Ընդդիմադիրը՝ Ծառուկյանի շուրջ գործընթացի մասին․ Հայաստանը վերածվել է համակենտրոնացման ճամբարի

Արմինֆո.  Հայաստանը վերածվել է համակենտրոնացման ճամբարի. այդ մասին են վկայում այսօր երկրում ընթացող գործընթացները։ Այդ մասին  հուլիսի 24-ին լրագրողների հետ զրույցում հայտարարել է 8-րդ գումարման ԱԺ "Հայաստան" խմբակցության պատգամավոր Գառնիկ Դանիելյանը ՝ ՊԵԿ քննչական բաժնի շենքի դիմաց, որտեղ ընթանում է "Բարգավաճ Հայաստան" կուսակցության առաջնորդ Գագիկ Ծառուկյանի հարցաքննությունը։

Ծառուկյանի նկատմամբ Հայաստանի իշխանությունների գործողություններին գնահատական տալու խնդրանքին ի պատասխան՝ քաղաքական գործիչը նշել է, որ Հայաստանում կառավարող ուժը նպատակ ունի ընդդիմադիր գործիչներին և ընդդիմադիր հայացքներ ունեցող քաղաքացիներին պահել վախի մեջ և նստեցնել:

"Երկրում տիրում է համատարած վախի մթնոլորտ, ընդդիմադիր հայացքներ ունենալը դարձել է քրեորեն պատժելի։ Այն ամենը, ինչ տեղի է ունեցել մինչև այս պահը, և, մասնավորապես, Ծառուկյանի պարագայում, դա քաղաքական հետապնդում է", - հայտարարել է նա։

Դանիելյանը հայտարարել է, որ անձամբ ճանաչում է Ծառուկյանի ընտանիքին և  քաջատեղյակ է Հայաստանի տնտեսությունում նրա ներդրման մասին: Նրա խոսքով ՝ Ծառուկյանն իր ներդրումն է ունեցել Հայաստանի տնտեսությունը ճգնաժամից դուրս բերելու գործում։ "Հայաստանում իրավական համակարգը չի գործում, անմեղության կանխավարկածը չեղարկվել է։ Մարդկանց կալանավորում են մեկ անձի ցուցումով", - հայտարարել է Դանիելյանը, հավելելով, որ միջազգային կազմակերպություններն ու իրավապաշտպանները բերանները ջուր են առել և լռում են։

Ընդդիմադիրն ուշադրություն է հրավիրել այն հանգամանքի վրա, որ օրը ցերեկով շարքային քաղաքացիներին զրկում են վաստակելու հնարավորությունից՝ մեկ մարդու ցուցումով։ Դանիելյանը համոզմունք է հայտնել, որ եթե չկասեցվի այն, ինչ տեղի է ունենում, յուրաքանչյուրը կբախվի երկրում տեղի ունեցող կամայականություններին: "Այդ մարդիկ Հայաստանի թշնամիներն են։ Եթե այս իշխանություններն այսօր չհեռացվեն, Հայաստանի տնտեսությունը կհայտնվի խայտառակ վիճակում", - համոզմունք է հայտնել նա։

Նրա խոսքով՝ բիզնեսի նկատմամբ իշխանությունների այսօրվա գործողությունները նաեւ վանում են օտարերկրյա ներդրողներին։ Դանիելյանը վստահ է, որ ոչ ոք չի գա Հայաստան, տեսնելով, թե ինչ ներդրումային միջավայր է այստեղ ։ "Առկա իրողություններում ես չեմ կարող ասել, որ Հայաստանը զարգացման հեռանկարներ ունի", - ասել է քաղաքական գործիչը ՝ ազատություն մաղթելով բոլոր քաղբանտարկյալներին:

Հիշեցնենք, որ հուլիսի 6-ին "Բարգավաճ Հայաստան" կուսակցության առաջնորդ և գործարար Գագիկ Ծառուկյանին ձերբակալել և տեղափոխել էին ՀՀ քննչական կոմիտե: Նա մեղադրվում է խարդախություն կազմակերպելու և առանձնապես խոշոր չափերով դրամական միջոցներն օրինականացնելու (լվանալու) մեջ։ Քննության վարկածով՝ 2022-2024 թվականներին նրա ղեկավարությամբ գործող խումբը Հայաստանի և Իրանի միջև առևտրատնտեսական կապերի զարգացման պատրվակով Իրանի քաղաքացիների մասնակցությամբ ստեղծել է համատեղ իրավաբանական անձինք, որից հետո իրականացրել է խարդախ սխեմա ՝ պատճառելով ավելի քան 21 մլն դոլարի վնաս ։ Բացի այդ, Գագիկ Ծառուկյանին ևս մեկ մեղադրանք է առաջադրվել՝ ապօրինի որսի համար: Հուլիսի 7-ին դատարանը բավարարել է Ծառուկյանին երկու ամսով կալանավորելու մասին մեղադրող կողմի միջնորդությունը։ Գործի շրջանակներում հուլիսի 6-ին իրավապահ մարմինները խուզարկություններ են իրականացրել Ծառուկյանի հետ կապված ավելի քան 70 հասցեներում: Դրանից հետո բոլոր ձեռնարկությունների դռները կապարակնքվել են։

Նշենք, որ հուլիսի 16-ին Գլխավոր դատախազությունը հայտարարել էր, որ Հայաստանի հակակոռուպցիոն դատարանը բավարարել է Ծառուկյանի Արարատի ցեմենտի գործարանը պետության վերահսկողությանը հանձնելու իրենց հայցը: Ծառուկյանի գործարանի ազգայնացման գործընթացը սկսվել էր այն բանից հետո, երբ ՀՀ վարչապետ Նիկոլ Փաշինյանը մայիսի 20-ին Լոռու մարզում նախընտրական քարոզարշավի ժամանակ սպառնացել էր ազգայնացնել Գագիկ Ծառուկյանի բիզնեսը: Հուլիսի 16-ին հայտնի դարձավ նաև, որ Գագիկ Ծառուկյանին պատկանող "Մուլտի Վելնես" ընկերության շենքը հանձնվել է Երևանի քաղաքապետարանի տնօրինությանը: Իսկ հուլիսի 23-ին իրավապահները կնքել են Ծառուկյանին պատկանող "Առինջ Մոլ" առևտրի կենտրոնի տաղավարների մի մասը։