Սարգիս Խանդանյան․ Չեմ կարծում, թե կա  պատճառ, որը կարող է մեզ ստիպել ակտիվացնել անդամակցությունը ՀԱՊԿ-ին

Արմինֆո. Հայաստանի դիրքորոշման մեջ ոչինչ չի փոխվել․ ինչպես հայտարարվել էր տարիներ առաջ, մենք սառեցրել ենք անդամակցությունը ՀԱՊԿ-ին և, ըստ էության, հիմա հետադարձ ճանապարհ չենք տեսնում։ Այդ մասին օգոստոսի 11-ին ճեպազրույցում հայտարարել է "Քաղաքացիական պայմանագիր" կուսակցության պատգամավոր, ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։

Ընդ որում, նա նշել է, որ հայկական կողմը հետեւելու է գործընթացների զարգացմանը եւ հայտարարություններին: "Չեմ կարծում, որ այստեղ կա պատճառ կամ հանգամանք, որը կարող է մեզ ստիպել ակտիվացնել մեր մասնակցությունը ՀԱՊԿ-ին։ Ձեզ հայտնի են պատճառները, որոնց հետեւանքով մենք սառեցրել ենք անդամակցությունը, և դրանք դեռ լուծված չեն: 2022-2023 թվականներին Հայաստանի ինքնիշխան տարածքի նկատմամբ տեղի ունեցածը դատապարտող քաղաքական մակարդակի հայտարարություններ անգամ չենք  տեսել", - նշել է խորհրդարանականը։

Անդրադառնալով լրագրողների հարցին, թե ինչպես կվարվի Հայաստանը, եթե երկիրը հեռացնեն կազմակերպությունից, Խանդանյանը նշել է, որ ցանկացած հայտարարություն կամ որոշում այս փուլում ժամանակավրեպ կլինի: Բայց հեռացման դեպքում, նրա ասելով, անհրաժեշտ կլինի քննարկել իրավիճակը, որպեսզի այն հաշվի առնվի ՀԱՊԿ-ի և այդ կազմակերպության անդամների հետ հետագա հարաբերություններում:

Հիշեցնենք, որ  2022 թվականի վերջից Հայաստանը բոյկոտում է ՀԱՊԿ շրջանակներում անցկացվող միջոցառումները։ 2024 թվականի փետրվարին ՀՀ վարչապետ Նիկոլ Փաշինյանը հայտարարել էր, որ Հայաստանը, գործնականում, սառեցրել է իր մասնակցությունը ՀԱՊԿ-ին, քանի որ կազմակերպությունը չի կատարել իր պարտավորությունները ՀՀ-ի հանդեպ, ինչը չէր կարող անհետևանք մնալ։ Իսկ արդեն 2024 թվականի սեպտեմբերի 18-ին Հայկական երկրորդ համաշխարհային գագաթնաժողովում Փաշինյանը հայտարարել է, որ ՀԱՊԿ-ը սպառնալիքներ է ստեղծում Հայաստանի անվտանգության, նրա հետագա գոյության, ինքնիշխանության և պետականության համար։