Հայաստանի աշխատող քաղաքացիների համար, ովքեր երեխաներ ունեն,  կներդրվի, այսպես կոչված, "ծնողական ժամ"

Արմինֆո. Հայաստանի աշխատող քաղաքացիների համար, ովքեր երեխաներ ունեն,  կներդրվի, այսպես կոչված, "ծնողական ժամ"։ Ազգային ժողովի սոցիալական հարցերի հանձնաժողովը հունիսի 11-ի նիստում դրական եզրակացություն է տվել Աշխատանքային օրենսգրքում ՀՀ կառավարության ներկայացրած փոփոխություններին: 

Ներկայացնելով փոփոխությունները՝ աշխատանքի և սոցիալական հարցերի նախարարի տեղակալ Լուսինե Քոչարյանը նշել է, որ ներկայացված փաստաթուղթն ուղղված է աշխատողների աշխատանքային և ընտանեկան պարտականությունների արդյունավետ համադրման ապահովմանը: Նախագիծը նախատեսում է սահմանել "ծնողական ժամ" եզրույթը: Փոփոխությունները նպատակաուղղված են աշխատողների սոցիալական պաշտպանության և աշխատանքի արդյունավետության բարձրացմանը: 

Փոխնախարարը նշել է, որ մինչև 12 տարեկան երեխաները, ինչպես նաև մինչև 18 տարեկան երեխաները, որոնք առողջական վիճակի պատճառով ունեն խորը կամ ծանր սահմանափակումներ, ավելի ակտիվ և շարունակական խնամքի, ծնողների ուշադրության և հոգածության կարիք ունեն: Աշխատանքի և ծնողական պարտականությունների համատեղումը հաճախ ստեղծում է օբյեկտիվ դժվարություններ, որոնք կարող են բացասաբար ազդել ինչպես երեխայի զարգացման, այնպես էլ աշխատողի աշխատանքի արտադրողականության վրա: Այդ պատճառով ծնողներին և խնամակալներին կթույլատրվի հեռանալ աշխատավայրից՝ պահպանելով ամբողջ աշխատավարձը։ Երկու երեխա ունեցող ծնողներին բացակայության առավելագույն ժամանակը կլինի 30 րոպե, երեք եւ ավելի երեխաների ունեցողների համա' առավելագույնը 1 ժամ: Խորը կամ ծանր սահմանափակումներ ունեցող երեխաների ծնողներին նույնպես կտրամադրվի 1 ժամ ՝ անկախ երեխաների թվից: 

Երեխայի խնամքի նպատակով  արձակուրդի տրամադրումը աշխատող ծնողներին հնարավորություն է տալիս ավելի ճկուն կազմակերպել իրենց աշխատանքը և ընտանեկան պարտականությունները ՝ ապահովելով անհրաժեշտ վերահսկողություն երեխայի խնամքի, դաստիարակության և առողջության նկատմամբ: Միևնույն ժամանակ, դա նպաստում է աշխատավայրում սթրեսի նվազեցմանը, աշխատողների սոցիալական պաշտպանության բարձրացմանը և աշխատանքի արդյունավետության պահպանմանը: