Հայաստանի ՔԿ․ Ռոբերտ Քոչարյանի ընկերությունների տնօրենները ձերբակալվել են

Արմինֆո. Երկրորդ նախագահ Ռոբերտ Քոչարյանին պատկանող ընկերությունների տնօրենների նկատմամբ քրեական հետապնդում է հարուցվել. նրանք ձերբակալվել են:

Ինչպես ԱրմԻնֆո-ին հաղորդել են ՀՀ քննչական կոմիտեից, ՔԿ տնտեսական հանցագործությունների և մաքսանենգությունների քննության գլխավոր վարչությունում առանձնապես խոշոր չափերով հարկեր չվճարելու դեպքերի առթիվ քննվող քրեական վարույթներով օգոստոսի 25-ին միաժամանակյա խուզարկություններ են կատարվել տնտեսավարողների գործունեության և բնակության ընդհանուր թվով 17 հասցեներում, որոնց արդյունքում հայտնաբերվել և վերցվել են քրեական վարույթների համար նշանակություն ունեցող փաստաթղթեր և առարկաներ:

«Տնտեսավարող սուբյեկտների գործունեության հասցեները ապացուցողական և վարութային գործողություններ իրականացնելու նպատակով ՀՀ քրեական դատավարության օրենսդրությամբ սահմանված կարգով կապարակնքվել են: 

Հանցանքների կատարումը վկայող փաստերի հիման վրա ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչների կողմից միջնորդություններ են ներկայացվել հսկող դատախազին՝ տնօրեններ Ի.Հ.-ի, Ա.Ա.-ի, Կ.Ա.-ի և նախկին տնօրեն Հ.Մ.-ի նկատմամբ Քրեական օրենսգրքի 290-րդ հոդվածի 3-րդ մասի 2-րդ կետով հանրային քրեական հետապնդում հարուցելու մասին, որոնք բավարարվել են: Վերջիններս ձերբակալվել են: Նրանց նկատմամբ կալանքը որպես խափանման միջոց կիրառելու վերաբերյալ միջնորդություններ են ներկայացվելու դատարան: 

Հիշյալ տնտեսվարող սուբյեկտներով պետությանը պատճառվել է շուրջ 2 մլրդ 682 մլն 21 հզր 224 ՀՀ դրամի վնաս», - ասվում է ՔԿ հաղորդագրությունում:

Հիշեցնենք, որ առավոտյան հայտնի էր դարձել, որ ուժայինները խուզարկությունից հետո ՀՀ երկրորդ նախագահ Ռոբերտ Քոչարյանին տարել են Հակակոռուպցիոն կոմիտե: Բացի այդ, օգոստոսի 25-ի վաղ առավոտից խուզարկություններ են կատարվել նաև Լևոն Քոչարյանի տանը: Դրանք տևել են 7 ժամ։ Հայտնի է դարձել նաև, որ խուզարկություններ են կատարվել Քոչարյանի ընտանիքին պատկանող տասնյակ ընկերությունների հասցեներում: Ավելի ուշ Հայաստանի Հակակոռուպցիոն կոմիտեում հաստատել են Ռոբերտ Քոչարյանի և նրա որդու ՝ Սեդրակ Քոչարյանի ձերբակալության փաստը: Ռոբերտ Քոչարյանին մեղադրանք է առաջադրվել պաշտոնեական դիրքի չարաշահման, առանձնապես խոշոր չափերով կաշառք ստանալու և փողերի լվացման համար: Գործով անցնում է ևս 9 մարդ ։ ՀՀ երկրորդ նախագահի փաստաբան Արամ Օրբելյանը հաղորդել է, որ Քոչարյանը ձերբակալվել է հունիսյան խորհրդարանական ընտրություններից հետո նրան առաջադրված մեղադրանքին նման մեղադրանքով: Օրբելյանը հստակեցրել է, որ այն կապված է իր նախագահության տարիներին Քոչարյանի կողմից կառավարության որոշ որոշումների վավերացման հետ ։ Քիչ անց ՀՀ երկրորդ նախագահի գրասենյակից հաղորդել են, որ Ռոբերտ Քոչարյանը հոսպիտալացվել է Հակակոռուպցիոն կոմիտեի շենքից ՝ ավելի վաղ տարած վիրահատության պատճառով: Ուշագրավ է, որ նախօրեին ՀՀ վարչապետ Նիկոլ Փաշինյանը իրավապահ մարմիններին հրահանգել էր Քոչարյանին և ՀՀ երրորդ նախագահ Սերժ Սարգսյանին զրկել իրենց ունեցվածքից: