Փաշինյանի՝ Մակրոնի հետ հանդիպման ժամանակ քննարկվել է Բարգուշատի թունելի կառուցման նախագիծը

ԱրմԻնֆո.  Ելիսեյան պալատում տեղի է ունեցել ՀՀ վարչապետ Նիկոլ Փաշինյանի և Ֆրանսիայի նախագահ Էմանուել Մակրոնի հանդիպումը։ Այս մասին հայտնել է ՀՀ կառավարության մամուլի ծառայությունը։

Էմանուել Մակրոնը շնորհակալություն է հայտնել վարչապետին՝ Միջազգային առաջին տիեզերական գագաթնաժողովին մասնակցելու հրավերն ընդունելու համար։ Ֆրանսիայի նախագահը մեծ նշանակություն է տվել երկկողմ հարաբերությունների հետագա զարգացմանը բոլոր ուղղություններով՝ ռազմավարական համագործակցության վերաբերյալ երկկողմ հռչակագրին համապատասխան։

Նիկոլ Փաշինյանն իր հերթին, շնորհակալություն հայտնելով հրավերի և ջերմ հյուրընկալության համար, նշել է տիեզերական ոլորտում Ֆրանսիայի հետ համագործակցության խորացման անհրաժեշտությունը։ Պետության ղեկավարը նշել է, որ Հայաստանն այս ուղղությամբ ավելի բովանդակային գործընկերության շահագրգռվածություն ունի։

Զրուցակիցները նշել են, որ տնտեսական համագործակցությունը երկու երկրների միջև ռազմավարական գործընկերության առաջնահերթ ուղղություններից մեկն է։ Այս համատեքստում կողմերն ընդգծել են Հայաստանի Հանրապետության կառավարության կողմից տնտեսության դիվերսիֆիկացմանն ուղղված քայլերի հետևողական իրականացումը։

Գոհունակությամբ նշվել է, որ Բարգուշատի թունելի շինարարությունը մտել է բովանդակային փուլ։ Այս կապակցությամբ ընդգծվել է շինարարական աշխատանքների հնարավորինս շուտ մեկնարկի կարևորությունը։

Անդրադարձ է կատարվել նաև տարածաշրջանային գործընթացներին։ Նշվել է խաղաղության ամրապնդմանն ուղղված քայլերի հետևողական կատարման կարևորությունը։

Այնուհետև Ֆրանսիայի նախագահ Էմանուել Մակրոնի անունից պաշտոնական ընթրիք է կազմակերպվել Միջազգային տիեզերական գագաթնաժողովին մասնակցող պետությունների և կառավարությունների ղեկավարների պատվին։

Նշենք, որ հանդիպման ընթացքում հիշատակված Բարգուշատի թունելը Հայաստանում կառուցում է ֆրանսիական երկու ընկերություններից՝ Vinci Construction Grands Projects-ից և Razel - Bec Sas-ից կազմված կոնսորցիումը։ Բարգուշատի թունելը

- Հայաստանում առանցքային ենթակառուցվածքային նախագիծ է, որը կդառնա երկրի ամենաերկար թունելը (մոտ 8,65 կմ)։ Այն Սիսիան-Կաջարան նոր ճանապարհի կառուցման լայնածավալ նախագծի մաս է, որը մտնում է «Հյուսիս-Հարավ» տրանսպորտային միջանցքի մեջ։  60 կիլոմետր երկարությամբ նոր Սիսիան-Կաջարան ճանապարհը լինելու է երկրորդ տեխնիկական կարգի։ Այն անցնելու է բարդ լեռնային ռելիեֆով, ներառելու է 27 կամուրջ՝ 4,7 կմ ընդհանուր երկարությամբ, և 9 թունել՝ 12,5 կմ ընդհանուր երկարությամբ (ամենաերկարը՝ մոտ 8,6 կմ երկարությամբ Բարգուշատի թունելը)։  Առաջիկա հինգ տարիներին ԵՄ-ի կողմից Հայաստանին տրամադրվող 2,6 մլրդ եվրոյի ֆինանսական աջակցության ընդհանուր փաթեթից 600 մլն եվրոն կուղղվի Կաջարան-Սիսիան ճանապարհի կառուցմանը։ Եվրասիական կայունացման և զարգացման հիմնադրամը կտրամադրի ևս 200 մլն դոլար։ ԱԶԲ-ն արդեն հատկացրել է 500 մլն դոլար։  60 կմ երկարությամբ ճանապարհահատվածի հաշվարկային արագությունը լինելու է 80 կմ/ժ։  «Հյուսիս-Հարավ» նախագիծը թույլ կտա Իրանի սահմանից մինչև Վրաստանի սահման հեռավորությունը կրճատել 556-ից մինչև 490 կիլոմետրի։ Ճանապարհը զգալիորեն կհեշտացնի դեպի Սև ծով ելքը ոչ միայն Հայաստանի, այլև Իրանի համար։ Նախագիծը Հայաստանի (Մեղրի-Կապան-Գորիս-Երևան-Աշտարակ-Գյումրի-Բավրա) և Վրաստանի տարածքով կապահովի ելք դեպի Սև ծով և եվրոպական երկրներ։  Միջանցքի շինարարությունն ի սկզբանե նախատեսվում էր ավարտել 2019 թվականին։  Ծրագրի արժեքը մշտապես վերանայվել է՝ ավելացման ուղղությամբ։  2012 թվականի սեպտեմբերին, երբ սկսվեց ավտոմայրուղու շինարարությունը, Հայաստանի կառավարության ներկայացուցիչների նշած գումարը մի քանի անգամ պակաս էր՝ 962 մլն դոլար, իսկ այսօր խոսքը շուրջ 3 մլրդ դոլարի ներդրումների մասին է։

Նշենք նաև, որ VINCI Construction Grands Projets և Razel-Bec Sas ընկերությունները հայտնի են որպես խոշոր միջազգային շինարարական ընկերություններ, որոնք զբաղվում են բարդ թունելների և ենթակառուցվածքային օբյեկտների կառուցմամբ։