Իննա Սահակյանի և Ռուբեն Ղազարյանի ֆիլմն ընդգրկվել է"Ոսկե ծիրանի" միջազգային մրցութային ծրագրում

Արմինֆո. "Ոսկե ծիրան" միջազգային կինոփառատոնը ներկայացրել է լիամետրաժ ֆիլմերի միջազգային մրցույթի ծրագիրը:

Այն ներառում է մի շարք երկրների արտադրության 12 ֆիլմ, այդ թվում ներկայացված է հայ ռեժիսորներ Իննա Սահակյանի և Ռուբեն Ղազարյանի "Վերապրել Շեքսպիրին" ֆիլմը, որը նկարահանվել է Նիդերլանդների հետ համատեղ:

Միջազգային մրցութային ծրագրի շրջանակներում երևանյան հանդիսատեսը կտեսնի նաև հետևյալ կինոաշխատանքները․ "Անցյալ, ապառնի, շարունակական" (Իրան, Իտալիա, Նորվեգիա), ռեժիսորներ Մորթեզա Ահմադվանդ և Ֆիրուզե Խոսրովանի; «Մազեր, թուղթ, ջուր․․․» (Ավստրիա),  ռեժիսոր՝ Նիկոլա Գրո, Մին Քուի Թրուն; «Լոնդոն» (Ավստրիա),  ռեժիսոր՝ Սեբաստիան Բրամեսհուբեր; «Լուսինն է իմ հայրը» (Վրաստան),  ռեժիսոր՝ Գիորգի Օվաշվիլի;

«Առյուծը թիկունքիս» (Կիպրոս, Հունաստան, Լյուքսեմբուրգ),  ռեժիսոր՝ Տոնիա Միշիալի; «Հոսանքներ» (Արգենտինա,Շվեյցարիա), ռեժիսոր՝ Միլագրոս Մումենթալեր; «Սահմանների մեխանիկան» (Կանադա),  ռեժիսոր՝ Յուբեր Կառոն-Գե; «Հայրը» (Չեխիա, Լեհաստան,Սլովակիա),  ռեժիսոր՝ Թերեզա Նվոտովա; «Լավ տղամարդ չկա» (Աֆղանստան/Դանիա/Ֆրանսիա/Գերմանիա/Նորվեգիա), ռեժիսոր՝ Շահրբանու Սադաթ; «Մանուկ աստղ» (Գերմանիա), ռեժիսոր՝ Յոշա Բոնգարդ; «Տրիստան՝ ընդմիշտ» (Շվեյցարիա),ռեժիսորներ՝ Թաբիս Նյոլե, Լորան Բոնարդո։

Հիշեցնենք, որ այս տարի "Ոսկե ծիրան" կինոփառատոնը տեղի կունենա հուլիսի 12-19-ը: Կինոցուցադրման հիմնական հարթակները կլինեն "Մոսկվա", "Նաիրի" կինոթատրոնները և Կինոյի տունը: