«Ուժեղ Հայաստան» դաշինքի առաջնորդ. Հայաստանը չպետք է դառնա նոր հակառուսական պլացդարմ

Արմինֆո.Եվրոպային և ԱՄՆ-ին ձեռնտու է Հայաստանում թույլ և ոչ լեգիտիմ ղեկավարի պահպանումը, քանի որ նրանք ցանկանում են, որ երկիրը դառնա նոր հակառուսական պլացդարմ։ Այս մասին մի շարք լրատվամիջոցների խմբագիրների հետ հանդիպման ժամանակ հայտարարել է «Ուժեղ Հայաստան» դաշինքի առաջնորդ Սամվել Կարապետյանը։

Այսպես, քաղաքական գործչի խոսքով, երկիրը կարող է բախվել տնտեսական կոլապսի, եթե ընդդիմությանը չհաջողվի համախմբվել, վերականգնել Ռուսաստանի հետ խարխլված հարաբերությունները և կանգնեցնել այն բոլոր գործընթացները, որոնց հետևանքները կզգա միայն հայ ժողովուրդը։ Քանի որ, Կարապետյանի կարծիքով, այն ամենը, ինչ այժմ տեղի է ունենում Ռուսաստանի հետ հարաբերություններում (հայկական արտադրանքի ներմուծման արգելքները - խմբ.), Արևմուտքի ծրագրերի իրականացման արդյունքն է Հայաստանում։ «Պետք է հասկանալ, որ նրանք իրենց մոնիտորինգն են անցկացնում, և նրանց պարզապես անհրաժեշտ էր գտնել գոնե մեկ երկիր, որը կառաջամղի հակառուսական օրակարգը։ Նրանք տեսան, որ կարող են դա իրականացնել Հայաստանի գործող իշխանության միջոցով։ Քանի որ նրանց մոտ դա չստացվեց անել Ադրբեջանում, չստացվեց անել Վրաստանում, և, ըստ էության, Հարավային Կովկասում մնում է մեկ երկիր՝ Հայաստանը»,- կարծում է քաղաքական գործիչը։

Այնուամենայնիվ, ինչպես հիշեցրել է Կարապետյանը, Հայաստանը փոքր երկիր է, ուստի կարևոր է անել ամեն ինչ, որպեսզի այն չդառնա այդ պայքարի հարթակ։ Դրա համար, նրա խոսքով, երկիրը պետք է լավ հարաբերություններ ունենա բոլոր քաղաքական կենտրոնների հետ, այլ ոչ թե նախապատվությունը տա կոնկրետ կողմի։ «Մենք պետք է լավ հարաբերություններ ունենանք ԱՄՆ-ի հետ, քանի որ այնտեղ մեծ սփյուռք ունենք։ Ճիշտ այդպես լավ հարաբերություններ պետք է լինեն Ռուսաստանի, Ֆրանսիայի, Չինաստանի հետ, եթե ուզում ենք լինել երկիր, որը գնում է զարգացման ճանապարհով։ Այս բոլոր երկրների հետ մենք պետք է ունենանք այնպիսի վստահելի հարաբերություններ, որոնք թույլ չեն տա մեզ վերածել իրենց դիմակայության կենտրոնի։ Մենք չպետք է որևէ մեկին հնարավորություն տանք մեզ օգտագործել ինչ-որ մեկի, օրինակ՝ Ռուսաստանի կամ Ֆրանսիայի դեմ։ Դա կարող է շատ վտանգավոր հետևանքներ ունենալ մեր երկրի համար։ Ուստի ես ընտրություններից հետո ասել եմ, որ հաղթել են բոլորը, բացի հայ ժողովրդից։ Դրա հետևանքները մենք տեսնելու ենք ամեն օր»,- վստահ է «Ուժեղ Հայաստան» դաշինքի առաջնորդը։

Կարապետյանը համարում է, որ Եվրոպան և ԱՄՆ-ը պարզապես ունեն իրենց սեփական շահերը։ Եվ իրենց ծրագրերն իրականացնելու նպատակով, նրա խոսքով, նրանց անհրաժեշտ է, որ երկիրն ունենա թույլ և ոչ լեգիտիմ ղեկավար։ «Մեզ պարզապես անհրաժեշտ է ցույց տալ նրանց, որ վարչապետ Նիկոլ Փաշինյանի գործողությունները կարող են հանգեցնել մեր երկրի կորստին։ Ես չեմ կարծում, որ նրանք ցանկանում են մեր երկրի անհետացումը, բայց միևնույն ժամանակ նրանք ուզում են, որ Հայաստանը դառնա նոր հակառուսական կենտրոն։ Այսօր դա նրանց ձեռնտու է։ Ընդ որում՝ պետք է հիշել, որ ցանկացած պատերազմ մի օր ավարտվում է, և հնարավոր է՝ ինչ-որ պահի Ռուսաստանի հետ նրանց հարաբերությունները նորից վերականգնվեն։ Եվ այդ ժամանակ, հավատացե՛ք, Ռուսաստանն այլևս չի սկսի կարգավորել իր հարաբերությունները Հայաստանի հետ։ Որովհետև մենք ամեն օր կորցնում ենք նրանց վստահությունը։ Իսկ Եվրոպան պարզապես խաղում է նրա (Փաշինյանի - խմբ.) հետ, օգտվում է նրա հակառուսական դիրքորոշումից, բայց երբ առիթը լինի, նրան էլ են գցելու։ Ուստի, կարևոր է, որ մենք աշխատենք միջազգային կառույցների հետ և նրանց հասցնենք, որ մենք չենք ձգտում պաշտոն ստանալ, այլ ուզում ենք անել ամեն ինչ՝ խուսափելու համար այն սպառնալիքներից, որոնք այսօր ծառացել են մեր երկրի առջև»,- ամփոփել է Կարապետյանը։