"Հայաստան-Իրան ռազմավարական համագործակցության զարգացման կենտրոն" հիմնադրամը և ՀԱԿ կուսակցությունը փոխըմբռնման հուշագիր են ստորագրել

Արմինֆո."Հայաստան-Իրան ռազմավարական համագործակցության զարգացման կենտրոն" հիմնադրամի ղեկավար Պույա Հոսեյնին եւ «Հայ ազգային կոնգրես» կուսակցության փոխնախագահ Լեւոն Զուրաբյանը սեպտեմբերի 1-ին Երեւանում փոխըմբռնման հուշագիր են ստորագրել:

Հուշագրով կողմերը վերահաստատել են իրենց պատրաստակամությունը՝ նպաստելու երկկողմ համագործակցության խորացմանը կարծիքների փոխանակման, համատեղ սեմինարների և միջոցառումների անցկացման, երկրների միջև քաղաքական, տնտեսական և մշակութային կապերի խորացման խրախուսման, ընդհանուր նպատակների իրականացման համար փորձի և տեղեկատվության փոխանակման շրջանակներում:

Ներկայացնելով հայկական կողմի դիրքորոշումը՝ Զուրաբյանը նշել է, որ հայ և իրանցի ժողովուրդները ոչ միայն բարեկամ, այլև եղբայրական ժողովուրդներ են: "Իրանը մեծ դեր է խաղացել մեր երկրի անկախության ամրապնդման գործում։ Հայաստանի և Իրանի միջև հաստատվել է այնպիսի համագործակցություն, որը ձեռնտու է ինչպես հայկական, այնպես էլ իրանական կողմին։ Արցախի հարցում Իրանի դիրքորոշումը միշտ եղել է հավասարակշռված և ազնիվ։ Եվ Իրանն ամեն ինչ արել է, որպեսզի Հայաստանի և Ադրբեջանի միջև հակամարտությունը լուծվի խաղաղ ճանապարհով", - նշել է քաղաքական գործիչը։

Բայց, ամենագլխավորը, ըստ Զուրաբյանի, այն է, որ Իրանը Հայաստանի համար մնում է "կյանքի ճանապարհ", այսինքն ՝ ճանապարհ դեպի արտաքին աշխարհ: "Այդպես էր 1990-ականներին, երբ Հայաստանը շրջափակման մեջ էր գտնվում Թուրքիայի և Ադրբեջանի կողմից։ Իրանն այն ժամանակ մնում էր միակ հնարավոր ճանապարհը դեպի արտաքին աշխարհ։ Այսօր ոչինչ չի փոխվել, եւ Իրանը մնում է այն երկիրը, որի հետ մենք կարող ենք լավ հարաբերություններ ունենալ, եւ որի շնորհիվ մենք կարող ենք համագործակցել Գլոբալ հարավի երկրների աճող տնտեսության հետ", - ընդգծել է Զուրաբյանը։

ՀԱԿ փոխնախագահը նաև հիշեցրել է Հայաստանի, Թուրքիայի և Ադրբեջանի միջև ընթացող գործընթացներում Իրանի դերի մասին: "Հայաստանին պետք է խաղաղություն այդ երկրների հետ, բայց այն չպետք է կառուցվի մեր երկրի միակողմանի կախվածության վրա։ Ցավոք, սա հենց այն ձևաչափն է, որն այսօր առաջարկվում է Հայաստանին։ Եվ հենց այստեղ կարևոր է Իրանի դերը։ Հայ-իրանական համագործակցության հնարավորությունները հաշվելի և փոխարինելի չեն", - կարծում է քաղաքական գործիչը։

Զուրաբյանի խոսքով՝ Հայաստանը պետք է կամուրջ դառնա Արևմուտքի և Արևելքի, ինչպես նաև Հյուսիսի և Հարավի միջև, քանի որ դա նրա անկախության և զարգացման գլխավոր երաշխիքն է: "Հետևաբար, մենք մեծ հետաքրքրություն ունենք Իրանի հետ հարաբերությունների զարգացման, ընդհանուր նախագծերի իրականացման հարցում և կարծում ենք, որ հենց "Հայաստան - Իրան ռազմավարական համագործակցության զարգացման կենտրոն" հիմնադրամն էայն լուրջ կառույցը, որի հետ հնարավոր կլինի առաջ տանել այդ գաղափարները: Եվ այսօր մեր ստորագրած հուշագիրը ցույց է տալիս, որ մենք ցանկանում ենք առաջ տանել այդ օրակարգը", - հայտարարել է ՀԱԿ փոխնախագահը։

Հիմնադրամի ղեկավար, իրանցի քաղաքագետ Պույա Հոսեյնին, իր հերթին, նշել է, որ Իրանն ունի 15 հարևան, բայց նրանցից ամենահուսալին միշտ եղել է Հայաստանը: "Երկրների միջև հարաբերություններն այլընտրանք չունեն։ Մեր երկրների անվտանգությունը նույնպես փոխկապակցված է։ Բայց, նույնիսկ, այդքան մեծ ներուժի առկայության դեպքում, մենք պատշաճ կերպով չենք զարգացրել մեր հարաբերությունները։ Օրինակ, մենք կարող էինք ավելացնել մեր ապրանքաշրջանառությունը։ Փորձը ցույց է տվել, որ հույսը դնելով միայն պետական ռեսուրսների վրա, դրան հնարավոր չէ հասնել։ Եվ այսօրվա հուշագրի ստորագրումը հենց դրա մասին է, որ մենք պետք է աշխատենք հայ ժողովրդի բոլոր ներկայացուցիչների հետ, օգտագործենք բոլոր հնարավոր ռեսուրսները երկրների միջև հարաբերությունների զարգացման համար։ Խոսքը բոլոր կուսակցությունների, քաղաքական և տնտեսական միավորումների մասին է ։ Դա կհանգեցնի ինչպես տնտեսական զարգացման, այնպես էլ երկու երկրների անվտանգության ապահովմանը ։ Դա նաեւ կօգնի երկրներին հաղթահարել "միջազգային փոթորիկները"։ Այդ ռեսուրսը մենք ունենք, և անհրաժեշտ է բոլոր ջանքերը գործադրել այդ ուղղությամբ", - նշել է Հոսեյնին։

Նա նաև ընդգծել է երկու երկրների համար "Հյուսիս - Հարավ" տրանսպորտային միջանցքի կարևորությունը, հատկապես՝ այլ երկրների կողմից Հայաստանը և Իրանը շրջանցող երթուղիներ անցկացնելու փորձերի ֆոնին: "Այդ ճանապարհները չպետք է, պարզապես, անցնեն մեր տարածքներով։ Անհրաժեշտ է  հասնել այն բանին, որ երկու երկրներն էլ կարողանան աշխարհաքաղաքական նշանակություն ներկայացնել։ Պետք է ունենալ ընդհանուր ռազմավարություն՝ մեր երկրների երկարաժամկետ անվտանգությունն ու շահերն ապահովելու համար", - ամփոփել է իրանցի քաղաքական գործիչը։