Դատարանը ՀՀ երրորդ նախագահին թույլատրել է չմասնակցել դատական նիստերին

Արմինֆո. Օգոստոսի 20-ին Հակակոռուպցիոն դատարանում դատավոր Արամ Գրիգորյանի նախագահությամբ շարունակվել է ՀՀ երրորդ նախագահ Սերժ Սարգսյանի և մյուսների գործով դատավարությունը:

Սերժ Սարգսյանի պաշտպան Ամրամ Մակինյանը միջնորդություն է ներկայացրել առանց Սերժ Սարգսյանի մասնակցության դատաքննություն անցկացնելու վերաբերյալ: Դատավորը բավարարել է միջնորդությունը։

Համանման միջնորդություններ են ներկայացրել նաև ամբաստանյալներ Վալերի Գրիգորյանի եւ Ալեքսան Ալեքսանյանի փաստաբանները: Դատավորը բավարարել է երկու միջնորդությունները։

Ըստ էության, այս գործով դատավարությունները տեղի կունենան առանց մեղադրյալների մասնակցության, բայց եթե դատարանը որևէ փուլում նրանց ներկայությունը պարտադիր համարի, նրանք պետք է ներկայանան դատարան:

Դատական նիստն ավարտվել է, հաջորդ  նիստը տեղի կունենա սեպտեմբերի 9-ին՝ ժամը 14:30-ին:

Ըստ առաջադրված մեղադրանքի՝ 2000 թվականի մայիսի 20-ից մինչև 2007 թվականի ապրիլի 4-ը պաշտպանության նախարարի պաշտոնը զբաղեցրած Սերժ Սարգսյանը մեղադրվում է Իսակովի պողոտայում գտնվող հողամասերն ապօրինի օտարելու համար: Բացի այդ, 2025 թվականի նոյեմբերի 5-ին դատախազը Սերժ Սարգսյանի նկատմամբ հանրային քրեական վարույթ  նախաձեռնել 2003 թվականի ապրիլի 18-ին ընդունված Քրեական օրենսգրքի 311-րդ հոդվածի 4-րդ մասի 2-րդ կետով, որը համապատասխանում է գործող Քրեական օրենսգրքի 435-րդ հոդվածի 3-րդ մասի 3-րդ կետին: Նշված հոդվածը վերաբերում է առանձնապես խոշոր չափերի կաշառք ստանալուն։