Հայաստանում համայնքների խոշորացման գործընթացը կշարունակվի

ԱրմԻնֆո. Հայաստանում կշարունակվի համայնքների խոշորացման գործընթացը։ ՀՀ Ազգային ժողովի տարածքային կառավարման և շրջակա միջավայրի պահպանության հարցերի մշտական հանձնաժողովը դրական եզրակացություն է տվել ՀՀ կառավարության ներկայացրած «Վարչատարածքային բաժանման մասին» օրենքում փոփոխություններին։

Ներկայացնելով փոփոխությունները՝ ՀՀ տարածքային կառավարման և ենթակառուցվածքների նախարարի տեղակալ Առնակ Ավետիսյանը նշել է, որ առաջարկվող նախաձեռնության շրջանակներում կստեղծվի Արարատ համայնքը, որը կընդգրկի Արարատ և Վեդի քաղաքները, ինչպես նաև Արարատ, Ավշար, Արմաշ, Երասխ, Զանգակատուն, Լանջար, Նոյակերտ, Ուրցալանջ, Պարույր Սևակ, Սուրենավան, Վարդաշատ, Տիգրանաշեն, Հայկավան, Արալեզ, Գինեվետ, Գոռավան, Դաշտաքար, Եղեգնավան, Լանջանիստ, Լուսաշող, Լուսառատ,  Նոր Կյանք, Նոր Ուղի, Շաղափ, Ոսկետափ, Սիսավան, Վանաշեն, Տափերական,  Ուրցաձոր, Փոքր Վեդի գյուղերը։

Նախատեսվում է նաև խոշորացնել Վանաձոր համայնքը, որի կազմում, բացի Վանաձորից, կընդգրկվեն Գուգարք, Դարպաս, Շահումյան, Փամբակ, Ազնվաձոր, Անտառամուտ, Արջուտ, Բազում, Գուշար, Դեբեդ, Եղեգնուտ, Ժամատուն, Լեռնապատ, Լեռնաջուր, Ծաղկոց, Մարգահովիտ, Ձորագետ, Ձորագյուղ, Վահագնաձոր, Վահագնի, Քարաբերդ գյուղերը։

Փոխնախարարը հիշեցրել է, որ խոշորացման գործընթացը տեղի է ունենում 2016 թվականից։  Առնակ Ավետիսյանի խոսքով՝ տեղական և միջազգային ուսումնասիրությունները ցույց են տվել, որ տարածաշրջանային մոդելով իրականացվող համայնքների միավորումներն առավել արդյունավետ են և նպաստում են համայնքների կողմից քաղաքացիներին մատուցվող ծառայությունների որակի բարձրացմանը, համայնքների ներուժի հետագա ամրապնդմանը և համայնքային ու տեղական ինքնակառավարման ոլորտում բարեփոխումների առավել արդյունավետ իրականացմանը։ 2016 թվականի փետրվարի 14-ից համայնքների միավորման 99 ծրագիր է իրականացվել, որոնց արդյունքում 915 համայնքի փոխարեն ձևավորվել է 57  համայնք։ Օրենքի ընդունումից հետո դրանց թիվը կկազմի 55, իսկ համայնքների ընդհանուր թիվը, ներառյալ Երևանը, Գյումրին և ևս 5 չմիավորված համայնքները, կկազմի 62։

«Ուժեղ Հայաստան» ընդդիմադիր խմբակցության պատգամավորները մտահոգություն են հայտնել համայնքների միավորման գործընթացի առնչությամբ՝ նշելով բուն համայնքներում քննարկումների անբավարարությունը։ Հնչել է տեսակետ, որ այս առաջարկը պայմանավորված է քաղաքական նպատակահարմարությամբ, այլ ոչ թե համայնքների շահերով։

Այնուամենայնիվ, իշխող խմբակցության պատգամավորները քվեարկել են փաստաթղթի ընդունման օգտին, որն այժմ կքննարկվի ՀՀ Ազգային ժողովի լիագումար նիստում ։