Ստեփանակերտի մոտ վառելիքի պահեստում պայթյունի հետևանքով չորս հարազատ կորցրած արցախցի ընտանիքը անօթևան մնալու վտանգի առջեւ է. բաց նամակ ՀՀ իշխանություններին

Արմինֆո. Արցախցի Բերտա Շահրամանյանը, ով Արցախի բնակչության բռնի տեղահանման օրերին Ստեփանակերտի վառելիքի պահեստում տեղի ունեցած պայթյունի հետևանքով կորցրել է ընտանիքի միանգամից չորս անդամի ՝ հորը, երկու անչափահաս եղբայրներին և ամուսնուն, բաց նամակով դիմել է Հայաստանի իշխանություններին:

«Ես Բերտա Շահրամանյանն եմ՝ Արցախի Հանրապետության քաղաքացի (այլևս ՀՀ)։ 2023 թվականի սեպտեմբերին Արցախի Հանրապետության ժողովրդի տեղահանման օրերին տեղի ունեցած պայթյունի ժամանակ կորցրել եմ ընտանիքիս 4 անդամներին՝ հորս, 2 անչափահաս եղբայրներիս և ամուսնուս։ Այդ դեպքից անցել է գրեթե 3 տարի։ Ես, մայրս և զինվորական հաշմանդամության կարգ ունեցող եղբայրս ապրում ենք վարձով։ Այս ընթացքում պետությունից չենք ստացել ոչ մի աջակցություն։ Մինչ օրս հարազատներս չեն ստացել որևէ կարգավիճակ, մինչդեռ այդ պայթյունը ռազմական գործողությունների հետևանք էր։ Այսօր ես և ընտանիքս կանգնած ենք բավականին մեծ խնդրի առաջ, քանի որ բնակարանների վարձերի թանկացման խնդիրը հասել է նաև մեզ։ Ցավոք սրտի ես և ընտանիքս ի վիճակի չենք վճարելու ամսական 300.000 ՀՀ դրամ վարձի գումար։ Պետության կողմից տրամադրվող 3-4 մլն սերտիֆիկատներով ներկայիս շուկայական գներով անհնար է նույնիսկ 1 սենյականոց բնակարան ձեռք բերել, իսկ մենք մի քանի օրվա ընթացքում պետք է հանձնենք ներկայիս բնակարանը։ Մինչ այսօր ես խելամիտ գնով վարձով բնակարան չեմ կարողացել գտնել, քանի որ ես՝ տան միակ աշխատողս աշխատում եմ Երևանում և բնականաբար բնակարան փնտրում եմ Երևանում։ Դիմում եմ Ձեզ մեծ խնդրանքով, հաշվի առնել ընտանիքիս ներկայիս ծանր իրավիճակը և որևէ ձևով լուծում տալ այս մեծ խնդրին, քանի որ մի քանի օրից ես և ընտանիքս կարող ենք մնալ դրսում։

Եվ վերջում ուզում եմ տեղեկանալ, արդյո՞ք պատկան մարմինների կողմից իրականացվում է վերահսկողություն և արդյո՞ք բնակարանների սեփականատերերի կողմից ստացված եկամտից եկամտահարկ է վճարվում պետությանը», - ասվում է Բերտա Շահրամանյանի ֆեյսբուքքքյան էջում հրապարակված բաց նամակում։

Նշենք, որ օրեր առաջ Արցախի պետնախարար Նժդեհ Իսկանդարյանն ահազանգում էր, որ Արցախից բռնի տեղահանված ևս մեկ ընտանիք հայտնվել է փողոցում: Մասնավորապես, նա պատմել է, որ կինն իր չորս անչափահաս երեխաների հետ ապրելու տեղ չունի, քանի որ նրանցից պահանջել են միանգամից երկու ամսվա վարձավճար, մինչդեռ, նրանք նման հնարավորություն չունեն: Նրա խոսքով ՝ ընտանիքը ժամանակավորապես բնակվում է Երևանում Արցախի ներկայացուցչության շենքում՝ մինչև խնդիրը լուծվի:

Նկատենք, որ այսօր Երևանում վարձավճարների կտրուկ բարձրացման ֆոնին հազարավոր արցախցիներ կարող են հայտնվել փողոցում ՝ պետության պատշաճ աջակցության բացակայության պատճառով ։