Հայ ռազմագերու փաստաբանն Ալիևից պահանջում է ապահովել իր պաշտպանյալի կապը տիկնոջ հետ

Արմինֆո. Արդեն 5,5 տարի Բաքվում պահվող հայ ռազմագերի Լյուդվիգ Մկրտչյանի փաստաբանը հրապարակայնորեն դիմել է Ադրբեջանի նախագահ Իլհամ Ալիևին ՝ պահանջելով ապահովել նրա կապը իր տիկնոջ հետ: 

"Օգնություն հայ որբերին> (SOAR) ընկերության ղեկավար, արգենտինահայ փաստաբան Լուսիանա Մինասյանը նշել է, որ Լյուդվիգ Մկրտչյանը վերջին անգամ տիկնոջ հետ շփվել է հունիսի 19-ին: "Թույլ տվեք Լյուդվիգ Մկրտչյանին անմիջապես զանգահարել իր տիկնոջը ՝ Հրանուշ Շահբազյանին։ Բավական է լռությունը: Բավական է անորոշությունը: Մեկ զանգ։ Հիմա", - գրել է Մինասյանը սոցիալական ցանցերում։ 

Նա արձանագրել է, որ մեկ զանգը նրան չի բուժի, բայց կնոջը հնարավորություն կտա իմանալ, թե արդյոք ամուսինը դեռ ողջ է, և գիտակցությունը տեղն է: Մինասյանը պատմել է, որ հունիսի 19-ին կայացած հեռախոսազրույցի ընթացքում Լյուդվիգ Մկրտչյանը պատմել է, որ իրեն այնքան թույլ է զգացել, որ կորցրել է գիտակցությունը: 

Նշենք, որ հուլիսի 14-ին փաստաբանը հաղորդել էր, որ Լյուդվիգ Մկրտչյանն առողջական լուրջ խնդրի է բախվել և պայքարում է կյանքի համար: Նա այն ժամանակ պատմել էր, որ 56-ամյա Մկրտչյանի լեյկոցիտների մակարդակը կազմում է 14,27, ինչը նորմայից գրեթե կրկնակի բարձր է, եւ դա ուղեկցվում է լայնածավալ բորբոքումով: Նա նաեւ սրտի ծանր ախտահարում ունի․ ձախ փորոքի հիպերտրոֆիա, դիաստոլիկ դիսֆունկցիա, աորտայի անբավարարություն: ձախ փորոքի հիպերտրոֆիա, դիաստոլիկ դիսֆունկցիա, աորտայի անբավարարություն: Հայ ռազմագերին հաճախ գլխացավեր և գլխապտույտ ունի, ինչպես նաև՝ ցավեր կրծքավանդակի շրջանում: 

Նշենք, որ Լյուդվիգ Մկրտչյանը Ադրբեջանի կողմից գերեվարվել էր 2020 թվականի աշնանը՝ 44-օրյա պատերազմի ընթացքում։ Հայկական և միջազգային իրավապաշտպան կազմակերպությունները բազմիցս բարձրացրել են Ադրբեջանում պահվող հայ ռազմագերիների և քաղաքացիական անձանց ճակատագրի հարցը՝ Բաքվին կոչ անելով պահպանել միջազգային մարդասիրական իրավունքի նորմերը և ապահովել նրանց համար Կարմիր խաչի միջազգային կոմիտեի ներկայացուցիչների բժշկական օգնության հասանելիությունը:

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը: Փորձագետների գնահատմամբ ՝ նրանք մի քանի հարյուր են ։ Այսօր Ադրբեջանի իշխանությունները հաստատում են իրենց մոտ 19 հայերի առկայությունը ։ Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ․ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:
 
Բաքվի խամաճիկային դատարանը շինծու մեղադրանքներով  ցմահ ազատազրկման է դատապարտել Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին, իսկ Բակո Սահակյանին և Արկադի Ղուկասյանին եւ Ռուբեն Վարդանյանին՝ 20 տարվա ազատազրկման: Մնացած արցախցիներին, այսպես կոչված, դատարանը դատապարտել է մինչև 15 տարվա ազատազրկման։