«Հայաստան» դաշինք․ Հայաստանի իշխանությունը որդեգրել է ընդդիմությանը մեկուսացնելու եւ դիմադրության բոլոր հնարավոր օջախները ոչնչացնելու քաղաքականություն

Արմինֆո. Հայաստանում իշխող վարչախումբը, ընդունելով արտաքին բոլոր պարտադրանքները, որդեգրել է ընդդիմությանը մեկուսացնելու, դիմադրության բոլոր հնարավոր օջախները ոչնչացնելու քաղաքականություն։ Նման հայտարարությամբ է հանդես եկել "Հայաստան" դաշինքի մամուլի ծառայությունը՝ ՀՀ երկրորդ նախագահ Ռոբերտ Քոչարյանի ընտանիքին պատկանող տներում և ընկերություններում վաղ առավոտից տեղի ունեցող խուզարկությունների ֆոնին։  

«ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանի և նրա ընտանիքի անդամների նկատմամբ իրականացվող ապօրինի գործողությունները լեգիտիմությունը կորցրած, սեփական իշխանությունը բացառապես ապօրինություններով պահող վարչախմբի հերթական ցինիկ դրսևորումներն են:

Սա իրավական գործընթաց չէ. սա պետական ապարատի բացահայտ ծառայեցումն է մեկ անձի քաղաքական վախերին ու վրեժխնդրությանը: Խորհրդարանական ամբիոնից հնչող սպառնալիքներին անմիջապես հաջորդող ուժային արշավները փաստում են մեկ բան՝ իշխող վարչախումբը, ընդունելով արտաքին բոլոր պարտադրանքները, որդեգրել է ընդդիմությանը մեկուսացնելու դիմադրության բոլոր հնարավոր օջախները ոչնչացնելու քաղաքականություն։

Սեփական ընտրազանգվածի համար էժանագին տեսարաններ բեմադրելով՝ գործող իշխանությունը փորձում է նաև խորացնել հասարակության մեջ առկա վախի մթնոլորտը:

«Հայաստան» դաշինքը հայտարարում է․

Շանտաժի, ապօրինի վարույթների և շինծու հետապնդումների լեզվով մեզ հետ խոսելն ապարդյուն է: Ո՛չ Նախագահ Քոչարյանին, ո՛չ նրա ընտանիքին և ո՛չ էլ մեր քաղաքական թիմին հնարավոր չէ ընկճել կամ պարտադրել հաշտվել ստեղծված իրավիճակի հետ:

Մենք շարունակելու ենք մեր պայքարը և գործադրելու ենք բոլոր ջանքերը՝ Հայաստանին պարտադրվող նոր զիջումները դիմագրավելու համար։ Որևէ բռնապետություն հավերժ չէ, և ապօրինությունների հեղինակներն ու կատարողները կանգնելու են պատասխանատվության առջև», - ասվում է հայտարարությունում:

Հիշեցնենք, որ առավոտյան հայտնի էր դարձել, որ ուժայինները խուզարկությունից հետո ՀՀ երկրորդ նախագահ Ռոբերտ Քոչարյանին տարել են Հակակոռուպցիոն կոմիտե: Բացի այդ, օգոստոսի 25-ի վաղ առավոտից խուզարկություններ են կատարվել նաև Լևոն Քոչարյանի տանը: Դրանք տևել են 7 ժամ։ Հայտնի է դարձել նաև, որ խուզարկություններ են կատարվել Քոչարյանի ընտանիքին պատկանող տասնյակ ընկերությունների հասցեներում: Ավելի ուշ Հայաստանի Հակակոռուպցիոն կոմիտեում հաստատել են Ռոբերտ Քոչարյանի և նրա որդու ՝ Սեդրակ Քոչարյանի ձերբակալության փաստը: Ռոբերտ Քոչարյանին մեղադրանք է առաջադրվել պաշտոնեական դիրքի չարաշահման, առանձնապես խոշոր չափերով կաշառք ստանալու և փողերի լվացման համար: Գործով անցնում է ևս 9 մարդ ։ ՀՀ երկրորդ նախագահի փաստաբան Արամ Օրբելյանը հաղորդել է, որ Քոչարյանը ձերբակալվել է հունիսյան խորհրդարանական ընտրություններից հետո նրան առաջադրված մեղադրանքին նման մեղադրանքով: Օրբելյանը հստակեցրել է, որ այն կապված է իր նախագահության տարիներին Քոչարյանի կողմից կառավարության որոշ որոշումների վավերացման հետ ։ Քիչ անց ՀՀ երկրորդ նախագահի գրասենյակից հաղորդել են, որ Ռոբերտ Քոչարյանը հոսպիտալացվել է Հակակոռուպցիոն կոմիտեի շենքից ՝ ավելի վաղ տարած վիրահատության պատճառով: Ուշագրավ է, որ նախօրեին ՀՀ վարչապետ Նիկոլ Փաշինյանը իրավապահ մարմիններին հրահանգել էր Քոչարյանին և ՀՀ երրորդ նախագահ Սերժ Սարգսյանին զրկել իրենց ունեցվածքից: