Ռուսական «սմերչերը», «իգլաները» և «սոլնցեպյոկները» կշարունակեն ապահովել ուժերի հաշվեկշիռը ղարաբաղյան հակամարտության կողմերի միջև

 Ռուսական «սմերչերը», «իգլաները» և «սոլնցեպյոկները» կշարունակեն ապահովել ուժերի հաշվեկշիռը ղարաբաղյան հակամարտության կողմերի միջև:

Ռուսաստանի իրավական տեղեկատուն հրապարակել է Հայաստանի և Ռուսաստանի միջև կնքված 200 մլն դոլարի վարկային համաձայնագրի տեքստը, որի համաձայն, հանրապետության ԶՈՒ ձեռք կբերեն 9Կ58 «Սմերչ» համազարկային կրակի ռեակտիվ համակարգ (ներառյալ համակարգի համար 9Մ351 կումուլյատիվ-բեկորային մարտական մասով հրթիռներ), Իգլա-Ս դյուրակիր ԶՀՀ (համապատասխան 9Մ342 հրթիռներով), ՏՕՍ-1Ա «Սոլնցեպյոկ» ծանր հրանետային համալիր (ներառյալ՝ արձակման կայան, տեղափոխման-լիցքավորման կայան, թերմոբարիկ հրթիռներ), Մ113Մ «Կոնկուրս» հակատանկային կառավարվող հրթիռներ՝ տանդեմային մարտական մասով, թռչող սարքերի պասիվ տեղորոշման «Ավտոբազա-Մ» համալիր, «Տիգր» զրահամեքենաներ, տանկային Վ-84 շարժիչ, հետևակի մարտական մեքենաների ՈՒՏԴ-20 շարժիչ (հզորությունը` 300 ձիաուժ), 1Ա40-1 տանկային նշանառման  սարքավորում,  ՌՊԳ-26 «Ագլեն» հակատանկային ռեակտիվ նռնականետ, ՍՎԴ 7,62մմ դիպուկահար հրացան, ինժեներական, ականների հայտնաբերման սարքավորումներ, կապի միջոցներ, ավտոտեխնիկա (այդ թվում՝ «ՈՒԱԶ» մակնիշի հրամանատարական և սանիտարական ու «ԿԱՄԱԶ» մակնիշի տարբեր նշանակության մեքենաներ):

Արտոնյալ պայմաններով վարկի տրամադրման շուրջ 2015 թվականին ստորագրված համաձայնագիրը նախատեսում է, որ վարկի մարումը սկսվելու է 2018 թվականին և տևելու է 10 տարի` տարեկան 3% տոկոսադրույքով։ Իսկ կանխավճարը կկազմի 10%։ Այդպիսով, հաշվի առնելով ռուսական արժույթի արժեզրկումը, ինչպես նաև հանրապետության ՀԱՊԿ անդամությունը, ինչը թույլ է տալիս զենք գնել Ռուսաստանի ներքին գներով, 200 մլն դոլարով հակամարտության հայկականն կողմերը կարող են ձեռք բերել անսահմանափակ քանակությամբ ռուսական զենք:

Վերջին տարիներին Ադրբեջանը նույն Ռուսաստանից գնել է 4-5 մլրդ դոլարի առավելապես հարձակվողական սպառազինություն` դրանով իսկ ստեղծելով որոշակի առավելություն որոշ ժամանակակից սպառազինությունների գծով: Ստոկհոլմի խաղաղության խնդիրների հետազոտման միջազգային ինստիտուտի զեկույցի համաձայն, միայն 2010-2014թթ. Ադրբեջանի կողմից զենքի ներմուծման ծավալը 2005-2009թթ. համեմատ ավելացել է 249%-ով: Միայն 2015 թվին Բաքուն բյուջեի հատկացումների 18%-ը կամ մինչև 5 մլրդ դոլար հատկացրել է ռազմական հոդվածներին: Ընդ որում` սպառազինությունների 85%-ն Ադրբեջանը ներմուծում է Ռուսաստանից:

Ընդ ոորում Մոսկվան իր հերթին, անպայման, սպառազինություն է մատակարարել նաև Հայաստանին, և` արտոնյալ գներով: Նշենք, որ մատակարարումների քանակը երբեք չի հրապարակվել, սակայն, դրանք եղել են, հիմնականում, ոչ թե ժամանակակից սպառազինություններ, այլ Ռուսաստանի ռազմակայաններում մնացած տեխնիկա:

Հաշվի առնելով Ադրբեջանի ԶՈՒ և Հայաստանի  ԶՈՒ ու ԼՂՀ ՊԲ անձնակազմերի միջև քանակային ոչ այնքան մեծ տարբերությունը` հարձակվողական սպառազինությունների ժամանակակից տեսակների ռուսական մատակարարումները, գործնականում, ի չիք են դարձնում ուժերի հաշվեկշռի և, համապատասխանաբար, Լեռնային Ղարաբաղի հակամարտության կողմերի միջև 1994 թվականի ստատուս-քվոյի բեկմանն ուղղված  Բաքվի բազմամյա «նավթադոլարային» քաղաքկաանությունը: Իսկ հաշվի առնելով նավթի գների աղետալի անկումը` մոտ ապագայում Բաքվի կղմից սպառազինության մրցավազքի նոր շրջապտույտի նախաձեռնում ակնկալելու հարկ չկա: