Քննչական կոմիտեն պարզաբանել է "Առինջ մոլ" առևտրի կենտրոնի տաղավարների մի մասի կապարակնքման պատճառները

Արմինֆո. Առինջի 3.5 հա մակերեսով հողամասի ինքնակամ կառույցները գտնվում են բարձր լարման էլեկտրահաղորդման գծերի տակ՝ վտանգելով քաղաքացիների կյանքն ու առողջությունը։ Այդ մասին ասվում է ՀՀ քննչական կոմիտեի հաղորդագրությունում։

Նշվում է, որ ՔԿ Կոտայքի մարզային քննչական վարչությունում քննվող քրեական վարույթի շրջանակում 2025 թվականի հունիսի 5-ին նշանակվել է համալիր փորձաքննություն, որի եզրակացությունը ստացվել է 2026 թվականի հունիսի 10-ին:

«Համաձայն փորձագետի եզրակացության՝ Աբովյան համայնքի գյուղ Առինջ հասցեում գտնվող 3.5 հա մակերեսով հողամասը փաստացի համադրվում է 110 կՎ լարման էլեկտրահաղորդման գծի զբաղեցրած և այդ գծի անվտանգության համար նախատեսված հողամասի հետ, բացի այդ, գտնվում է «Երկաթուղային տրանսպորտի մասին» ՀՀ օրենքի 15.1-ին հոդվածի 9-րդ մասով սահմանված՝ Երևան-Աբովյան 1520 մմ ռելսամիջի երկաթուղային գծի պաշտպանական գոտու տարածքում: 

Փորձագետը հանգել է այն հետևության, որ գյուղ Առինջ հասցեում գտնվող 3.5 հա մակերեսով հողամասի օտարման գործընթացը կազմակերպվել է առանց հաշվի առնելու տվյալ ժամանակահատվածում գործած ՀՀ հողային օրենսգրքի 60-րդ հոդվածով սահմանված պահանջները։

Փորձագետը փաստել է նաև, որ Առինջ հասցեում գտնվող 3.5 հա մակերեսով հողամասում առկա ինքնակամ կառույցները գտնվում են (կառուցված են) բարձր լարման էլեկտրահաղորդման գծերի անվտանգության գոտիներում, ինչպես նաև Երևան-Աբովյան 1520 մմ ռելսամիջի երկաթուղային գծի պաշտպանական գոտիներում։

Այսպիսով, հաշվի առնելով, որ Առինջ հասցեում գտնվող 3.5 հա մակերեսով հողամասում առկա որոշ ինքնակամ կառույցներ, ավտոկայանատեղին և դրան կից առևտրի տաղավարների մի մասը փաստացի անմիջականորեն գտնվում են բարձր լարման էլեկտրահաղորդման գծերի տակ և դրանց հետագա շահագործումը վտանգ է ներկայացնում քաղաքացիների կյանքի և առողջության համար, անվտանգության նկատառումներից ելնելով՝ վարույթն իրականացնող մարմնի կողմից կնիքվել են», - ասվում է ՔԿ հաղորդագրությունում։

Նշենք, որ այսօր "Բարգավաճ Հայաստան" կուսակցության կալանավորված առաջնորդ Գագիկ Ծառուկյանին պատկանող "Առինջ մոլ" առևտրի կենտրոնի մոտ բողոքի ակցիա է տեղի ունեցել: Իրավապահները կնքել են առևտրի կենտրոնի տաղավարների մի մասը։

Ինչպես լրագրողների հետ զրույցում պատմել է ցուցարարներից մեկը, իրենց տեղեկություններով, տաղավարները կնքված են, իբր, առեւտրի կենտրոնի մոտ բարձրավոլտ էլեկտրահաղորդման գծերի առկայության պատճառով: Հավաքվածներն ուշադրություն են հրավիրել այն հանգամանքին, որ այդ էլեկտրահաղորդման գծերը վաղուց են այնտեղ, իսկ հարցը միայն հիմա է բարձրացվում։ Դրա պատճառով, ինչպես նշել են ակցիայի մասնակիցները, նրանք մնացել են առանց վաստակի, ավելին,  նրանք կարող են զրկվել աշխատողներից։

Հիշեցնենք, որ հուլիսի 6-ին "Բարգավաճ Հայաստան" կուսակցության առաջնորդ և գործարար Գագիկ Ծառուկյանին ձերբակալել և տեղափոխել էին ՀՀ քննչական կոմիտե: Նա մեղադրվում է խարդախություն կազմակերպելու և առանձնապես խոշոր չափերով դրամական միջոցներն օրինականացնելու (լվանալու) մեջ։ Քննության վարկածով՝ 2022-2024 թվականներին նրա ղեկավարությամբ գործող խումբը Հայաստանի և Իրանի միջև առևտրատնտեսական կապերի զարգացման պատրվակով Իրանի քաղաքացիների մասնակցությամբ ստեղծել է համատեղ իրավաբանական անձինք, որից հետո իրականացրել է խարդախ սխեմա ՝ պատճառելով ավելի քան 21 մլն դոլարի վնաս ։ Բացի այդ, Գագիկ Ծառուկյանին ևս մեկ մեղադրանք է առաջադրվել՝ ապօրինի որսի համար: Հուլիսի 7-ին դատարանը բավարարել է Ծառուկյանին երկու ամսով կալանավորելու մասին մեղադրող կողմի միջնորդությունը։ Գործի շրջանակներում հուլիսի 6-ին իրավապահ մարմինները խուզարկություններ են իրականացրել Ծառուկյանի հետ կապված ավելի քան 70 հասցեներում: Դրանից հետո բոլոր ձեռնարկությունների դռները կապարակնքվել են։

Նշենք, որ հուլիսի 16-ին Գլխավոր դատախազությունը հայտարարել էր, որ Հայաստանի հակակոռուպցիոն դատարանը բավարարել է Ծառուկյանի Արարատի ցեմենտի գործարանը պետության վերահսկողությանը հանձնելու իրենց հայցը: Ծառուկյանի գործարանի ազգայնացման գործընթացը սկսվել էր այն բանից հետո, երբ ՀՀ վարչապետ Նիկոլ Փաշինյանը մայիսի 20-ին Լոռու մարզում նախընտրական քարոզարշավի ժամանակ սպառնացել էր ազգայնացնել Գագիկ Ծառուկյանի բիզնեսը: Հուլիսի 16-ին հայտնի դարձավ նաև, որ Գագիկ Ծառուկյանին պատկանող "Մուլտի Վելնես" ընկերության շենքը հանձնվել է Երևանի քաղաքապետարանի տնօրինությանը:-