Սաղաթելյան․ Ծառուկյանի նկատմամբ Հայաստանի իշխանությունների գործողությունները որևէ կապ չունեն օրենքի հետ

Արմինֆո."Բարգավաճ Հայաստան" կուսակցության (ԲՀԿ) առաջնորդ, գործարար Գագիկ Ծառուկյանի նկատմամբ  Հայաստանի իրավապահների գործողությունները քաղաքական վրեժխնդրության դրսևորում է եւ որեւէ կապ չունեն օրենքի հետ ։ Այդ մասին Facebook-ի իր էջում գրել է ԱԺ "Հայաստան" խմբակցության պատգամավոր Իշխան Սաղաթելյանը:

«Բոլորին էլ պարզ է, որ Գագիկ Ծառուկյանի նկատմամբ իրականացվողը քաղաքական վրեժխնդրության դրսևորում է և որևէ կապ չունի օրենքի հետ: Մեկ անձի բռնապետության հաստատմանն ուղղված այս քայլերը վառ վկայությունն են, որ վարչախումբը կորցրել է իր լեգիտիմությունը և իշխանության պահպանելու համար հենվում է բացառապես ուժային կառույցների վրա: Ակնհայտ է նաև, որ այսպիսի վարքագծով որևէ ռեժիմ չի կարող երկար կյանք ունենալ», - գրել է նա։

Նշենք, որ հուլիսի 6-ի առավոտյան ժամը 7-ից ուժայինները խուզարկություններ են սկսել "Բարգավաճ Հայաստան" կուսակցության առաջնորդ, գործարար Գագիկ Ծառուկյանի տանը։ Փաստաբաններին թույլ են տվել Ծառուկյանի մոտ մտնել միայն խուզարկությունների սկսվելուց հետո՝ 5 ժամ անց։ Ընդ որում, իրավապահները և ԱԱԾ աշխատակիցները խուզարկություններ են իրականացնում ոչ միայն գործարարի տանը, այլև նրա ընկերություններում և ձեռնարկություններում:

Հայաստանի Քննչական կոմիտեում հայտարարել են, որ գործողություններն իրականացվում են քրեական գործընթացի շրջանակներում, և խոստացել են ավելի ուշ պաշտոնական հայտարարություն տարածել: Խուզարկություններ են իրականացվում միաժամանակ ավելի քան 70 հասցեներում։

Հիշեցնենք, որ գործարար Գագիկ Ծառուկյանը Հայաստանի գործող իշխանությունների թիրախում էր հայտնվել խորհրդարանական ընտրություններին մասնակցելու մասին հայտարարությունից հետո: Հայաստանի վարչապետ Նիկոլ Փաշինյանը նախընտրական քարոզարշավի ընթացքում հրապարակավ հայտարարել էր Ծառուկյանի ընտանիքին պատկանող "Արարատցեմենտ" գործարանը ազգայնացնելու մտադրության մասին, որից հետո Գլխավոր դատախազությունը դիմել էր դատարան՝ պահանջելով անվավեր ճանաչել գործարանի սեփականաշնորհումը: Միաժամանակ, իրավապահ մարմինները հետաքննություն են նախաձեռնել հենց Ծառուկյանի նկատմամբ ՝ առանձնապես խոշոր չափերի հարկեր վճարելուց խուսափելու մեղադրանքով։ Բացի այդ, դատախազությունը փորձում է բռնագանձել Կոտայքի նախկին մարզպետ Կարապետ Գուլոյանի եւ նրա տիկնոջ ՝ "Բարգավաճ Հայաստան" ընդդիմադիր կուսակցության առաջնորդի դստեր՝ Ռոզա Ծառուկյանի ունեցվածքը ՝ հայտարարելով ակտիվների ենթադրյալ ապօրինի ծագման մասին: