Ֆոն դեր Լյայեն․ ԵՄ-ը պատրաստ է մինչև 2 մլրդ եվրո տրամադրել տարածաշրջանի տրանսպորտային, էներգետիկ և հաղորդակցային ենթակառուցվածքների զարգացման համար 

Արմինֆո. Հայաստանը կարող է ապավինել Եվրոպական միությանը։ Այդ մասին հուլիսի 2-ին Երեւանում հայտարարել է Եվրոպական հանձնաժողովի նախագահ Ուրսուլա ֆոն դեր Լյայենը՝ ՀՀ վարչապետ Նիկոլ Փաշինյանի հետ համատեղ ճեպազրույցում։ 

Նա շնորհավորել է վարչապետին խորհրդարանական ընտրություններում հաղթանակի կապակցությամբ, նշելով, որ Հայաստանը շարունակում է ժողովրդավարական բարեփոխումները և առավել սերտ համագործակցությունը Եվրոպայի հետ: Այդ համագործակցության առավել ակտիվ զարգացումն անցյալ տարի տարածաշրջանում խաղաղության հաստատմանն ուղղված պատմական փաստաթղթի կնքումն էր։ Ընդհանուր առմամբ, Եվրահանձնաժողովի ղեկավարի խոսքով, հարեւանների, այդ թվում' Թուրքիայի հետ բարիդրացիական հարաբերություններ հաստատելուն ուղղված Երեւանի քայլերը խոսում են երկրի իշխանությունների խիզախության մասին: Բաց սահմանները, ինչպես շարունակել է ֆոն դեր Լյայենը, հսկայական հնարավորություններ կբացեն Հայաստանի առջեւ ՝ հանրապետությունը դարձնելով աշխարհի կարեւորագույն խաչմերուկներից մեկը։ Այդ առնչությամբ Եվրահանձնաժողովի ղեկավարը հայտարարել է ԵՄ "Գլոբալ դարպասներ" ծրագրի իրականացման համար 200 մլն եվրո հատկացնելու մասին։ Ընդհանուր առմամբ, ԵՄ-ը պատրաստ է մինչև 2 մլրդ եվրո տրամադրել տրանսպորտային, էներգետիկ և հաղորդակցային ենթակառուցվածքների զարգացման համար։ 

Հայաստանի նկատմամբ Ռուսաստանի կողմից շարունակվող ճնշումների ֆոնին, ինչպես նշել է ֆոն դեր Լյայենը, Եվրահանձնաժողովը փորձագետների խումբ կուղարկի Հայաստան՝ ԵՄ երկրներ արտահանման ընդլայնմանն աջակցելու համար, եւ այդ նպատակով Երեւանին լրացուցիչ 18 մլն եվրո կհատկացվի: Ֆինանսավորումը կարող է, օրինակ, օգնել Հայաստանում ստեղծել արտահանման խթանման գործակալություն։ Ֆինանսական ռեսուրսները կդառնան 52 մլն դոլարի չափով օգնության փաթեթի եզրափակիչ մասը։ Եվրահանձնաժողովի ղեկավարն ընդգծել է նաեւ Հայաստանի նկատմամբ ինքնավար առեւտրային միջոցներ կիրառելու մտադրության մասին, ինչը թույլ կտա ազատականացնել դեպի ԵՄ արտահանման մոտ 80 տոկոսը: "Դա նշանակում է, որ մեզ հետ առեւտրի 80 տոկոսն ազատ կլինի", - ասել է ֆոն դեր Լյայենը, հավելելով, որ դա թույլ կտա ռուսական շուկա մտնող ապրանքները վերաուղղորդել դեպի եվրոպական շուկա, որը բաց կլինի Հայաստանից թարմ գյուղատնտեսական արտադրանքի 99 տոկոսի եւ խմիչքների ու ալկոհոլի 90 տոկոսի համար: Հուլիսի կեսերին ԵՄ-ն փորձագետներ կուղարկի Հայաստան՝ արտադրողների և արտահանողների հետ աշխատելու համար, որպեսզի նրանք կարողանան օգտվել Եվրամիության արտոնություններից: 

Եվրահանձնաժողովի ղեկավարը նաեւ հաղորդել է, որ էներգետիկ անվտանգության ոլորտում Երեւանը պետք է մշակի էներգակիրների մատակարարումների դիվերսիֆիկացման ռազմավարություն:  Ֆոն դեր Լյայենի ասելով՝ խոսքը էներգետիկ անվտանգության, նոր էլեկտրահաղորդման գծերի և նոր ցանցերի ստեղծման համար անհրաժեշտ ներդրումների մասին է: Իր կողմից ԵՄ-ը 25 մլն եվրո կհատկացնի այդ նպատակների և վերականգնվող էներգիայի ոլորտում Հայաստանի ներքին ներուժի զարգացմանը նպաստելու համար, ինչը կավելացնի երկրի էներգետիկ անկախությունը