացավալին այն է, որ Հայաստանի իշխանությունների վարքագծից հաճախ այնպիսի տպավորություն է ստեղծվում, թե այս մարդիկ այլևս գոյություն չունեն։

Գերիների հանդեպ իրենց իրական վերաբերմունքը սրանք դրսևորել են բազմիցս․ «Գերիները մեզ կներեն 1-2 ամիս ավել գերության մեջ մնալու համար» (Ն․Փ․): «Էդ գերիներին համարում եմ, որ արդեն իրանք չկան, իմ համար չկան» (Ա․Ս․):

Բայց նրանք գոյություն ունեն։ Նրանք ունեն անուններ, ընտանիքներ, հարազատներ, իրավունքներ։ Եվ ամենակարևորը՝ նրանք Հայաստանի Հանրապետության քաղաքացիներ են։

Չնայած շինծու մեղադրանքներին, դատավարություններին և ֆիզիկական ու հոգեբանական բռնությանը՝ նրանք շարունակում են արժանապատվության դասեր տալ մեզ բոլորիս։

Ուստի նրանց ազատության հարցը պետք է լինի Հայաստանի Հանրապետության պետական օրակարգի առաջնահերթություններից մեկը։

Անտարբերությունն ու լռությունը կարող են աղետալի հետևանքների հանգեցնել։ Պետք է խոսենք նրանց մասին ամեն օր, պահանջենք նրանց ազատությունը և օգտագործենք բոլոր հնարավոր քաղաքական ու դիվանագիտական գործիքները՝ մեր հայրենակիցներին վերադարձնելու համար։ Ազատությո՛ւն գերիներին։ Վերադարձ՝ հայրենիք», - ամփոփել է ՀՅԴ Գերագույն մարմնի անդամը։

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Փորձագետների գնահատմամբ ՝ նրանք մի քանի հարյուր են ։ Այսօր Ադրբեջանի իշխանությունները հաստատում են իրենց մոտ 19 հայերի առկայությունը ։ Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ․ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:

Բաքվի խամաճիկային դատարանը շինծու մեղադրանքներով  ցմահ ազատազրկման է դատապարտել Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին, իսկ Բակո Սահակյանին և Արկադի Ղուկասյանին եւ Ռուբեն Վարդանյանին՝ 20 տարվա ազատազրկման: Մնացած արցախցիներին, այսպես կոչված, դատարանը դատապարտել է մինչև 15 տարվա ազատազրկման։ 

Հավելենք, որ սեպտեմբերի 9-ին Արցախի խորհրդարանի խոսնակ Դավիթ Իշխանյանը հերթական ուղերձն է հղել Բաքվի բանտից, որում անդրադարձել է Հայաստանի և Ադրբեջանի օմբուդսմենների գործունեությանը և կոչ արել Հայաստանի իշխանություններին գոնե մի փոքր արժանապատվություն դրսեւորել: