«Ականատես» դիտորդական առաքելությունը Հայաստանի ընտրությունները համարել է  քաղաքականապես մրցակցային

Արմինֆո. «Ականատես» դիտորդական առաքելության գնահատմամբ՝ ընտրությունների օրը, ընդհանուր առմամբ, անցել է խաղաղ մթնոլորտում, քաղաքական մրցակցությամբ և ընտրողների եւ դինամիկ ակտիվ մասնակցությամբ։

ԱրմԻնֆո-ին տրամադրված առաքելության հաղորդագրության մեջ ասվում է, որ "Ականատեսը" Հայաստանի խորհրդարանական ընտրությունների քվեարկության օրը դիտարկումն իրականացրել է երկրի ողջ տարածքում' 712 դիտորդների ներգրավմամբ: Նշվում է, որ 520 դիտորդներ հետևել են քվեարկության ողջ ընթացքին 260 ընտրատեղամասերում:

Հավելվում է, որ դիտարկումն իրականացվել է պատահական ընտրանքի եղանակով, ինչը թույլ է տալիս կիրառել վիճակագրական մեթոդներ քվեարկության գործընթացի որակը գնահատելու համար:

"Թեեւ դիտարկումն իրականացվել է երկրի բոլոր ընտրատեղամասերի միայն մի փոքր հատվածում (13%), ընտրանքային դիտարկման մեթոդը հնարավորություն է տալիս պատկերացում կազմել ընտրական գործընթացի մասին ազգային մակարդակում: Բացի այդ, 8 դիտորդներ հետևել են քվեարկությանը 6 ուղղիչ հիմնարկներում, իսկ 6 դիտորդներ հետևել են այն ընտրատեղամասերին, որոնք քվեարկություն են կազմակերպում շարժական քվեատուփերի միջոցով, ներառյալ 3 հոգեբուժական հաստատություններում և 3 ռազմաբժշկական հաստատություններում շարժական քվեատուփերի ուղեկցումը",-ասվում է հայտարարության մեջ:

 Հավելվում է, որ 54 դաշտային դիտորդների խումբն այցելել է ընտրանքի մեջ չմտնող 456 (23%) տեղամաս ՝ միաժամանակ դիտարկելով համայնքների տարածքներում տիրող իրավիճակը: 70 դիտորդներ հետևել են 38 տարածքային ընտրական հանձնաժողովների (ՏԸՀ) աշխատանքներին:

"Ականատես" դիտորդական առաքելության գնահատմամբ ՝ ընտրությունների օրն, ընդհանուր առմամբ, անցել է խաղաղ մթնոլորտում ՝ քաղաքական մրցակցությամբ և ընտրողների դինամիկ ու ակտիվ մասնակցությամբ:

Միևնույն ժամանակ, որոշ ընտրատեղամասերում լարվածություն է նկատվել ակնհայտ մանիպուլյացիաների, քվեարկության գաղտնիության խախտումների և դրանց իրականացման փորձերի, վերահսկողության և դրա իրականացման փորձերի, ինչպես նաև ընտրական գործընթացի որոշ մասնակիցների ագրեսիվ դրսևորումների պատճառով: Ընտրական գործընթացի տարբեր տեսակի խախտումների մեջ ներգրավված են եղել տարբեր կուսակցությունների և դաշինքների ներկայացուցիչներ:

Ընտրական հանձնաժողովների աշխատանքը, չնայած տեխնիկական որոշ թերություններին, ապահովել է քվեարկության և արդյունքների ամփոփման պատշաճ ընթացքը: Ոստիկանությունը նույնպես, հիմնականում, իրականացրել է օրենքով նախատեսված իր գործառույթները", - ասված է հայտարարության մեջ:

Նշվում է նաև, որ առաքելությունը դիմում-բողոքներ է ուղարկել ընտրական հանձնաժողովներ՝ քվեարկության օրը հայտնաբերված էական խախտումների վերաբերյալ, ինչպես նաև առանձին դեպքերում նախապատրաստվում են հաշվետվություններ իրավապահ մարմինների համար:

«Ականատես։շ» դիտորդական առաքելությունը  հիմնադրվել է 2018 թվականի օգոստոսին։ Նախաձեռնության անդամ են հանդիսանում «Կոռուպցիայի դեմ պայքարի թափանցիկության միջազգային կենտրոն"ՀԿ-ն եւ Զարգացման ու իրավունքների պաշտպանության հիմնադրամը: Առաքելության նպատակն է աջակցել ազատ եւ արդար ընտրությունների անցկացմանը՝  Հայաստանի Հանրապետության օրենսդրությանը և միջազգային չափանիշներին համապատասխան, ընտրական գործընթացների լեգիտիմությունը եւ դրանց նկատմամբ հասարակական վերահսկողությունը։

Հայաստանի Հանրապետության Ազգային ժողովի 2026 թվականի ընտրությունների դիտորդական առաքելությունն իրականացվում է Եվրոպական միության, ԱՄՆ Մարշալի հիմնադրամի, Տրանսատլանտյան հիմնադրամի (GMF TF), Նորվեգիայի դեսպանատան, Ժողովրդավարության ազգային հիմնադրամի, Ժողովրդավարության եվրոպական հիմնադրամի և Ժողովրդավարության աջակցության հիմնադրամի ֆինանսական աջակցությամբ: Սույն փաստաթղթի բովանդակության համար պատասխանատվություն է կրում բացառապես ընտրությունների դիտարկման նախաձեռնությունը և այն պարտադիր չէ, որ արտահայտի դրամաշնորհառուների տեսակետները: